హృదయాలను గెలుచుకున్న నాగార్జున

హైదరాబాద్ చరిత్రలో ఒక అద్భుతం జరిగింది. తుమ్మిడికుంట ఆక్రమణ వివాదం ముగిసి, పర్యావరణ పరిరక్షణగా రూపాంతరం చెందిన తీరు చర్చనీయాంశమైంది. మాదాపూర్‌లోని తుమ్మిడికుంట చెరువు ఎఫ్‌టీఎల్, బఫర్ జోన్ పరిధిలో సినీ నటుడు అక్కినేని నాగార్జున ఎన్-కన్వెన్షన్ నిర్మించారంటూ అప్పట్లో ప్రభుత్వం ఆరోపించింది. దీంతో ప్రభుత్వం ఏర్పాటు చేసిన ‘హైడ్రా’ ఆ భవనాన్ని కూల్చేసింది. ఆ సమయంలో తీవ్ర ఆవేదన, ఆగ్రహం వ్యక్తం చేసిన నాగార్జున.. అదే చెరువు సుందరీకరణ పూర్తయ్యాక ప్రారంభోత్సవంలో ముఖ్యమంత్రి రేవంత్ రెడ్డితో కలిసి ఒకే వేదికపై నవ్వుతూ కనిపించడం అనూహ్యమైన మలుపు.

2024 ఆగస్టులో హైడ్రా చేపట్టిన ఎన్-కన్వెన్షన్ కూల్చివేత తీవ్ర సంచలనం సృష్టించింది. తాము పట్టా భూమిలోనే నిర్మాణం చేపట్టామని, న్యాయస్థానం స్టే ఉత్తర్వులు ఉన్నప్పటికీ అధికారులు ఏకపక్షంగా కూల్చివేశారంటూ నాగార్జున అప్పట్లో కోర్టును ఆశ్రయించారు. ఒక స్టార్ హీరో నిర్మాణాన్ని లక్ష్యంగా చేసుకోవడం రాజకీయంగానూ పెద్ద వివాదానికి దారితీసింది. ప్రభుత్వ తీరుపై నాగార్జున తీవ్ర అసంతృప్తితో ఉన్నారనే ప్రచారం జోరుగా సాగింది. అయితే.. న్యాయపోరాటాలు, రాజకీయ రగడను పక్కనపెట్టి ప్రభుత్వం త్వరితగతిన చెరువు పునరుద్ధరణ పనులను ప్రారంభించింది.

హైడ్రా, హెచ్ఎండీఏ ఆధ్వర్యంలో సుమారు రూ.20 కోట్ల వ్యయంతో తుమ్మిడికుంట చెరువును అధునాతన రీతిలో తీర్చిదిద్దారు. పూడికతీత పనులు చేపట్టి, గతంలో 14 ఎకరాలుగా కుంచించుకుపోయిన చెరువు పరిధిని 30 ఎకరాలకు విస్తరించారు. చెరువు చుట్టూ 1.6 కిలోమీటర్ల వాకింగ్ ట్రాక్, ఆధునిక ఓపెన్ జిమ్, చిన్నారుల ఆట స్థలాలు, పచ్చదనంతో కూడిన ల్యాండ్‌స్కేపింగ్‌ను అభివృద్ధి చేశారు. కాలుష్యపు కూపంగా మారిన నీటి వనరును నగర ప్రజలకు ఆహ్లాదాన్ని పంచే అర్బన్ పార్క్‌గా ప్రభుత్వం మార్చగలిగింది.

చెరువు ప్రారంభోత్సవ కార్యక్రమానికి నాగార్జున హాజరుకావడం అందరినీ విస్మయానికి గురిచేసింది. వేదికపై సీఎం రేవంత్ రెడ్డి, నాగార్జున పరస్పరం ఆత్మీయంగా పలకరించుకోవడం విశేషం. ఈ సందర్భంగా రేవంత్ రెడ్డి మాట్లాడుతూ.. “మనం నీళ్ల ఆవాసాన్ని ఆక్రమిస్తే, ఆ నీళ్లు మన నివాసాలను ముంచెత్తుతాయి. మంచి నిర్ణయాలు తీసుకున్నప్పుడు కొందరికి తాత్కాలికంగా నష్టం జరిగినా, రాబోయే తరాలకు మేలు జరుగుతుంది” అని పేర్కొన్నారు. అంతేకాకుండా, చెరువు విస్తరణ, అభివృద్ధి కోసం నాగార్జున తన రెండెకరాలను ఉదారంగా విరాళంగా ఇచ్చారని వెల్లడించారు. సినిమాల్లోనే కాకుండా నిజ జీవితంలోనూ నాగార్జున రియల్ హీరో లాంటి నిర్ణయం తీసుకున్నారని ప్రశంసించారు. సీఎం నాగార్జునను శాలువాతో ప్రత్యేకంగా సత్కరించారు.

వేదికపై నాగార్జున మాట్లాడిన మాటలు ఆయన హుందాతనాన్ని ప్రతిబింబించాయి. “గతంలో ఇక్కడికి వచ్చినప్పుడు నా ఆలోచనా విధానం వేరుగా ఉండేది. కానీ హైడ్రా కమిషనర్ రంగనాథ్, ప్రభుత్వ సంకల్పం చూశాక నా ఆలోచన మారింది. విదేశాల్లో సరస్సులను చూసి మన దగ్గర ఎందుకు ఇలా చేయలేరని అనుకునేవాడిని. ఇప్పుడు తుమ్మిడికుంటను చూస్తుంటే మనమూ చేయగలమని నిరూపించారు. మన భావితరాలకు మనం ఇచ్చే అతిపెద్ద ఆస్తి స్వచ్ఛమైన ప్రకృతే” అని నాగార్జున వ్యాఖ్యానించారు. ఇక్కడ డ్యాన్స్ చేయలేను కానీ కచ్చితంగా సినిమా షూటింగ్ చేస్తానంటూ సరదాగా మాట్లాడి వాతావరణాన్ని తేలికపరిచారు.

ఈ పరిణామం ద్వారా రాజకీయంగా, సామాజికంగా ఒక బలమైన సందేశం వెళ్ళింది. వివాదాన్ని శాశ్వత వైషమ్యంగా మార్చుకోకుండా, ప్రజా ప్రయోజనం ముడిపడి ఉన్న పర్యావరణ పరిరక్షణ కోసం వ్యక్తిగత నష్టాన్ని పక్కనపెట్టి నాగార్జున పెద్ద మనసు చాటుకోగా, తీసుకున్న నిర్ణయం ఎంత కఠినమైనదైనా లక్ష్యం నెరవేరినప్పుడు గౌరవాన్ని ఇవ్వడంలో ప్రభుత్వం వెనకాడలేదని ఈ ఉదంతం స్పష్టం చేసింది. హైదరాబాద్ నగర చెరువుల పునరుజ్జీవన ప్రయాణంలో తుమ్మిడికుంట ఘటన ఒక మైలురాయిగా నిలిచింది.