అధికారుల అవినీతిపై ఎమ్మెల్యే హాట్ కామెంట్స్!
ప్రభుత్వాలు మారినా, పాలకులు మారినా క్షేత్రస్థాయిలో అధికార యంత్రాంగం తీరు మారడం లేదని మరోసారి బహిర్గతమైంది. సాధారణంగా ప్రతిపక్షాలు ప్రభుత్వంపై చేసే అవినీతి ఆరోపణలను ఈసారి స్వయంగా అధికార పార్టీ ఎమ్మెల్యేనే చేయడం రాష్ట్ర రాజకీయాల్లో పెను ప్రకంపనలు సృష్టిస్తోంది. మహబూబ్నగర్ జిల్లా జడ్చర్ల కాంగ్రెస్ ఎమ్మెల్యే జనంపల్లి అనిరుధ్ రెడ్డి, సొంత ప్రభుత్వ హయాంలో జరుగుతున్న అవినీతిపై చేసిన వ్యాఖ్యలు ఇప్పుడు అటు రాజకీయ వర్గాల్లోనూ, ఇటు అధికార యంత్రాంగంలోనూ హాట్ టాపిక్గా మారాయి. రాజకీయ నాయకుల కంటే ప్రభుత్వ అధికారులే అత్యంత అవినీతిపరులుగా మారారని, వారి లంచగొండితనం వల్ల ప్రభుత్వానికి తీవ్ర చెడ్డపేరు వస్తోందని ఆయన బహిరంగంగానే ఆవేదన వ్యక్తం చేశారు.
పాలనా యంత్రాంగంలో వేళ్లూనుకుపోయిన అవినీతిని అనిరుధ్ రెడ్డి కళ్లకు కట్టారు. సామాన్యుల కష్టాలను తీర్చడానికి ఒక ప్రజాప్రతినిధిగా తాను స్వయంగా ఒక అధికారి వద్దకు వెళ్లి పని చేయాలని కోరితే నిరాకరించారని, కానీ అదే పని కోసం బాధితుడు రూ. 15 వేలు లంచం ముట్టజెప్పగానే క్షణాల్లో ఫైల్ కదిలిందని ఆయన తన అనుభవాన్ని వివరించారు. ఒక అధికార పార్టీ ఎమ్మెల్యే మాటకు కూడా విలువ లేకుండా కేవలం డబ్బుకే ప్రాధాన్యత ఇచ్చే స్థాయికి అధికార యంత్రాంగం దిగజారిందనడానికి ఈ ఘటనే నిదర్శనమని ఆయన వ్యాఖ్యలు స్పష్టం చేస్తున్నాయి.
ఇవి కూడా చదవండి
కేవలం సామాన్యుల పనులే కాకుండా, ప్రజా ప్రయోజనార్థం చేపట్టే అభివృద్ధి పనులకు కూడా అవినీతి గ్రహణం పట్టిందని ఎమ్మెల్యే ఆరోపించారు. ముఖ్యంగా రహదారుల నిర్మాణ పనులు చేసే కాంట్రాక్టర్ల నుండి అధికారులు ఏకంగా 20 శాతం వరకు కమీషన్లు డిమాండ్ చేస్తున్నారని ఆయన బాంబు పేల్చారు. ఈ స్థాయిలో కమీషన్లు ఇచ్చుకోలేక, నాణ్యతతో పనులు చేయలేక కొందరు కాంట్రాక్టర్లు మధ్యలోనే ప్రాజెక్టులను వదిలేసి వెళ్లిపోతున్నారని ఆయన ఆందోళన వ్యక్తం చేశారు. కాంట్రాక్టర్లు పనులు నిలిపివేయడానికి అసలు కారణాలేమిటో జర్నలిస్టులు లోతుగా పరిశోధించి ప్రజల ముందుంచాలని ఆయన పిలుపునిచ్చారు.
అవినీతికి అడ్డాగా మారిన మరో కీలక విభాగం రిజిస్ట్రేషన్ కార్యాలయాలపైనా అనిరుధ్ రెడ్డి తీవ్ర స్థాయిలో ధ్వజమెత్తారు. అక్కడ పనిచేసే డాక్యుమెంట్ రైటర్లు అక్రమ వసూళ్ల ద్వారా రోజుకు లక్ష నుండి 2 లక్షల వరకు సంపాదిస్తున్నారని సంచలన ఆరోపణలు చేశారు. సామాన్యుడి ఆస్తి రిజిస్ట్రేషన్ ప్రక్రియను ఆసరాగా చేసుకుని సాగుతున్న ఈ దోపిడీని అరికట్టాల్సిన అవసరం ఉందని, ఇందులో మీడియా కీలక పాత్ర పోషించాలని కోరారు.
ప్రజాపాలన, పారదర్శకత నినాదాలతో అధికారంలోకి వచ్చిన కాంగ్రెస్ ప్రభుత్వానికి, సొంత పార్టీ ఎమ్మెల్యే వ్యాఖ్యలు ఒక రకంగా ఇబ్బందికరంగా మారినప్పటికీ, మరోవైపు వాస్తవ పరిస్థితులను అద్దం పడుతున్నాయి. ఎమ్మెల్యే స్థాయి వ్యక్తే అధికారుల అవినీతిపై నిస్సహాయత వ్యక్తం చేయడం చూస్తుంటే, కింది స్థాయిలో బ్యూరోక్రసీపై ప్రభుత్వానికి పట్టు సడలుతోందా అనే సందేహాలు కలుగుతున్నాయి. ఇప్పటికైనా ప్రభుత్వ పెద్దలు మేల్కొని, కమీషన్ల దందాకు, లంచగొండితనానికి అడ్డుకట్ట వేయకపోతే, క్షేత్రస్థాయిలో ప్రభుత్వ ప్రతిష్ఠ మరింత దిగజారే ప్రమాదం ఉందని రాజకీయ విశ్లేషకులు భావిస్తున్నారు. నిజాన్ని నిర్భయంగా రాసి వ్యవస్థను ప్రక్షాళన చేయాలన్న ఎమ్మెల్యే పిలుపుపై అటు మీడియా, ఇటు ప్రభుత్వం ఏ విధంగా స్పందిస్తుందో వేచి చూడాలి.







