ఆ ఘనత కేసీఆర్ దే : కేటీఆర్

పదేళ్లలో కేసీఆర్‌ హయాంలో జరిగిన ఉపాధి కల్పన తప్ప కాంగ్రెస్‌ హయాంలో కొత్తగా ఒరిగిందేమీ లేదని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ అన్నారు. ఈ సందర్భంగా ఆయన మీడియాతో మాట్లాడుతూ  95 శాతం ప్రభుత్వ ఉద్యోగాలు స్థానిక యువతకు మాత్రమే ఇస్తున్న రాష్ట్రాలు దేశంలో తెలంగాణ తప్ప వేరే ఏమైనా ఉన్నాయా? అని ప్రశ్నించారు. అటెండర్‌ మొదలు గ్రూప్‌ 1 ఉద్యోగాల వరకు 95 శాతం స్థానికులకే సాధించిన ఘనత కేసీఆర్‌ది మాత్రమే అన్నారు. 2014 నుంచి 2023 వరకు కేసీఆర్‌ ప్రభుత్వం 2,32,308 ఉద్యోగాల భర్తీకి అనుమతులు ఇచ్చినట్లు పేర్కొన్నారు. విశ్వవిద్యాలయాలకు ఉమ్మడి నియామక బోర్డు తలపెడితే అప్పటి గవర్నర్‌ అడ్డుపడ్డారని గుర్తు చేశారు. 30 వేల ఉద్యోగాలు భర్తీ చేశామని రేవంత్‌ రెడ్డి పచ్చి అబద్దాలు చెబుతున్నారని అన్నారు. కేసీఆర్‌ చేపట్టిన ఉద్యోగాలను కూడా తన ఖాతాలో వేసుకోవడం రేవంత్‌ రెడ్డి రాజకీయ దివాళాకోరుతనంగా అభివర్ణించారు. కాంగ్రెస్‌ పదేళ్లలో ఏడాదికి వెయ్యి ఉద్యోగాలు ఇస్తే,  కేసీఆర్‌ తొమ్మిదిన్నరేళ్లలో ఏడాదికి 19 వేల ఉద్యోగాలు ఇచ్చారని తెలిపారు. తెలంగాణ కంటే ఎక్కువ ఉద్యోగాలు ఏ రాష్ట్రంలో అయినా ఇచ్చినట్టు నిరూపిస్తే తన పదవికి రాజీనామా చేస్తానని కాంగ్రెస్‌, బీజేపీలకు సవాల్‌ విసిరారు.