YCP: ఆచరణలో విఫలమైన కూటమి హామీలు..వైసీపీ అధికార ప్రతినిధి శ్యామల

ఆంధ్రప్రదేశ్‌లో కూటమి ప్రభుత్వం ఏర్పాటు అయిన ఆరు నెలల తర్వాత కూడా ఎన్నికల హామీల అమలు జరగలేదని వైసీపీ (YCP) తీవ్రస్థాయిలో విమర్శలు గుప్పించింది. ఈ సందర్భంలో పార్టీ అధ్యక్షుడు వైఎస్ జగన్ (Jagan) సోషల్ మీడియాలో హామీలపై విస్తృతమైన ట్వీట్ చేశారు. అలాగే వైసీపీ అధికార ప్రతినిధి శ్యామల (Shyamala) మీడియా సమావేశంలో కూటమి ప్రభుత్వంపై ఆగ్రహం వ్యక్తం చేశారు. డిప్యూటీ సీఎం పవన్ కల్యాణ్ (Deputy cm Pawan Kalyan) చేసిన “సీజ్ ద షిప్” (Seize the ship) వ్యాఖ్యలను సూచిస్తూ, “మీ హామీలను సీజ్ చేయాలని” తీవ్ర విమర్శలు చేశారు.

ఎన్నికల్లో ఇచ్చిన హామీలను నెరవేర్చడంలో విఫలమైన కూటమి నేతలపై 420 కేసులు పెట్టాలని శ్యామల డిమాండ్ చేశారు. ముఖ్యంగా చంద్రబాబు నాయుడును టార్గెట్ చేస్తూ, ఎన్నికల సమయంలో ఆయన చేసిన మొదటి సంతకాలు కూడా అమలు కాని పరిస్థితి ఏర్పడిందని అన్నారు. మహిళల కోసం ప్రకటించిన పథకాలను అమలు చేయకపోవడం ద్వారా ఆడబిడ్డలను మోసం చేశారని, తక్షణమే క్షమాపణ చెప్పాలని శ్యామల స్పష్టం చేశారు.

సూపర్ సిక్స్ (super six) పేరుతో చంద్రబాబు, పవన్ కల్యాణ్ సహా కూటమి నేతలు ఒకే పత్రంపై సంతకాలు పెట్టి హామీలు ఇచ్చినప్పటికీ, ఇప్పుడు వాటి అమలు లేకపోవడం ప్రజలను తీవ్రంగా నొప్పించిందన్నారు. “మీ సంతకాలకు విలువ లేదా?” అంటూ శ్యామల ప్రశ్నించారు. ఆడబిడ్డ నిధి కింద 18-59 ఏళ్ల మహిళలకు నెలకు రూ.1500 ఇవ్వాలని ఎన్నికల హామీ ఇచ్చిన కూటమి, ఆ హామీని నిలబెట్టుకోలేకపోయిందని విమర్శించారు. ఈ పథకం అమలుకు ఏడాదికి రూ.37,313 కోట్లు అవసరం అవుతుందని, అలాగే తల్లికి వందనం కింద రూ.12,450 కోట్లు అవసరం అవుతుందని గుర్తు చేశారు. కానీ, ఈ పథకాలు ఆచరణలోకి రాకపోవడం మహిళల్లో నిరాశ కలిగించిందన్నారు.

అదేవిధంగా, జగన్ హయాంలో అమలు చేసిన పథకాలను నిలిపివేయడం కూటమి ప్రభుత్వ అసమర్థతకు నిదర్శనమని శ్యామల పేర్కొన్నారు. ఎన్నికల సమయంలో సాధ్యం కాని హామీలను ఇచ్చి ప్రజలను మోసం చేసిన కూటమి ఇప్పుడు ప్రజాసమస్యలపై మౌనం పాటిస్తోందని ఆరోపించారు. “ఏరు దాటిన తర్వాత తెప్ప తగలేయడం అంటే ఇదే,” అని శ్యామల వ్యాఖ్యానించారు. మహిళల సంక్షేమం పేరుతో హామీలిచ్చిన కూటమి ప్రభుత్వం, వాటిని అమలు చేయడంలో విఫలమవ్వడమే కాదు, ప్రజల నమ్మకాన్ని కూడా కోల్పోయిందని శ్యామల తీవ్రంగా విమర్శించారు.