ఎన్‌పిఎస్ ఖాతాదారులకు గుడ్ న్యూస్.. ఇకపై పెన్షన్ కాదు, ‘జీతం’ వస్తుంది.. ఎలాగంటే?

NPS: దేశంలో పదవీ విరమణ చేసిన (రిటైర్డ్) ఉద్యోగులకు ఆర్థిక వెసులుబాటు కల్పించే దిశగా ‘పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీ’ (PFRDA) జాతీయ పింఛను వ్యవస్థ (NPS)లో కీలక సంస్కరణలను ప్రవేశపెట్టింది. పాత ‘స్థిర పింఛను’ విధానానికి స్వస్తి పలుకుతూ, మరింత సరళమైన ‘కొత్త పదవీ విరమణ ఆదాయ పథకం’ (RIS)ను ప్రారంభించింది. ఈ మార్పుల ద్వారా రిటైర్ అయిన వారు తమ నిధిని పెట్టుబడిగా ఉంచుకుంటూనే, ప్రతి నెలా జీతం లాంటి క్రమబద్ధమైన ఆదాయాన్ని పొందే అవకాశం లభించనుంది.

పాత నిబంధనలు..
గతంలో ఎన్‌పిఎస్ చందాదారులు పదవీ విరమణ పొందినప్పుడు, వారి మొత్తం నిధి (కార్పస్)లో గరిష్టంగా 60 శాతం మొత్తాన్ని మాత్రమే పన్ను రహితంగా విత్‌డ్రా చేసుకునే వీలుండేది. మిగిలిన 40 శాతాన్ని తప్పనిసరిగా ఇన్సూరెన్స్ కంపెనీల ‘యాన్యుటీ ప్లాన్’లో పెట్టుబడి పెట్టాల్సి వచ్చేది. ఉదాహరణకు ₹1 కోటి నిధి ఉంటే.. ₹40 లక్షలు యాన్యుటీలో లాక్ అయిపోయి, నెలకు కేవలం ₹20,000 నుండి ₹25,000 వరకు మాత్రమే స్థిర పెన్షన్ వచ్చేది. దీనివల్ల ద్రవ్యోల్బణాన్ని తట్టుకోవడం మధ్యతరగతి వారికి కష్టంగా మారేది.

నూతన మార్పులు..

రివర్స్ SIP (క్రమబద్ధమైన ఏకమొత్త ఉపసంహరణ – SLW): కొత్త నియమాల ప్రకారం, పదవీ విరమణ చేసినవారు తమ 40 శాతం నిధిని ఒకేసారి లాక్ చేయాల్సిన అవసరం లేదు. మ్యూచువల్ ఫండ్స్‌లో ప్రతి నెలా పెట్టుబడి పెట్టే ఎస్‌ఐపీ తరహాలోనే, ఇందులో తమ నిధి నుండి ప్రతి నెలా రూ. 30,000 నుండి రూ. 50,000 వరకు క్రమబద్ధంగా విత్‌డ్రా (రివర్స్ SIP) చేసుకోవచ్చు. ఖాతాలో మిగిలి ఉన్న సొమ్ము మార్కెట్‌తో ముడిపడిన పెట్టుబడులలోనే కొనసాగుతుంది. దీనివల్ల మిగిలిన నిధి కూడా కాలక్రమేణా పెరుగుతూ వస్తుంది.

SPR , SUR పద్ధతులు: నిధి నుండి అతి త్వరగా ఎక్కువ మొత్తాన్ని విత్‌డ్రా చేసి నష్టపోకుండా ఉండేందుకు ‘సిస్టమాటిక్ పేఅవుట్ రేట్’ (SPR) వంటి పద్ధతులను తీసుకొచ్చారు. అలాగే వైద్య అత్యవసర పరిస్థితుల్లో యాన్యుటీని సరెండర్ చేసే నిబంధనలను కూడా సడలించారు.

ఎవరికి ఎక్కువ ప్రయోజనం?
ప్రైవేట్ రంగ ఉద్యోగులు, స్వయం ఉపాధి పొందుతున్న వారు, , ఇప్పటికే అద్దెలు లేదా ఈపీఎఫ్ (EPF) ద్వారా ఇతర ఆదాయ వనరులు ఉన్నవారికి ఈ సౌలభ్యం (Flexibility) ఎంతో సహాయపడుతుంది. భారతీయుల సగటు జీవితకాలం పెరుగుతున్న తరుణంలో, వృద్ధాప్య ఆరోగ్య ఖర్చులను, ద్రవ్యోల్బణాన్ని తట్టుకోవడానికి ఈ మార్కెట్ ఆధారిత నిరంతర వృద్ధి మోడల్ ఎంతగానో దోహదపడుతుంది.

రాబడులకు గ్యారెంటీ ఉండదు..
ఈ నూతన డ్రాడౌన్ విధానం మార్కెట్ హెచ్చుతగ్గులతో ముడిపడి ఉంటుంది. పాత పద్ధతిలా ఇందులో రాబడులకు ఎలాంటి గ్యారెంటీ ఉండదు. కాబట్టి చందాదారులు సరైన ఆర్థిక ప్రణాళికతో ఉపసంహరణలు చేసుకోకపోతే నిధి వేగంగా కరిగిపోయే ప్రమాదం కూడా ఉందని నిపుణులు హెచ్చరిస్తున్నారు.