“మంగళవారం” సినిమాలకు కొత్త ఆదివారం ఎలా అయింది? మల్టీప్లెక్స్‌ల మాస్టర్ స్ట్రోక్!

సూర్య ప్రకాష్ జోశ్యుల..

మంగళవారం సాయంత్రం 7 గంటలు… ఆఫీస్ అయిపోయాక ఇంటికి వెళ్లాల్సిన జనాలు, మెట్రో సిటీస్‌లోని మల్టీప్లెక్స్‌ల వైపు పరుగులు తీస్తున్నారు. టికెట్ కౌంటర్ల ముందు క్యూలు, పాప్‌కార్న్ టబ్‌లతో హడావిడి… ఒక్క క్షణం చూస్తే ఇది మంగళవారమా లేక ఆదివారమా అనే డౌట్ రాక మానదు! అసలు వారంలో అత్యంత డల్ గా ఉండే ‘ట్యూస్‌డే’.. థియేటర్లకు ఎలా ‘సండే’ లా మారిపోయింది? దీని వెనుక ఉన్న క్రేజీ బిజినెస్ మైండ్ గేమ్ ఏంటో తెలిస్తే మైండ్ బ్లాక్ అవ్వాల్సిందే!

” మంగళవారం స్పెషల్ ఏమటి?”

ఒకప్పుడు థియేటర్లకు అత్యంత బలహీనమైన రోజు… ఈరోజు అనేక చోట్ల అత్యంత రద్దీగా మారుతోంది. ఇది యాదృచ్ఛికం కాదు. ఇది అదృష్టం కాదు. ఇది ఒక బిజినెస్ నిర్ణయం. ఒకప్పుడు ప్రపంచం మొత్తం ఒకటే మాట అంది. “ఓటీటీ వచ్చేసింది… ఇక థియేటర్ల పని అయిపోయింది.” అని. కానీ థియేటర్లు ఓటీటీతో యుద్ధం చేయలేదు. ప్రేక్షకుడితో కూడా పోరాడలేదు. వాళ్లు ఒక్క ప్రశ్న మాత్రమే వేసుకున్నారు. “జనాలు రాని రోజున… జనాలు వచ్చేలా చేయలేమా?” ఈ ప్రశ్నకు వచ్చిన సమాధానమే… ‘బ్లాక్‌బస్టర్ ట్యూస్‌డే’.

అక్కడి నుంచే కథ మారిపోయింది. ఖాళీ సీట్లను చూసి బాధపడలేదు… వాటిని అవకాశాలుగా మార్చేశారు ఒకప్పుడు శని, ఆదివారాలు థియేటర్ల పండుగ రోజులు. మిగిలిన రోజులు… ముఖ్యంగా మంగళవారం… థియేటర్ యజమానులకు నష్టాల రోజు. షోలు ఉన్నా ప్రేక్షకులు ఉండరు. సీట్లు ఉన్నా కొనేవారు ఉండరు. అప్పుడు చాలా మంది తప్పు గా ఆలోచించారు. “ప్రేక్షకుడు థియేటర్‌ను వదిలేశాడు” అని అనుకున్నారు. కానీ నిజం వేరే. ప్రేక్షకుడు సినిమాను వదల్లేదు. ఖర్చు చేసే విధానాన్ని మాత్రమే మార్చుకున్నాడు. ఈ మార్పును మల్టీప్లెక్స్‌లు చాలా త్వరగా గుర్తించాయి. వాళ్లు టికెట్ ధరలను తగ్గించాయి. ముఖ్యంగా వారంలో అత్యంత బలహీనమైన రోజైన మంగళవారాన్ని ఎంచుకున్నాయి. అప్పుడు జరిగింది అసలు మ్యాజిక్. విద్యార్థులు వచ్చారు. ఉద్యోగులు రావడం మొదలుపెట్టారు. మధ్యతరగతి కుటుంబాలు కూడా… “అదే సినిమా చూడటానికి అయితే… తక్కువ ధరకు ఎందుకు చూడకూడదు?” అని ఆలోచించాయి. దాంతో ఒకప్పుడు ఖాళీగా ఉండే మంగళవారం… కొత్త ఆదివారం అయిపోయింది.

‘టికెట్ రేటు తగ్గింది.. పాప్‌కార్న్ బిజినెస్ పెరిగింది!’

వీకెండ్‌లో ఫ్యామిలీతో మల్టీప్లెక్స్‌కు వెళ్తే టికెట్లు, పాప్‌కార్న్, పార్కింగ్ అన్నీ కలిపి కనీసం రూ. 2000-3000 అవుతుంది. అదే మంగళవారం వెళ్తే.. సగం ఖర్చులోనే అదే లగ్జరీ ఎక్స్‌పీరియన్స్! మల్టీప్లెక్స్ వెళ్లాలనే కోరిక తీరుతుంది, జేబుకూ చిల్లు పడదు. మిడిల్ క్లాస్ లెక్కల మైండ్‌సెట్‌ను మల్టీప్లెక్స్‌లు సరిగ్గా క్యాచ్ చేశాయి.

