2029పై ఇప్పటినుంచే ఫోకస్ పెట్టిన చంద్రబాబు.. రిపీటెడ్ విక్టరీ కోసం టీడీపీ మాస్టర్ ప్లాన్..

ఆంధ్రప్రదేశ్ (Andhra Pradesh) రాజకీయాల్లో వరుస విజయాలు సాధించడం ఎంత పెద్ద పార్టీకి అయినా పెద్ద సవాలుగా మారింది. ముఖ్యంగా తెలుగుదేశం పార్టీ (Telugu Desam Party) చరిత్రను పరిశీలిస్తే ఒకసారి అధికారంలోకి వచ్చిన తర్వాత అదే జోష్‌ను మరో ఎన్నికల్లో కొనసాగించడం చాలా కష్టంగా మారిందనే విషయం స్పష్టంగా కనిపిస్తుంది. పార్టీ వ్యవస్థాపకులు స్వర్గీయ నందమూరి తారక రామారావు (Nandamuri Taraka Rama Rao) నాయకత్వంలో 1983లో టీడీపీ అధికారంలోకి వచ్చి చరిత్ర సృష్టించింది. అనంతరం 1985 మధ్యంతర ఎన్నికల్లో కూడా ప్రజలు టీడీపీకి మరోసారి అండగా నిలిచారు. అయితే 1989 ఎన్నికల్లో మాత్రం పార్టీకి ఎదురుదెబ్బ తగిలింది.

తర్వాత కొన్ని సంవత్సరాల విరామం అనంతరం 1994లో టీడీపీ మళ్లీ అధికారంలోకి వచ్చింది. ఆ తర్వాత నారా చంద్రబాబు నాయుడు (Nara Chandrababu Naidu) నాయకత్వంలో 1999 ఎన్నికల్లో పార్టీ విజయం సాధించింది. కానీ ఆ విజయాన్ని 2004లో కొనసాగించలేకపోయింది. 2009లో కూడా పార్టీ ఓటమి చవిచూడాల్సి వచ్చింది. ఇదే పరిస్థితి విభజన తర్వాత ఏర్పడిన ఆంధ్రప్రదేశ్ రాజకీయాల్లో కూడా కనిపించింది.

2014లో టీడీపీ ఘన విజయం సాధించి అధికారంలోకి వచ్చినా, 2019 ఎన్నికల నాటికి పార్టీ తీవ్ర పరాజయాన్ని ఎదుర్కొంది. కేవలం 23 అసెంబ్లీ స్థానాలకు మాత్రమే పరిమితం కావడం పార్టీకి పెద్ద షాక్‌గా మారింది. అయితే ఆ తర్వాత అయిదేళ్ల పాటు ప్రజా సమస్యలపై పోరాటాలు చేస్తూ క్యాడర్‌ను కాపాడుకున్న టీడీపీ, 2024 ఎన్నికల్లో భారీ విజయాన్ని నమోదు చేసింది. కూటమిలో భాగంగా పోటీ చేసినప్పటికీ, టీడీపీకి వచ్చిన సీట్లు , ఓటు శాతం ప్రత్యేక చర్చకు దారితీశాయి. పార్టీ పోటీ చేసిన 144 స్థానాల్లో 135 చోట్ల విజయం సాధించడం రాజకీయంగా పెద్ద అచీవ్‌మెంట్‌గా భావిస్తున్నారు.

ఇప్పుడు పార్టీ దృష్టి మొత్తం 2029 ఎన్నికలపై ఉందనే చర్చ రాజకీయ వర్గాల్లో వినిపిస్తోంది. మహానాడు (Mahanadu) వేదికగా ముఖ్యమంత్రి చంద్రబాబు నాయుడు పార్టీ శ్రేణులకు ఇదే విషయాన్ని స్పష్టంగా చెప్పారు. 2024లో వచ్చిన విజయాన్ని 2029లో కూడా కొనసాగించాలని, అందుకోసం ఇప్పటి నుంచే ప్రతి కార్యకర్త కష్టపడాలని ఆయన పిలుపునిచ్చారు. స్థానిక ఎన్నికల నుంచి ప్రతి ఎన్నికను సీరియస్‌గా తీసుకోవాలని సూచించారు.

అభివృద్ధి ,సంక్షేమాన్ని సమతూకంగా అమలు చేస్తూ ప్రజల విశ్వాసాన్ని నిలబెట్టుకోవాలనే దిశగా టీడీపీ ముందుకు వెళ్తోందని పార్టీ నేతలు చెబుతున్నారు. అయితే ఆంధ్రప్రదేశ్‌లో ప్రతి ఎన్నికలో మార్పు కోరుకునే ఓటర్ల ధోరణి ఎప్పటి నుంచో కనిపిస్తోంది. అధికారంలో ఉన్న పార్టీ ఎన్ని మంచి పనులు చేసినా, తర్వాతి ఎన్నికల్లో ప్రతిపక్షానికి అవకాశం ఇవ్వడం ఇక్కడి రాజకీయాల్లో తరచూ కనిపించే అంశంగా మారింది. ఈ పరిస్థితుల్లో 2029లో టీడీపీ మళ్లీ గెలిస్తే అది సాధారణ విజయం కాదు, రాష్ట్ర రాజకీయ చరిత్రలో కొత్త అధ్యాయంగా నిలుస్తుందని విశ్లేషకులు భావిస్తున్నారు. అందుకే పార్టీ నాయకత్వం ఇప్పటి నుంచే క్యాడర్‌ను అలర్ట్ చేస్తూ ముందుకు తీసుకెళ్లే ప్రయత్నం చేస్తోంది.