గొప్ప నేత, కఠినమైన నాయకుడు అంటూ మోదీపై ట్రంప్ మళ్లీ ప్రశంసలు
అమెరికా అధ్యక్షుడు ట్రంప్ భారత ప్రధాని నరేంద్ర మోదీపై ప్రశంసలు కురిపించారు. మోదీ గొప్ప నాయకుడని, అయితే.. అవసరమైన సందర్భాల్లో మాత్రం చాలా కఠినంగానే వ్యవహరిస్తారని చెప్పుకొచ్చారు. ఫిలిప్పీన్స్ రాజధాని మనీలాలో జరుగుతున్న క్వాడ్ సదస్సు వేదికగా ట్రంప్ ఈ వ్యాఖ్యలు చేశారు.
అంతేకాకుండా ప్రపంచ వ్యాప్తంగా అందరూ మోదీని ఎంతగానో గౌరవిస్తారని కూడా చెప్పుకొచ్చారు. ప్రధాని మోదీ తనకు మంచి మిత్రుడని, ఒక “గొప్ప నాయకుడు” అని, “ప్రపంచవ్యాప్తంగా అందరిచేత ఎంతో గౌరవించబడే వ్యక్తి” అని పునరుద్ఘాటించారు. ప్రధాని మోదీపై అమెరికా అధ్యక్షుడు ప్రశంసలు కురిపించడం ఇదే మొదటిసారి కాదు. ఈ ఏడాది ప్రారంభంలో ‘యాక్సియోస్’ (Axios) కు ఇచ్చిన ఇంటర్వ్యూలో కూడా ఆయన మోదీని “గొప్ప నాయకుడు”, “చాలా కఠినమైన/దృఢమైన వ్యక్తి” (very tough cookie) అని, తాను అత్యంత అభిమానించే ప్రపంచ నాయకులలో ఒకరని అభివర్ణించారు.
జూన్లో జరిగిన ఆ ఇంటర్వ్యూలో భారతదేశానికి రాజకీయ స్థిరత్వాన్ని తీసుకువచ్చిన నాయకుడికి ఉదాహరణగా ప్రధాని మోదీని పేర్కొంటూ ట్రంప్ ఇలా అన్నారు: “నా జీవితమంతా నేను భారతదేశాన్ని గమనిస్తూనే ఉన్నాను, అక్కడ ప్రభుత్వాలు నిరంతరం మారుతూ ఉండేవి. ఎవరో ఒకరు వచ్చేవారు, ఆరు నెలలో లేదా ఏడాదో ఉండేవారు. ఆ తర్వాత అకస్మాత్తుగా ప్రధానమంత్రి మోదీ అధికారంలోకి వచ్చారు. ఆయన 12 ఏళ్లకు పైగా చాలా దృఢంగా ఆ పదవిలో కొనసాగుతున్నారు.”
ఫిలిప్పీన్స్ ఈ ఏడాది ఆగ్నేయాసియా దేశాల కూటమి (ASEAN) వార్షిక సదస్సుతో పాటు, 2024 తర్వాత జరుగుతున్న మొదటి క్వాడ్ శిఖరాగ్ర సదస్సుకు ఆతిథ్యం ఇస్తోంది. చివరిసారిగా 2024లో అమెరికాలో జరిగిన క్వాడ్ దేశాధినేతల ప్రత్యక్ష సదస్సుకు అప్పటి అమెరికా అధ్యక్షుడు జో బైడెన్ ఆతిథ్యం ఇచ్చారు. క్వాడ్ కూటమిలో భారత్, అమెరికా, జపాన్, ఆస్ట్రేలియా దేశాలు సభ్యులుగా ఉన్నాయి.






