Ponguru Narayana: అత్యంత సురక్షిత నగరం అమరావతి.. మంత్రి నారాయణ..

అమరావతి (Amaravati) రాజధాని అభివృద్ధి పనులపై మున్సిపల్ శాఖ మంత్రి పొంగూరు నారాయణ (Ponguru Narayana) స్పష్టతనిచ్చారు. రాజధాని ప్రాంతంలో మౌలిక వసతుల నిర్మాణం వేగంగా కొనసాగుతోంది. కొన్ని వర్గాలు కావాలనే అసత్య ప్రచారాలు చేస్తూ ప్రజల్లో సందేహాలు రేకెత్తించే ప్రయత్నం చేస్తున్నాయని, అలాంటి వదంతులను పక్కన పెట్టి ప్రజలు స్వయంగా వచ్చి అమరావతిలో జరుగుతున్న పురోగతిని పరిశీలించాలని మంత్రి పిలుపునిచ్చారు.

మంత్రి నారాయణ మాట్లాడుతూ అమరావతిని అత్యంత సురక్షిత నగరంగా తీర్చిదిద్దుతున్నామని చెప్పారు. కొండవీటి వాగు (Kondaveeti Vagu), పాలవాగు (Palavagu) ప్రాంతాల్లో మూడు రిజర్వాయర్ల నిర్మాణం పూర్తవుతుందనే ధీమా వ్యక్తం చేశారు. వాగులలోని అడ్డంకులను తొలగించిన తర్వాత, ఇకపై ఎలాంటి భారీ వర్షాలు కురిసినా నీరు నిలిచిపోవడం వంటి సమస్యలు ఎదురుకావని తెలిపారు.

భూ సమీకరణ అంశంపై వివరిస్తూ.. సీఆర్డీఏ (CRDA) పరిధిలో ఇంకా సుమారు 1,800 ఎకరాల భూములు సమీకరించాల్సి ఉందని పేర్కొన్నారు. రైతులు సహకరిస్తే వారికి మరింత లాభం కలుగుతుందని, అవసరమైతే ప్రభుత్వం నేరుగా భూసేకరణ మార్గంలోకి వెళ్ళవచ్చని ఆయన సూచించారు.

సీఎం క్యాంపు కార్యాలయంలో జరిగిన సీఆర్డీఏ 52వ సమావేశంలో అమరావతి నిర్మాణానికి సంబంధించిన అనేక అంశాలు ఆమోదం పొందాయని మంత్రి వివరించారు. ప్రస్తుతం సీఆర్డీఏ భవనం నిర్మాణం తుదిదశకు చేరిందని, ఈ నెలాఖరుకే పూర్తి అవుతుందని తెలిపారు. ఈ భవనం 3 లక్షల చదరపు అడుగుల విస్తీర్ణంలో నిర్మాణం జరుగుతుండగా, దానికి అనుబంధంగా మరో 1.60 లక్షల చదరపు అడుగుల కట్టడాలు కూడా కొనసాగుతున్నాయని తెలిపారు. రాబోయే దసరా పండుగ సందర్భంగా ఈ భవనాన్ని ప్రారంభించే కార్యక్రమాలు జరుగుతాయని ఆయన వెల్లడించారు.

2014 నుంచి 2019 మధ్య కాలంలో అమరావతి నిర్మాణం వేగంగా సాగిందని, కానీ తరువాతి ప్రభుత్వం పనులను నిలిపివేసిందని మంత్రి ఆరోపించారు. ఇప్పుడు మిగిలిన పనులను మళ్లీ టెండర్లు పిలిచి పూర్తిచేస్తున్నామని చెప్పారు. ప్రభుత్వ ఉద్యోగుల కోసం అమరావతిలో నిర్మిస్తున్న నివాస సముదాయాలు వచ్చే ఏడాది మార్చి నాటికి సిద్ధమవుతాయని తెలిపారు.

మూడేళ్లలో అమరావతి తొలి దశను పూర్తి చేయాలన్న లక్ష్యంతో ప్రభుత్వం ముందుకు సాగుతోందని నారాయణ తెలిపారు. రాజధాని పనులపై జరుగుతున్న నెగెటివ్ ప్రచారాలను ప్రజలు విశ్వసించవద్దని విజ్ఞప్తి చేశారు. “ఇక్కడ జరుగుతున్న అభివృద్ధిని ప్రత్యక్షంగా చూసి మాత్రమే మాట్లాడాలి. అమరావతి ప్రజల కలల నగరంగా తీర్చిదిద్దడానికి మేము కృషి చేస్తున్నాం,” అని మంత్రి నారాయణ స్పష్టం చేశారు.