ది ప్యార‌డైజ్ పై కేటీఆర్ ఇంట్రెస్ట్.. రాజ‌కీయ ఛాయ‌ల‌తో కొత్త డిస్క‌ష‌న్

నాని(nani) నటించిన ది ప్యారడైజ్(the paradise) రిలీజైన తర్వాత సినిమాపై ప్రేక్షకుల్లో ఆసక్తి కొనసాగుతోంది. ముఖ్యంగా తెలంగాణ నేపథ్యం, కథలోని సామాజిక అంశాలు, రాజకీయ ఛాయలు సినిమాపై డిస్క‌ష‌న్ కు కారణమవుతున్నాయి. ఈ నేపథ్యంలో బీఆర్ఎస్ వర్కింగ్ ప్రెసిడెంట్ కేటీఆర్(KTR) ఈ సినిమాను థియేటర్‌లో చూడాలని డిసైడ్ అవ‌డం ఇప్పుడు మరో ఇంట్రెస్టింగ్ అంశంగా మారింది. చాలా కాలం తర్వాత థియేటర్‌కు వెళ్లి సినిమా చూడబోతున్నట్లు ఆయన స్వయంగా వెల్లడించారు.

ది ప్యారడైజ్ లో నాని యాక్టింగ్ తో పాటు డైరెక్ట‌ర్ శ్రీకాంత్ ఓదెల(Srikanth Odela) తీసుకున్న కథా నేపథ్యం ప్ర‌త్యేకంగా నిలుస్తోంది. ముఖ్యంగా ప్రియదర్శి(priyadarshi) పోషించిన ఎమ్మెల్యే శంకరన్న(Sankaranna) పాత్రపై ప్రేక్షకుల్లో ఆసక్తి నెలకొంది. ఆ క్యారెక్ట‌ర్ డిజైన్ లో తెలంగాణ రాజకీయ వాతావరణం ప్రతిబింబించే అంశాలు కనిపించడంతో సినిమా డిస్క‌ష‌న్స్ లో పొలిటిక‌ల్ యాంగిల్ కూడా చేరింది.

అయితే డైరెక్ట‌ర్ శ్రీకాంత్ ఓదెల ఇప్పటికే క్లారిటీ ఇచ్చిన‌ట్టుగా, సినిమా పూర్తిగా కల్పిత కథాంశంతో రూపొందింది. తన చిన్న‌ప్ప‌టి అనుభవాలు, తెలంగాణలో తాను చూసిన కొన్ని వాస్తవ ఘటనల ప్రభావం కథపై ఉన్నప్పటికీ పాత్రలు, కథనం కల్పితమేనని ఆయన చెప్పారు. ఈ నేపథ్యంలో కేటీఆర్ సినిమా వీక్షించనుండటంతో ది ప్యారడైజ్ పై మరోసారి ఆసక్తికరమైన చర్చ మొదలైంది.