వీసీ పోస్టులను రూ.40-50 కోట్లకు అమ్మేవాళ్లు.. పంజాబ్ గవర్నర్ సంచలన వ్యాఖ్యలు

తమిళనాడు రాష్ట్రంలో యూనివర్సిటీల వైస్ ఛాన్సలర్ల పదవులను వేలం వేశారని, ఒక్కో పదవికి రూ.40 కోట్ల నుంచి రూ.50 కోట్ల వరకు వసూలు చేశారని ఆ రాష్ట్ర మాజీ గవర్నర్ సంచలన వ్యాఖ్యలు చేశారు. ప్రస్తుతం పంజాబ్​ గవర్నర్‌గా ఉన్న బన్వారీలాల్​ పురోహిత్.. శుక్రవారం నాడు ఓ మీడియా సమావేశంలో ఈ సంచలన వ్యాఖ్యలు చేశారు. “నేను తమిళనాడు గవర్నర్‌గా నాలుగేళ్లు ఉన్నా. అక్కడ పరిస్థితి చాలా దారుణంగా ఉండేది. ఒక్కో వీసీ పోస్ట్‌ను​ రూ.40 కోట్ల నుంచి రూ.50 కోట్లకు అమ్ముకునేవారు” అని గవర్నర్ పురోహిత్ ఆరోపించారు. తాను గవర్నర్‌గా ఉన్నప్పుడు తమిళనాడులో 27 మంది వీసీలను చట్టబద్ధంగా నియమించినట్లు ఆయన తెలిపారు. ఈ నియామకాల నుంచి పంజాబ్​ రాష్ట్రం కూడా కొన్ని పాఠాలు నేర్చుకోవాల్సి ఉందన్నారు. ప్రస్తుతం పంజాబ్ అగ్రికల్చర్ యూనివర్సిటీ వైస్ ఛాన్స్‌లర్‌గా ఉన్న డాక్టర్ సత్బీర్ సింగ్ గోసల్‌ నియామకం సరైంది కాదని, ఆయన్ను చట్టవిరుద్ధంగా వీసీగా నియమించారని పురోహిత్​ ఆరోపణలు చేశారు. సత్బీర్‌ను పదవి నుంచి తొలగించాల్సిందిగా గతంలోనే పంజాబ్ ముఖ్యమంత్రి భగవంత్ మాన్‌ను తను కోరానని చెప్పారు. యూనివర్సిటీ కార్యకలాపాల్లో గవర్నర్​ జోక్యంపై సీఎం భగవంత్ చేసిన వ్యాఖ్యలపై స్పందిస్తూ.. రాష్ట్ర ప్రభుత్వాలే ఈ విషయంలో జోక్యం చేసుకోకూడదని చెప్పారు.