‘మంగళవారం రూల్స్’ వెనుక ఉన్న రియల్ లాజిక్ (The Corporate Strategy)

మంగళవారమే ఎందుకు? సోమవారం ఆఫీస్ ప్రెజర్ ఉంటుంది, బుధ/గురువారాలు వీకెండ్ మూడ్‌లోకి వెళ్లేందుకు ప్రిపరేషన్. మంగళవారం అనేది ఒక ‘డల్ డే’. ఆ రోజును టార్గెట్ చేయడం వెనుక మల్టీప్లెక్స్ లోపల జరిగే బిజినెస్ చాలా జరుగుతుంది. ‘మంగళవారం కేవలం టికెట్ ధరలు మాత్రమే తగ్గవు, పాప్‌కార్న్, కోలా కాంబోలపై కూడా క్రేజీ ఆఫర్స్ ఉంటాయి. మల్టీప్లెక్స్‌లకు కేవలం టికెట్ల ద్వారా వచ్చే లాభం కంటే.. F&B (ఫుడ్ అండ్ బెవరేజెస్) ద్వారా వచ్చే మార్జిన్ చాలా ఎక్కువ. టికెట్ రేటు తగ్గించి జనాల్ని థియేటర్ లోపలికి రప్పిస్తే, వాళ్లు ఎలాగో పాప్‌కార్న్ కొంటారు. ఇక్కడ పోయింది అక్కడ కవర్ అవుతుంది. ఇదీ అసలు కార్పొరేట్ మైండ్ గేమ్!’

ఓటీటీ ప్రేక్షకుడిని మార్చింది… కానీ

ఓటీటీ ఒక విషయం నేర్పింది. ప్రతి సినిమాకు థియేటర్‌కు వెళ్లాల్సిన అవసరం లేదు. థియేటర్లు కూడా అదే విషయం అర్థం చేసుకున్నాయి. ప్రతి సినిమాను ఒకే రీతిలో అమ్మలేము. కానీ… సరైన ధరలో సరైన అనుభవాన్ని మాత్రం అమ్మగలం. అక్కడే సినిమా గేమ్ మలుపు తిరిగింది. భారతదేశంలో 500కు పైగా స్క్రీన్లు నిర్వహిస్తున్న సినీపోలిస్ ఇండియా మేనేజింగ్ డైరెక్టర్ దేవాంగ్ సంపత్ చెప్పిన విశ్లేషణ ఒక విషయం స్పష్టంగా చెబుతోంది. ఇప్పుడు ప్రేక్షకుడు సినిమా మాత్రమే కొనడం లేదు. తన డబ్బుకు విలువ దొరికిందనే సంతృప్తిని కూడా కొనుగోలు చేస్తున్నాడు.

ఇది సినిమా కథ కాదు… ప్రతి బిజినెస్ నేర్చుకోవాల్సిన పాఠం

ప్రపంచంలో గెలిచే వ్యాపారాలు ఒక్కటే పని చేస్తాయి. కస్టమర్‌ను మార్చాలని ప్రయత్నించవు. కస్టమర్ మారితే… తామూ మారిపోతాయి. మల్టీప్లెక్స్‌లు కూడా అదే చేశాయి. వీకెండ్ కోసం ఎదురుచూడలేదు. వారంలోనే కొత్త వీకెండ్‌ను సృష్టించాయి. అదే అసలు విజయం. రేపటి సినిమా బిజినెస్ ఇక్కడి నుంచే మొదలవుతుంది. మంగళవారం డిస్కౌంట్‌లు పనిచేస్తే… రేపు విద్యార్థుల రోజు ఎందుకు ఉండకూడదు? ఫ్యామిలీ డే ఎందుకు ఉండకూడదు? సీనియర్ సిటిజన్ స్పెషల్ షోలు ఎందుకు ఉండకూడదు? ఉదయం షోలకు ప్రత్యేక ధరలు ఎందుకు ఉండకూడదు? ప్రతి ఖాళీ రోజును… ప్రతి ఖాళీ షోను… ఒక కొత్త మార్కెట్‌గా మార్చే అవకాశాలు ఇంకా ఎన్నో ఉన్నాయి. సినిమాను బ్రతికించేది కేవలం స్టార్ హీరోలు కాదు. ప్రేక్షకుడి జీవితాన్ని అర్థం చేసుకున్న బిజినెస్ ఆలోచనలు.

చివరగా…

ఒకప్పుడు మంగళవారం అంటే… థియేటర్లకు నష్టాల రోజు. ఈరోజు… అదే రోజు కొత్త బిజినెస్‌కు చిహ్నంగా మారుతోంది. బహుశా ఇదే ప్రతి వ్యాపారం గుర్తుంచుకోవాల్సిన గొప్ప సూత్రం. మార్పును చూసి భయపడితే… మార్కెట్ మిమ్మల్ని మర్చిపోతుంది. మార్పును అర్థం చేసుకుని మారితే… అదే మార్కెట్ మిమ్మల్ని మళ్లీ గెలిపిస్తుంది. అందుకే… ఓటీటీ యుగంలో థియేటర్లు బతికింది పెద్ద హీరోల వల్ల కాదు. ఇలాంటి చిన్న చిన్న ఆలోచనల వల్ల. శనివారాన్ని గెలవడం కాదు… మంగళవారాన్నే ఆదివారం చేయడం వల్ల.