భారత్ రియల్ ఎస్టేట్‌‌లోకి కొత్త ‘సైలెంట్ ప్లేయర్’! మూడు నెలల్లో రూ. 80,000 కోట్ల పెట్టుబడులు!

గత కొంతకాలంగా మన దేశంలో రియల్ ఎస్టేట్ మార్కెట్ పరిస్థితి చూస్తే పెద్ద ఉత్సాహంగా లేదు. అపార్ట్‌మెంట్‌లు, నివాస గృహాల విక్రయాలు అనుకున్న స్థాయిలో సాగడం లేదనే వార్తలు వింటూనే ఉన్నాం. రకరకాల కారణాలతో సాధారణ కొనుగోలుదారులు వెనుకంజ వేస్తున్న వేళ, హఠాత్తుగా మన దేశ భూముల వైపు వేల కోట్ల రూపాయల విదేశీ కరెన్సీ పారడం మొదలైంది. కేవలం మూడంటే మూడు నెలల్లోనే ఏకంగా రూ. 80,000 కోట్లకు పైగా ($9.5 బిలియన్లు) భారీ పెట్టుబడులు భారత రియల్ ఎస్టేట్‌లోకి వచ్చిపడ్డాయి! ఇంకా రాబోయే రోజుల్లో లక్షల కోట్లు పారేలా ఉన్నాయి. అసలు మార్కెట్ డల్‌గా ఉన్న టైమ్‌లో విదేశాల నుంచి ఇంత భారీ మొత్తంలో డబ్బు ఎవరు పెడుతున్నారు? వారి అసలు లక్ష్యం ఏంటి? ఇది భారత రియల్ ఎస్టేట్‌లో మునుపెన్నడూ లేని పెద్ద కుదుపా?

ఈ ప్రశ్నలకు సమాధానం దొరకాలంటే మనం ఒకప్పుడు రియల్ ఎస్టేట్ గురించి ఆలోచించిన పద్ధతిని మార్చుకోవాలి. ఒకప్పుడు రియల్ ఎస్టేట్ అంటే కేవలం ఇళ్లు, అపార్ట్‌మెంట్లు, షాపింగ్ మాల్స్ లేదా ఐటీ ఆఫీసుల చుట్టూనే తిరిగేది. కానీ ఇప్పుడు ఈ మార్కెట్‌లోకి ఒక ఊహించని కొత్త ‘సైలెంట్ ప్లేయర్’ అడుగుపెట్టాడు. అతను ఇల్లు కొనడు, ఆఫీసులో కూర్చోడు, షాపింగ్ మాల్‌కు అసలే వెళ్లడు. అయినా కూడా అతనికి వేల ఎకరాల భూమి, వేల మెగావాట్ల విద్యుత్, భారీ భవనాలు, హై-స్పీడ్ కేబుళ్లు, కూలింగ్ సిస్టమ్స్ కావాలి. ఇంతకీ ఆ కొత్త కస్టమర్ ఎవరో తెలుసా? అదే ఆర్టిఫిషియల్ ఇంటెలిజెన్స్ (AI)!

ఈ భారీ ఫండ్స్ ఎవరివి? ఎందుకు పెడుతున్నారు?

హఠాత్తుగా వచ్చిన ఈ రూ. 80,000 కోట్ల వెనక ఉన్న ఇన్వెస్టర్లను చూస్తే విషయం మరింత స్పష్టమవుతుంది. ఈ మూడో త్రైమాసికంలో వచ్చిన మొత్తం పెట్టుబడులలో దాదాపు 59 శాతం విదేశాల నుంచే వచ్చాయి. ఇందులో సింహభాగం—అంటే దాదాపు 90 శాతం—ఒక్క అమెరికాకు చెందిన భారీ గ్లోబల్ ఇన్వెస్ట్‌మెంట్ ఫండ్లు, ప్రైవేట్ ఈక్విటీ దిగ్గజాల నుంచే వచ్చాయి. వీటికి తోడు కెనడా, సింగపూర్, జపాన్ దేశాల పెద్ద సంస్థాగత ఇన్వెస్టర్లు (Institutional Investors) కూడా ఉన్నాయి.

ఈ గ్లోబల్ ఫండ్స్ పెడుతున్నది సాధారణ హౌసింగ్ ప్రాజెక్టులలో కాదు. రాబోయే పదేళ్లలో భారతదేశ డిజిటల్, ఐటీ మౌలిక వసతులకు రాబోతున్న భారీ డిమాండ్‌ను వారు చాలా ముందుగానే ఊహించారు. మనం రోజూ ఫోన్లలో వాడే ChatGPT, Gemini, క్లౌడ్ సర్వీసెస్, ఏఐ టూల్స్ వెనక వేల సంఖ్యలో పనిచేసే భారీ సర్వర్లు ఉంటాయి. ఆ సర్వర్లను భద్రంగా నడిపించడానికి “డేటా సెంటర్లు” కావాలి. అందుకే విదేశీ ఫండ్లు కేవలం “భూమి రేటు పెరుగుతుందా?” అని చూడకుండా, “ఈ భూమి రేపటి డిజిటల్ ఎకానమీకి ఎంత కీలకం?” అని లెక్కలేసి మరీ పెట్టుబడులు గుమ్మరిస్తున్నాయి.

