రిజిష్టర్ లో పేరు ఉంటేనే కోవిడ్ వ్యాక్సిన్
- Published By: techteam
- January 4, 2021 / 09:12 PM IST
కరోనా నుంచి రక్షణ కోసం వ్యాక్సిన్ వేసుకోవాలంటే ముందుగా కేందప్రభుత్వం నిర్దేశించిన విధానాల ప్రకారం పేర్లను నమోదు చేసుకోవాలి. అందులో పేర్లు ఉన్నవారికే వ్యాక్సిన్ వేస్తారు. పేరు నమోదు చేయకుండా వ్యాక్సిన్ కేంద్రానికి వెళ్ళినా వ్యాక్సిన్ వేయరు. వ్యాక్సిన్ కోసం ప్రజలు ముందుగా రిజిస్టర్‍ చేసుకొనేందుకు కొ-విన్‍ అనే వెబ్‍సైట్‍ను కేంద్ర ప్రభుత్వం ప్రారంభించింది. త్వరలోనే మొబైల్‍ యాప్‍ను కూడా అందుబాటులోకి తేనున్నది. ఈ రెండు మార్గాల ద్వారా సామాన్యులు నేరుగా తమ పేర్లను ఇందులో రిజిస్టర్‍ చేసుకోవచ్చు. ముందుగా కొ-విన్‍ పోర్టల్‍ ఓపెన్‍ చేయగానే రిజిస్ట్రేషన్‍ అనే ఆప్షన్‍ వస్తుంది. అందులో ఆధార్‍ నంబర్‍ నమోదు చేయాలి. సరైన నంబర్‍ అయితే వెంటనే మీ పేరు, శాశ్వత చిరునామా తదితర వివరాలన్నీ అందులో కనిపిస్తాయి. ఆ వెంటనే ఆధార్‍ నంబర్‍తో నమోదై ఉన్న మొబైల్‍ నంబర్‍కు వన్‍ టైం పాస్‍వర్డ్ వస్తుంది. దానిని ఎంటర్‍ చేయాలి. ఆ తర్వాత ఫొటో గుర్తింపు కార్డును అప్‍లోడ్‍ చేయగానే రిజిస్ట్రేషన్‍ పూర్తయినట్టు చూపిస్తుంది.
ఆధార్‍ కార్డుపై ఉన్న చిరునామాలు లేనివారు ప్రస్తుతం నివసిస్తున్న చిరునామా, పుట్టిన తేదీలను స్వయంగా కూడా ఎంటర్‍ చేయవచ్చు. పూర్తి వివరాలు నమోదు చేసిన తర్వాత ‘డెమో అథెంటికేషన్‍’ అనే ఆప్షన్‍ను ఎంపికచేసుకోవాలి. అన్ని వివరాలు సరిగ్గా ఉంటే ఆకుపచ్చ టిక్‍తో రిజిస్ట్రేషన్‍ పక్రియ పూర్తయినట్టు చూపిస్తుంది. రిజిస్ట్రేషన్‍ పక్రియ పూర్తికాగానే ఎప్పుడు? ఎక్కడ? మీకు వ్యాక్సిన్ వేస్తారు అనే వివరాలతో కూడిన సందేశం మీ మొబైల్‍ నంబర్‍కు వస్తుంది. కొ-విన్‍లో రిజిస్టర్‍ చేసుకున్నవారికి మాత్రమే వ్యాక్సిన్ ఇస్తారు. నేరుగా వ్యాక్సిన్ కేంద్రానికి వెళ్లినా వేయరు.
కొ-విన్‍లో పేరు ఎప్పుడు నమోదు చేసుకోవాలి?
ప్రస్తుతం ఈ సాఫ్ట్ వెర్ లో ఫ్రంట్‍లైన్‍ వారియర్స్ వివరాలు మాత్రమే నమోదు చేస్తున్నారు. సామాన్య ప్రజల వివరాల నమోదుపై త్వరలో అధికారికంగా ప్రకటిస్తారు. ఆ తర్వాత ఎవరికి వారు ఈ పోర్టల్‍ లేదా యాప్‍లో పేరును స్వచ్ఛందంగా నమోదు చేసుకోవాలి. దానిని బట్టి వ్యాక్సిన్ వేసే సమయాన్ని కేటాయిస్తారు. కాగా ఏయే కేంద్రాల్లో టీకాలు ఎప్పుడు వేయాలి? ఎన్ని సెషన్లలో ఎంతమందికి వేయాలన్న అంశాలను జిల్లా అధికార యంత్రాంగం నిర్ణయిస్తుంది. జిల్లా ఇమ్యునైజేషన్‍ అధికారి సాయంతో కలెక్టర్‍ వ్యాక్సిన్ సెషన్‍ను ఖరారు చేస్తారు. వ్యాక్సిన్ కేంద్రాలు, వ్యాక్సిన్ వేసే సిబ్బంది, సూపర్‍వైజర్లు, వ్యాక్సిన్ వేసుకొనేవారు ఎవరు అనే విషయాలపై తుది నిర్ణయం కలెక్టర్‍దే.
