మంత్రి పదవికోసం విజయశాంతి మైండ్ గేమ్స్?

సినిమాల్లో లేడీ అమితాబ్‌గా, రాజకీయాల్లో ఫైర్‌బ్రాండ్‌గా పేరొందిన విజయశాంతి శైలి ఎప్పుడూ విలక్షణమే. ఏ పార్టీలో ఉన్నా తనదైన ముద్ర వేయాలనుకునే ఆమె, ప్రస్తుతం కాంగ్రెస్ పార్టీలో ఉంటూ సొంత ప్రభుత్వంపైనే విమర్శల బాణాలు ఎక్కుపెట్టడం రాజకీయ వర్గాల్లో తీవ్ర చర్చనీయాంశంగా మారింది. తాజాగా షాబాద్ మర్డర్ల కేసులో పోలీసుల తీరును, రాష్ట్ర ప్రభుత్వ స్పందనను ఆమె బహిరంగంగా తప్పుబట్టడం హస్తం పార్టీని తీవ్ర ఇరకాటంలోకి నెట్టింది. అయితే, ఈ విమర్శల వెనుక శాంతిభద్రతల పరిరక్షణ కంటే, ఆమె వ్యక్తిగత రాజకీయ ప్రయోజనాలే ఎక్కువగా ఉన్నాయనే విమర్శలు స్వపక్షం నుంచే బలంగా వినిపిస్తున్నాయి.

విజయశాంతికి ఉన్న మాస్ ఇమేజ్, కరిష్మాను చూసి అన్ని రాజకీయ పార్టీలూ ఆమెను సాదరంగా ఆహ్వానిస్తూ ఉంటాయనేది బహిరంగ రహస్యం. కానీ, ఆమె ట్రాక్ రికార్డును పరిశీలిస్తే క్షేత్రస్థాయి రాజకీయాలకు ఆమె చాలా కాలంగా దూరంగా ఉంటున్నారనే వాస్తవం స్పష్టమవుతుంది. ప్రజల పక్షాన నిలబడి రోడ్లపైకి వచ్చి పోరాడిన దాఖలాలు, లేదా పార్టీ బలోపేతం కోసం క్షేత్రస్థాయిలో పర్యటించిన సందర్భాలు ఇటీవలి కాలంలో ఎక్కడా కనిపించలేదు.

కేవలం సోషల్ మీడియా వేదికగా అడపాదడపా పోస్టులు పెట్టడానికే ఆమె పరిమితమయ్యారనే విమర్శలు ఉన్నాయి. ఆ పోస్టులు సైతం పార్టీకి మైలేజ్ తెచ్చేలా కాకుండా, ప్రభుత్వాన్ని డిఫెన్స్‌లో పడేసేలా ఉండటం గమనార్హం. కేవలం సోషల్ మీడియా వేదికగా విమర్శలు గుప్పిస్తూ, క్షేత్రస్థాయిలో పార్టీ కోసం శ్రమించకుండా పదవులు ఆశించడం ఎంతవరకు సమంజసమనే ప్రశ్నలు సొంత పార్టీ శ్రేణుల నుంచే వ్యక్తమవుతున్నాయి.

తాజా పరిణామాల వెనుక విజయశాంతి సుదీర్ఘ నిరీక్షణ, అసంతృప్తి దాగి ఉన్నాయని పార్టీ వర్గాలు విశ్లేషిస్తున్నాయి. కాంగ్రెస్ అధికారంలోకి వచ్చినప్పటి నుంచి తనకు మంత్రి పదవి దక్కాలని ఆమె ఎంతో కాలంగా గట్టిగా డిమాండ్ చేస్తున్నారు. అయితే, సామాజిక సమీకరణాలు, క్షేత్రస్థాయిలో పార్టీకి చేసిన సేవలను పరిగణనలోకి తీసుకునే అధిష్ఠానం ఆమెకు ఆ అవకాశం కల్పించలేకపోయింది.

దీంతో ఎలాగైనా మంత్రి పదవి దక్కించుకోవాలనే ఏకైక లక్ష్యంతోనే విజయశాంతి వ్యూహాత్మకంగా అటు ప్రభుత్వాన్ని, ఇటు పార్టీని ఇరుకున పెట్టే ప్రయత్నం చేస్తున్నారని పార్టీ అంతర్గత వర్గాలు భావిస్తున్నాయి. సంక్షోభ సమయాల్లో ప్రభుత్వానికి అండగా నిలవాల్సింది పోయి, ప్రతిపక్షాలకు ఆయుధాలు ఇచ్చేలా సొంత పార్టీ నేతే వ్యవహరించడంపై తీవ్ర అసంతృప్తి వ్యక్తమవుతోంది. ఇలాంటి ఒత్తిడి రాజకీయాల ద్వారా అధిష్ఠానాన్ని బెదిరించి తన పంతం నెరవేర్చుకోవాలని ఆమె చూస్తున్నట్లు స్పష్టమవుతోంది.

గతంలో పలు పార్టీలు విజయశాంతి కరిష్మాను చూసి ఆమె ఒత్తిళ్లకు లొంగి ఉండవచ్చు. కానీ, ప్రస్తుత కాంగ్రెస్ పార్టీలో ఇలాంటి బెదిరింపు రాజకీయాలు సాగవని పార్టీ సీనియర్ నాయకులు అంతర్గత చర్చల్లో స్పష్టం చేస్తున్నారు. 24 గంటలూ ప్రజల్లో ఉంటూ, పార్టీ లైన్ దాటకుండా పనిచేసే వారికే పదవులు వస్తాయనే సంకేతాన్ని అధిష్ఠానం ఇప్పటికే బలంగా పంపింది.

తాజా పరిణామాలపై కాంగ్రెస్ పెద్దలు తీవ్ర ఆగ్రహంతో ఉన్నారని, విజయశాంతికి గట్టిగా లైన్ క్లియర్ చేయాలని నిశ్చయించుకున్నట్టు తెలుస్తోంది. సొంత పార్టీని ఇబ్బంది పెట్టేలా వ్యవహరిస్తే ఊరుకునేది లేదని, పనిచేస్తేనే పదవులు వస్తాయనే చేదు నిజాన్ని ఆమెకు స్పష్టం చేసేందుకు అధిష్ఠానం సిద్ధమవుతోంది. మరి ఈ హెచ్చరికల తర్వాత విజయశాంతి తన రూట్ మారుస్తారా, లేక తన పంథాలోనే ముందుకు సాగుతారా అనేది వేచి చూడాలి.