అమిత్ షా ఫేక్ వీడియో కేస్.. ముగ్గురు టీ.కాంగ్రెస్‌ నేతల అరెస్టు..

కేంద్ర హోం మంత్రి అమిత్ షా ముస్లిం రిజర్వేషన్ కు సంబంధించి ఘాటుగా మాట్లాడిన ఓ ఫేక్ వీడియో వైరల్ అయిన విషయం తెలిసిందే. దీంతో రంగంలోకి దిగిన పోలీసులు మార్ఫింగ్ కేసు విచారణ విషయంలో తమ దూకుడు పెంచారు. ఈ నేపథ్యంలో ఈరోజు మరో ముగ్గురిని హైదరాబాదులో అదుపులోకి తీసుకున్నారు. అయితే ఈ ముగ్గురు తెలంగాణ కాంగ్రెస్ కు సంబంధించిన వ్యక్తులు కావడం గమనార్హం. తెలంగాణ కాంగ్రెస్ పార్టీ సోషల్ మీడియా ఇన్ఛార్జ్ మన్నె సతీష్‌ తో పాటు నవీన్, తస్లీమాను పోలీసులు తమ అదుపులోకి తీసుకున్నారు. అయితే తాజాగా ఈ అరెస్టులు తెలంగాణ బీజేపీ నేత ప్రేమేందర్ రెడ్డి ఇచ్చిన ఫిర్యాదు మేరకు జరుగుతున్నాయి అన్న విషయం వెలుగులోకి వచ్చింది. ఎస్సీ, ఎస్టీ, ఓబీసీల రిజర్వేషన్లు ఎత్తివేస్తామంటూ అమిత్ షా మాట్లాడినట్టుగా సృష్టించిన ఆ ఫేక్ వీడియో వైరల్ చేసిన విషయంలో తెలంగాణ ముఖ్యమంత్రి రేవంత్ రెడ్డికి కూడా నోటీసులు అందాయి. ఢిల్లీ పోలీసులకు రేవంత్ రెడ్డి ఈ విషయంలో స్పష్టత కూడా ఇచ్చారు. అయితే తాజా పరిణామాల దృష్ట్యా విషయం పైకి కనిపిస్తున్నంత సామాన్యంగా లేదు అన్ని అందరూ అభిప్రాయపడుతున్నారు.