వ్యాక్సిన్ కేంద్రం ఎలా ఉంటుంది?
ప్రభుత్వ, ప్రైవేటు దవాఖానలు, ప్రాథమిక ఆరోగ్య కేంద్రాలను వ్యాక్సిన్ వేసే సెషన్‍ సైట్‍లుగా ఉపయోగిస్తారు. మారుమూల ప్రాంతాల్లో అయితే పాఠశాలలు, కమ్యూనిటీ హాళ్లను కూడా ఇందుకోసం వాడుకొంటారు. వ్యాక్సిన్ కేంద్రంలో మూడు గదులు ఉంటాయి. 1. వెయిటింగ్‍ రూం, 2. వ్యాక్సినేషన్‍ రూం, 3. అబ్జర్వేషన్‍ రూంలు ఉంటాయి.
టైమ్‍ స్లాట్‍
వ్యాక్సిన్ కోసం వచ్చే జనాలు కేంద్రాల వద్ద గుమిగూడకుండా సరికొత్త పద్ధతిని అందుబాటులోకి తీసుకురానున్నారు. ఇందుకోసం హైదరాబాద్‍ వైద్య, ఆరోగ్యశాఖ అధికారులు టైమ్‍ స్లాట్‍ కేటాయించనున్నారు. ఇందులో భాగంగా వ్యాక్సిన్ వేసుకోవాలనుకునే వారి నివాస స్థలానికి దగ్గరలో ఉన్న వ్యాక్సిన్ కేంద్రంలోనే వ్యాక్సినేషన్‍కు అనుమతివ్వనున్నారు. ఈ క్రమంలో వారి నివాస స్థలానికి సంబంధించిన పిన్‍కోడ్‍, వ్యాక్సిన్ కేంద్రం కోడ్‍, చిరునామాతో పాటు వ్యాక్సిన్ వేసే తేదీ, సమయంతో కూడిన స్లాట్‍ వివరాలను మెసేజ్‍ రూపంలో పంపించనున్నారు. మెసేజ్‍ వచ్చిన వారు అందులో పేర్కొన్న నిర్ణీత తేదీ, సమయానికి వ్యాక్సిన్ కేంద్రానికి వెళ్లి వ్యాక్సిన్ వేసుకోవాల్సి ఉంటుంది.
తెలంగాణలో మరో 10రోజుల్లో వ్యాక్సినేషన్‍ ప్రారంభం
కాగా తెలంగాణలో కోవిడ్ వ్యాక్సిన్ ఇచ్చేందుకు ఏర్పాట్లు పూర్తయ్యాయని తెలంగాణ రాష్ట్ర ప్రజారోగ్య సంచాలకులు డాక్టర్‍ శ్రీనివాస్‍ రావు పేర్కొన్నారు. టీకాల పంపిణీ కోసం గురు, శుక్రవారాల్లో 1,200 కేంద్రాల్లో డ్రై రన్‍ నిర్వహిస్తామని తెలిపారు. కొ-విన్‍ పోర్టల్‍లో రిజిస్టర్‍ చేసుకున్న వారికే టీకా వేస్తామని పేర్కొన్నారు. వారానికి నాలుగు రోజులు కొవిడ్‍ టీకాల పంపిణీ చేపడుతామన్నారు. బుధ, శనివారాల్లో మిగిలిన టీకాల పంపిణీ ఉంటుందన్నారు. వందకు పైగా ప్రయివేటు ఆస్పత్రుల్లో టీకా పంపిణీ కేంద్రాలు ఏర్పాటు చేస్తామని చెప్పారు. పది రోజుల్లో వ్యాక్సినేషన్‍ ప్రారంభమయ్యే అవకాశం ఉందని డాక్టర్‍ శ్రీనివాస్‍ రావు స్పష్టం చేశారు.
