Garikipati Narasimha Rao: కులం పుట్టుకతో రాదు.. కుల వివక్షపై గరికపాటి నరసింహారావు సంచలనం

Garikipati Narasimha Rao: హిందూ ధర్మంలో కులం పేరుతో ఒకరిని తక్కువ చేసి చూడటం లేదా అవమానించడం వంటి అంశాలు ఎక్కడా లేవని ప్రముఖ సహస్రావధాని, ప్రవచనకర్త గరికిపాటి నరసింహారావు స్పష్టం చేశారు. ఇటీవల జరిగిన ఒక ఆధ్యాత్మిక సదస్సులో ఆయన మాట్లాడుతూ, ప్రస్తుత సమాజంలో కులం చుట్టూ అల్లుకున్న అపోహలపై తనదైన శైలిలో విశ్లేషణ చేశారు.

గుణకర్మల ఆధారంగానే వర్ణ వ్యవస్థ: భగవద్గీతలోని శ్లోకాలను ప్రస్తావిస్తూ.. శ్రీకృష్ణ పరమాత్మ “చాతుర్వర్ణ్యం మయా సృష్టం గుణకర్మ విభాగశః” అని చెప్పారే తప్ప, పుట్టుక ఆధారంగా కులాలు ఏర్పడ్డాయని ఎక్కడా చెప్పలేదని గరికిపాటి వివరించారు. ఒక వ్యక్తిలోని గుణాలు (స్వభావం), అతను చేసే కర్మ (వృత్తి) ఆధారంగానే ఆ కాలంలో వర్ణ వ్యవస్థ ఏర్పడిందని ఆయన గుర్తు చేశారు. “కేవలం ఒక బ్రాహ్మణ కుటుంబంలో పుట్టినంత మాత్రాన ఎవరూ బ్రాహ్మణులు కాలేరు. బ్రాహ్మణుడికి ఉండాల్సిన లక్షణాలు లేనివాడు, ఆ వృత్తిని ఆచరించనివాడు తనను తాను బ్రాహ్మణుడిగా చెప్పుకునే అర్హత కోల్పోతాడు” అని ఆయన కుండబద్దలు కొట్టినట్టు చెప్పారు.

వివక్షకు తావులేదు: సామాజిక సమానత్వం గురించి మాట్లాడుతూ.. “ఒక గిరిజనుడు వేదాలు చదివి ఇతరులకు పాఠాలు చెబితే, ధర్మశాస్త్రం ప్రకారం అతనే అసలైన బ్రాహ్మణుడు. ఒక అగ్రకులంలో పుట్టిన వ్యక్తి సమాజానికి కీడు చేస్తే అతను అధముడే అవుతాడు” అని పేర్కొన్నారు. హిందూ ధర్మం ఎప్పుడూ జ్ఞానానికి, శీల నిబద్ధతకే ప్రాధాన్యత ఇచ్చిందని, పుట్టుకకు కాదని ఆయన స్పష్టం చేశారు.

అపోహల వెనుక కారణం: మధ్యయుగాల్లో సమాజంలోకి ప్రవేశించిన కొన్ని స్వార్థపూరిత ఆలోచనలు, అపోహల వల్లే కుల వివక్ష స్థిరపడిపోయిందని  గరికిపాటి విశ్లేషించారు. అసలు ధర్మాన్ని విస్మరించి, కేవలం పైపైన ఆచారాలను పట్టుకుని వేలాడటం వల్లే నేడు సమాజంలో విభజన కనిపిస్తోందని ఆవేదన వ్యక్తం చేశారు. ప్రతి ఒక్కరూ తమ మూలాలను, గీతా సారాన్ని అర్థం చేసుకుంటే కుల వివక్షకు తావుండదని ఆయన పిలుపునిచ్చారు. ప్రస్తుతం గరికిపాటి చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి.