టికెట్ రేటు తగ్గితే హీరోల రెమ్యునరేషన్ తగ్గుతుందనా! : ఏపీ మంత్రి అనిల్ కుమార్ యాదవ్

ఏపీలో సినిమా టికెట్ల ధరలపై మాటల యుద్ధం కొనసాగుతోంది. హీరో నాని కామెంట్స్‌కు మంత్రులు కౌంటర్ ఇస్తున్నారు. తాజాగా నాని వ్యాఖ్యలపై మంత్రి అనిల్ కుమార్ యాదవ్ ఘాటుగా స్పందించారు. తమకు ఏ నానీలు తెలియదని.. తెలిసిందల్లా కొడాలి నాని అన్న ఒక్కరనేని సెటైర్లు పేల్చారు. సినిమా విషయంలో జరిగే దోపిడీని అరికట్టేందుకు ప్రభుత్వం చర్యలు తీసుకుంటుందని.. ప్రొడక్షన్ కి 30 శాతం ఖర్చు అయితే సినిమా హీరోల రెమ్యునరేషన్ ఖర్చు 70 శాతం ఉంటుందన్నారు. సినిమా హీరోలు వాళ్ల రెమ్యునరేషన్ తగ్గించుకోవచ్చు కదా అంటూ ప్రశ్నించారు. ప్రభుత్వం తీసుకున్న నిర్ణయం పట్ల ప్రజలు హర్షం వ్యక్తం చేస్తుంటే సినిమాల్లో యాక్ట్ చేసే హీరోలకి ఎందుకు అంత కడుపుమంట అన్నారు మంత్రి.

టికెట్ రేటు తగ్గితే రెమ్యునరేషన్‌ తగ్గుతుందని వారి బాధ అన్నారు. బీమ్లా నాయక్, వకీల్ సాబ్‌కు పెట్టిన ఖర్చెంత.. పవన్ కళ్యాణ్ తీసుకున్న రెమ్యునరేషన్ ఎంతని ప్రశ్నించారు. ప్రజలను ఉద్దరిస్తానన్న పవన్‌.. తక్కువ రేట్‌కు వినోదం పంచొచ్చు కదా అన్నారు. తనకు ఉన్న క్రేజ్‌ను పవన్ కల్యాణ్ అమ్ముకుంటున్నారని ఘాటు వ్యాఖ్యలు చేశారు. దానికోసం కోట్లాది మంది ప్రజలపై భారంపడేలా సినిమా రేట్లు పెంచమనడం ఎంతవరకు కరెక్ట్ అంటూ మంత్రి అనిల్‌ మండిపడ్డారు.