దేశంలో మరోసారి కలకలం.. మూడు ప్రధాన విమానాశ్రయాలకు

దేశంలో బాంబు బెదిరింపులు మరోసారి కలకలం సృష్టిస్తున్నాయి. దేశంలోని పలు ప్రధాన ఎయిర్‌పోర్ట్స్‌ కు బాంబు బెదిరింపులు వచ్చాయి. రాజస్థాన్‌లోని జైపూర్‌, మహారాష్ట్రలోని నాగ్‌పూర్‌, గోవా విమానాశ్రయాలకు ఈమెయిల్స్‌ ద్వారా బాంబు బెదిరింపులు వచ్చినట్లు అధికారులు తెలిపారు. దీంతో వెంటనే ఆయా విమానాశ్రయాల అధికారులు స్థానిక పోలీసులకు సమాచారం అందించారు. రంగంలోకి దిగిన అధికారులు బాంబ్‌ స్క్వాడ్‌, జగిలాలతో ఆయా విమానాశ్రయాల్లో తనిఖీలు చేపట్టారు. అయితే, ఎక్కడా ఎలాంటి పేలుడు పదార్థాలు కనిపించలేదని పోలీసులు పేర్కొన్నారు. మరోవైపు బెదిరింపు మెయిల్స్‌ నేపథ్యంలో ఆయా విమానాశ్రయాల్లో భద్రతను కట్టుదిట్టం చేశారు. ఈ ఘటనపై కేసు నమోదు చేసిన పోలీసులు ఈమెయిల్‌ పంపిన వారి కోసం గాలిస్తున్నారు. అయితే, ఆయా విమానాశ్రయాల్లో విమాన సర్వీసులకు ఎలాంటి అంతరాయం కలగలేదని అధికారులు తెలిపారు.