మేన‌ల్లుడు సాయి ధరమ్ తేజ్ తో ప‌వ‌న్ క‌ళ్యాణ్ మూవీ : స‌ముద్ర ఖ‌ని డైరెక్ట్ చేసి నటించిన ‘వినోద‌య సీత‌మ్’ చిత్రం రీమేక్?

ప‌వ‌ర్ స్టార్ ప‌వ‌న్ క‌ళ్యాణ్ ‘వ‌కీల్ సాబ్‌’తో రీ ఎంట్రీ ఇచ్చిన త‌ర్వాత సినిమాలు చేయ‌డంలో బిజీగా మారారు. ఒక వైపు రాజ‌కీయాలు.. మ‌రో వైపు సినిమాల‌ను బ్యాలెన్స్ చేసుకుంటూ వ‌స్తున్నారాయ‌న‌. ఇప్పుడు వ‌ప‌న్ క‌ళ్యాణ్ ‘భీమ్లా నాయ‌క్‌’తో సంద‌డి చేయ‌డానికి సిద్ధంగా ఉన్నారు. ఇది కాకుండా.. క్రిష్ ద‌ర్శ‌క‌త్వంలో హ‌రి హ‌ర వీర మ‌ల్లు సినిమాను పూర్తి చేసే ప‌నిలో ఆయ‌న బిజీగా ఉన్నారు. అలాగే హ‌రీష్ శంక‌ర్ ద‌ర్శ‌క‌త్వంలో భ‌వ‌దీయుడు భ‌గ‌త్ సింగ్‌, సురేంద‌ర్ రెడ్డితో చేయాల్సిన సినిమాలు ట్రాక్ ఎక్కాల్సి ఉన్నాయి. ఇంత బిజీ షెడ్యూల్‌లోనూ ప‌వ‌న్ మ‌రో కొత్త సినిమా చేయడానికి ఆస‌క్తి చూపించ‌డ‌మే కాదు.. ఓకే అన్నారంటూ సినీ సర్కిల్స్ టాక్‌. పైగా  సాయి ధ‌ర‌మ్ తేజ్ కాంబినేష‌న్‌లో చేస్తున్నట్లు తెలుస్తోంది.  

త‌మిళ ద‌ర్శ‌కుడు, న‌టుడు అయిన సముద్ర ఖ‌ని ఈ చిత్రాన్ని తెర‌కెక్కించ‌బోతున్నార‌ట‌. ఇక్క‌డ ప్ర‌స్తావించాల్సిన విష‌యం ఏంటంటే.. ప‌వ‌న్ క‌ళ్యాణ్ కొత్త‌గా ఓ రీమేక్ సినిమా చేయ‌డానికి ఓకే చెప్పార‌ట‌. అందులో మ‌రో హీరో కూడా ఉంటార‌ని, ఆ హీరోగా పాత్ర‌లో ప‌వ‌న్ క‌ళ్యాణ్ మేన‌ల్లుడు.. హీరో సాయిధ‌ర‌మ్ తేజ్ న‌టించ‌బోతున్నార‌ని అంటున్నారు. ఇంత‌కీ ప‌వ‌న్ క‌ళ్యాణ్ న‌టించ‌డానికి ఆస‌క్తి చూపిస్తోన్న రీమేక్ ఏదో తెలుసా! త‌మిళ చిత్రం ‘వినోద‌య సీత‌మ్’. న‌టుడు, ద‌ర్శ‌కుడు  స‌ముద్ర ఖ‌ని ఈ సినిమాను డైరెక్ట్ చేస్తూ న‌టించారు. తెలుగులో ఆయ‌నే డైరెక్ట్ చేస్తార‌ట‌.

త‌మిళంలో స‌ముద్ర ఖ‌ని చేసిన పాత్ర‌లో ప‌వ‌న్ క‌ళ్యాణ్ న‌టిస్తార‌నేది స‌మాచారం. వినోద‌య సీత‌మ్‌లో తంబి రామ‌స్వామి, స‌ముద్ర ఖ‌ని న‌టించారు. ఇందులో సముద్ర‌ఖ‌ని దేవుడి పాత్ర‌లో క‌నిపిస్తారు. ఓ మనిషికి చావు గురించి ముందే చెప్పిన దేవుడు త‌న బ‌రువు బాధ్య‌త‌ల‌ను ముందుగానే తీర్చేసుకోమంటే త‌ను ప‌డే టెన్ష‌న్ ఎలా ఉంటుంద‌నేదే క‌థాంశం అని టాక్‌. మ‌రి తెలుగులో ప‌వ‌న్ క‌ళ్యాణ్ ఏ పాత్ర‌లో న‌టిస్తారు.. సాయి ధ‌ర‌మ్ తేజ్ ఏపాత్ర‌లో చేస్తార‌నేది తెలియాలంటే వెయిటింగ్ త‌ప్ప‌దు. రిప‌బ్లిక్ విడుద‌లకు ముందు గ‌త ఏడాది రోడ్డు ప్ర‌మాదంలో గాయ‌ప‌డిన సాయిధ‌ర‌మ్ తేజ్ ఇప్పుడు పూర్తిగా కోలుకుని ఇప్పుడు ఆయ‌న బివిఎస్ఎన్ ప్ర‌సాద్ నిర్మాత‌గా ఓ థ్రిల్ల‌ర్ సినిమాలో న‌టిస్తోన్న విషయం తెలిసిందే!