Mahanadu: కడప గడ్డపై రెపరెపలాడిన తెలుగుదేశం జెండా… మహానాడు ఘనవిజయం

ఆంధ్రప్రదేశ్ రాజకీయ చరిత్రలో (AP Politics) ఒక సువర్ణాధ్యాయాన్ని లిఖించింది తెలుగుదేశం పార్టీ (TDP). కడప (Kadapa) జిల్లాలో తొలిసారి నిర్వహించిన మహానాడు (Mahanadu) అపూర్వ విజయాన్ని సాధించింది. వైఎస్ఆర్ కాంగ్రెస్ పార్టీ (YSRCP) అధినేత, మాజీ ముఖ్యమంత్రి వైఎస్ జగన్మోహన్ రెడ్డి (YS Jagan) సొంత గడ్డ కడపలో ఈ కార్యక్రమం సక్సెస్ అవుతుందా అనే సందేహాలను తెలుగుదేశం పార్టీ పటాపంచలు చేసింది. టీడీపీ అధినాయకత్వం, కార్యకర్తలు తమ అచంచలమైన కృషితో మహానాడును దిగ్విజయం చేసింది. మూడు రోజుల పాటు జరిగిన ఈ మహానాడు, టీడీపీ శ్రేణుల్లో ఉత్సాహాన్ని నింపడమే కాక, కడప జిల్లాలో పార్టీ బలాన్ని చాటిచెప్పింది.

తెలుగుదేశం పార్టీ స్థాపించిన 1982 నుంచి ప్రతి రెండేళ్లకోసారి మహానాడు నిర్వహించడం ఆనవాయితీగా వస్తోంది. అయితే కడపలో తొలిసారి ఈ కార్యక్రమం నిర్వహించడం విశేషం. గతంలో రెండు రోజుల పాటు జరిగే ఈ కార్యక్రమం, ఈ సారి మూడు రోజుల పాటు నిర్వహించబడింది. ఈ నిర్ణయం పార్టీ హైకమాండ్‌కు, స్థానిక నాయకులకు ఒక సవాలుగా మారింది. అయితే కడప జిల్లా టీడీపీ అధ్యక్షుడు రెడ్డెప్పగారి శ్రీనివాస రెడ్డి, కడప ఎమ్మెల్యే మాధవి రెడ్డి సహా ఉమ్మడి జిల్లా టీడీపీ నాయకులు దీనిని ప్రతిష్టాత్మకంగా తీసుకొని సక్సెస్ చేసి చూపించారు.

మొదటి రోజు వర్షం కొంత ఇబ్బంది కలిగించినప్పటికీ, సభా స్థలంలో ఏర్పాట్లు, నాయకుల పర్యవేక్షణ, కార్యకర్తల ఉత్సాహం కారణంగా ఎలాంటి అవాంతరాలు తలెత్తలేదు. మూడు రోజులూ వేలాది మంది కార్యకర్తలు, అభిమానులు కడపలో తిష్టవేసి, పార్టీ సత్తాను చాటారు. ముఖ్యంగా మూడో రోజు జరిగిన బహిరంగ సభకు జనం పెద్ద ఎత్తున తరలిరావడం విశేషం. చంద్రబాబు (Chandrababu), లోకేశ్ (Lokesh) మొదలు కడప మహానాడు ప్రాంగణంలోనే మూడు రోజులపాటు బస చేసి కేడర్ లో ఉత్తేజం నింపారు. మొదటి రోజు పార్టీ భవిష్యత్ వ్యూహాలు, రాష్ట్ర రాజకీయ పరిస్థితులపై చర్చలు జరిగాయి. రెండో రోజు కార్యకర్తల సమావేశాలు, నాయకుల ప్రసంగాలు ఆకర్షణీయంగా సాగాయి. మూడో రోజు బహిరంగ సభలో టీడీపీ అధ్యక్షుడు చంద్రబాబు ప్రజలను ఉద్దేశించి ఉర్రూతలూగించే ప్రసంగం చేశారు. ఆయన మాటలు కార్యకర్తల్లో కొత్త ఉత్తేజాన్ని నింపాయి.

కడప జిల్లా రాజకీయంగా వైఎస్ఆర్ కాంగ్రెస్ పార్టీకి కంచుకోటగా పరిగణించబడుతుంది. ఈ నేపథ్యంలో టీడీపీ ఇక్కడ మహానాడు నిర్వహించడం, దానిని విజయవంతం చేయడం రాజకీయ విశ్లేషకులను ఆశ్చర్యపరిచింది. పార్టీ హైకమాండ్ ఈ విజయంతో ఫుల్ జోష్‌లో ఉంది. కడప జిల్లా టీడీపీ నాయకులు, కార్యకర్తలు ఈ కార్యక్రమాన్ని సమర్థవంతంగా నిర్వహించడం ద్వారా జిల్లాలో తమ బలాన్ని నిరూపించారు. ఈ కార్యక్రమంలో పాల్గొన్న ప్రతి ఒక్కరూ తమ వంతు కృషి చేసి, మహానాడును ఒక చారిత్రక ఘట్టంగా మలిచారు. కడపలో మహానాడు విజయవంతం కావడం టీడీపీకి రాజకీయంగా ఒక బలమైన సందేశాన్ని ఇచ్చింది. వైఎస్ఆర్ కాంగ్రెస్ కంచుకోటగా భావించే ఈ జిల్లాలో పార్టీ బలాన్ని చాటడం ద్వారా, రాబోయే ఎన్నికల్లో టీడీపీ ఇక్కడ గట్టి పోటీ ఇస్తుందనే సంకేతాలు స్పష్టమయ్యాయి. పార్టీ హైకమాండ్ ఈ విజయంతో ఉత్సాహంగా ఉండగా, కార్యకర్తలు కూడా రాబోయే రోజుల్లో జిల్లాలో పార్టీని మరింత బలోపేతం చేయడానికి సిద్ధంగా ఉన్నామనే సంకేతాలిచ్చారు.