అగ్రరాజ్యంలో టీకా పంపిణీ ప్రారంభం
- Published By: techteam
- December 14, 2020 / 07:14 PM IST
కరోనాతో విలవిలలాడుతున్న అమెరికాలో కొవిడ్‍ టీకా పంపిణీ ప్రారంభమైంది. దేశంలో ఫైజర్‍ వ్యాక్సిన్‍ తొలి డోసుల పంపిణీకి అన్ని ఏర్పాట్లు చేసిన అధికారులు, టీకా తొలి డోసును ఓ నర్సుకు అందించారు. దీంతో క్వీన్స్లోని లాంగ్‍ ఐలాండ్‍ యూదు మెడికల్‍ క్రిటికల్‍ కేర్‍లో నర్సుగా పనిచేస్తున్న సాండ్రా లిండ్సే అగ్రరాజ్యంలో తొలి టీకా పొందిన వ్యక్తిగా నిలిచారు. టీకా పొందిన సందర్భంగా ఆమె ఆనందం వ్యక్తం చేశారు. ఈ టీకాతో ఉపశమనం కలుగుతుందని విశ్వాసం వ్యక్తం చేశారు.
వ్యాక్సిన్‍ రాకతో అమెరికా చరిత్రలో బాధకరమైన సమయం ముగింపునకు దీని నాందిగా భావిస్తున్నానన్నారు. టీకా సురక్షితమైందేనని ప్రజల్లో విశ్వాసం కలిగించాల్సిన అవసరం ఉందన్నారు. ప్రజలు ఇంకా మాస్క్లు ధరించడం, భౌతికదూరం పాటించడంతో పాటు కొవిడ్‍ వ్యాక్సిన్‍ ప్రతిఒక్కరూ వేసుకొనేలా ప్రోత్సహించాలని ఆమె కోరారు. అత్యవసర వినియోగానికి ఫైజర్‍ టీకాకు ఫుడ్‍ అండ్‍ డ్రగ్‍ అడ్మినిస్ట్రేషన్‍ అనుమతి ఇవ్వడంతో అదికారులు టీకా పంపిణీ ప్రారంభించారు. ఈ సందర్భంగా ఫైజర్‍ సీఈవో అల్బెర్ట్ బోర్లా మాట్లాడుతూ తాను టీకా తీసుకుంటానని తెలిపారు. సీఈవో కూడా వ్యాక్సిన్‍ వేయించుకుంటే దానిపై ప్రజల్లో మరింత విశ్వాసం పెరుగుతుందన్నారు.
