విజయవాడ ఉత్సవ్ కు తలపతి విజయ్..?

తమిళనాడు రాజకీయాల్లో సరికొత్త సంచలనం సృష్టిస్తూ.. తమిళగ వెట్రి కజగం(TVK) పార్టీని స్థాపించి, ప్రస్తుతం తమిళనాడు ముఖ్యమంత్రిగా బాధ్యతలు నిర్వర్తిస్తున్న స్టార్ హీరో తలపతి విజయ్(CM Vijay) విజయవాడకు రాబోతున్నారంటూ సోషల్ మీడియా వేదికగా ఒక ఆసక్తికర ప్రచారం జోరుగా సాగుతోంది. బెజవాడలో అత్యంత ప్రతిష్టాత్మకంగా నిర్వహించబోయే విజయవాడ ఉత్సవ్ 2.0 వేడుకల్లో ఆయన ముఖ్య అతిథిగా పాల్గొనే అవకాశం ఉందనే సమాచారం నెట్టింట విపరీతంగా హల్చల్ చేస్తోంది. తెలుగు రాష్ట్రాల్లోనూ విజయ్‌కు భారీగా ఫ్యాన్ బేస్ ఉండటంతో, ఈ వార్త విన్న అభిమానులు, సినీ, రాజకీయ వర్గాలలో ఆసక్తికర చర్చ జరుగుతోంది.

ఈ ఏడాది దసరా పండుగను పురస్కరించుకుని, అక్టోబర్ 11 నుండి అక్టోబర్ 20 వరకు పది రోజుల పాటు ఈ విజయవాడ ఉత్సవ్ 2.0 సంబరాలను అత్యంత వైభవంగా నిర్వహించడానికి నిర్వాహకులు భారీ ఏర్పాట్లు చేస్తున్నారు. దుర్గమ్మ శరన్నవరాత్రుల వేళ బెజవాడ అంతా ఆధ్యాత్మిక, సాంస్కృతిక శోభతో విరాజిల్లుతున్న తరుణంలో.. ఈ వేడుకలకు గ్లామర్, పొలిటికల్ టచ్ ఇవ్వడానికి తమిళనాడు సీఎం విజయ్‌ను ఆహ్వానించినట్లు నెటిజన్లు పోస్టులు పెడుతున్నారు. ఒకవేళ విజయ్ నిజంగానే వస్తే.. బెజవాడ కనకదుర్గమ్మను దర్శించుకోవడంతో పాటు ఈ ఉత్సవాల్లో పాల్గొంటారని ప్రచారం సాగుతోంది.

అయితే, ఈ ప్రచారంపై ఇప్పటివరకు తమిళనాడు ముఖ్యమంత్రి కార్యాలయం నుండి గానీ, లేదా విజయవాడ ఉత్సవ్ నిర్వాహక కమిటీ నుండి గానీ ఎలాంటి అధికారిక ప్రకటన లేదా ధృవీకరణ వెలువడలేదు. విజయ్ ప్రస్తుతం ముఖ్యమంత్రిగా షెడ్యూల్‌తో బిజీగా ఉన్నందున.. ఇది కేవలం అభిమానులు, సోషల్ మీడియా వర్గాలు సృష్టించిన బజ్ మాత్రమేనా, లేక నిజంగానే ఆయన వచ్చే అవకాశాలు ఉన్నాయా అనేది తెలియాలంటే నిర్వాహకులు క్లారిటీ ఇచ్చే వరకు వేచి చూడాల్సిందే. ఒకవేళ ఈ పర్యటన ఖరారైతే మాత్రం ఏపీ రాజకీయాల్లోనూ, సినీ వర్గాల్లోనూ ఇది ఒక పెద్ద సంచలనంగా మారడం ఖాయం.