రియల్ ఎస్టేట్ రంగానికి ఇది పెద్ద కుదుపా?

కచ్చితంగా ఇది భారత రియల్ ఎస్టేట్ రూపురేఖలనే మార్చేసే అతిపెద్ద మలుపు (Disruption)అనే చెప్పాలి. ఇన్నాళ్లూ రియల్ ఎస్టేట్ అనగానే మనకు గుర్తొచ్చే పాత మాట…”లొకేషన్, లొకేషన్, లొకేషన్.” కానీ ఈ కొత్త సైలెంట్ ప్లేయర్ రాకతో ఆ సూత్రం కాస్తా “Land + Power + Connectivity + Water = Digital Real Estate” గా మారిపోయింది.

ఈ మూడో త్రైమాసికంలో రియల్ ఎస్టేట్‌‌లోకి వచ్చిన మొత్తం ఈక్విటీ పెట్టుబడులలో ఏకంగా 57 శాతం వాటా ఒక్క డేటా సెంటర్ల వైపుకే మళ్లింది. డేటా సెంటర్లు, డెవలప్‌మెంట్ సైట్లు, నిర్మించిన ఆఫీస్ ఆస్తులు అన్నీ కలిపితే 91 శాతాన్ని ఆక్రమించేశాయి. అంటే, సంప్రదాయ హౌసింగ్ సెగ్మెంట్ మందగించినా, డిజిటల్ ఇన్ఫ్రాస్ట్రక్చర్ రియల్ ఎస్టేట్‌ను సరికొత్త ఎత్తులకు తీసుకెళ్తోంది. కేవలం సిటీ సెంటర్‌లో ఉందనో, ప్రైమ్ లొకేషన్ అనో కాకుండా.. 24 గంటల ఇబ్బందులు లేని విద్యుత్, గ్రీన్ ఎనర్జీ, కూలింగ్ కోసం నీటి సదుపాయం, ఆప్టికల్ ఫైబర్ కనెక్టివిటీ ఉన్న భూములకు ఇప్పుడు విపరీతమైన రెక్కలొస్తున్నాయి.

మున్ముందు రాబోయే లక్షల కోట్ల కథ!

ప్రముఖ అంతర్జాతీయ సంస్థ JLL అంచనాల ప్రకారం, 2026 మధ్యలో 1.6 గిగావాట్లుగా ఉన్న మన దేశ డేటా సెంటర్ సామర్థ్యం 2029 నాటికి ఏకంగా 6 గిగావాట్లకు చేరబోతోంది. 2019లో కేవలం 400 మెగావాట్లుగా ఉన్న సామర్థ్యం ఇప్పుడు 1.8 గిగావాట్లకు పెరగడమే కాకుండా, మరో 3.9 గిగావాట్ల ప్రాజెక్టులు పైప్‌లైన్‌లో ఉన్నాయి. అంటే ఇప్పుడు వస్తున్న రూ. 80,000 కోట్లు కేవలం ఒక విడత మాత్రమే, మున్ముందు లక్షల కోట్ల రూపాయలు ఈ మార్కెట్‌లోకి రాబోతున్నాయి.

ఈ డేటా సెంటర్ల విస్తరణ వల్ల కేవలం భూమి అమ్మకాలే కాదు.. పవర్ ఇన్ఫ్రాస్ట్రక్చర్, సోలార్, విండ్ ఎనర్జీ, హై-స్పీడ్ నెట్‌వర్కింగ్, కన్‌స్ట్రక్షన్, ఇంజినీరింగ్ వంటి అనేక అనుబంధ రంగాలకు భారీ వ్యాపార అవకాశాలు దక్కుతాయి. ఇది కేవలం మెట్రో నగరాలకే పరిమితం కాకుండా, మంచి విద్యుత్, కనెక్టివిటీ సదుపాయాలు ఉన్న ద్వితీయ శ్రేణి నగరాలకు (ఆంధ్రప్రదేశ్‌లోని విశాఖపట్నం వంటి తీర ప్రాంత నగరాలతో సహా) విస్తరించే అవకాశం ఉంది.

మొత్తానికి చెప్పాలంటే, సాధారణ గృహ కొనుగోళ్లు నెమ్మదించినా, ప్రపంచ స్థాయి ఏఐ విప్లవం భారత భూమికి ఒక సరికొత్త రూపాన్ని, ఊహించని విలువను తెచ్చిపెడుతోంది. ఇది కేవలం ప్రాపర్టీ వ్యాపారం కాదు, రాబోయే దశాబ్దపు డిజిటల్ భారత్ పునాది కోసం గ్లోబల్ ఇన్వెస్టర్లు ముందుగానే వేస్తున్న భారీ మాస్టర్ ప్లాన్!

—సూర్య ప్రకాష్ జోశ్యుల