తలసాని సాయి కిరణ్ యాదవ్ వైపు బీఆర్ఎస్ మొగ్గు!?

తెలంగాణ రాజకీయాల్లో ప్రస్తుతం ఖైరతాబాద్‌ ఉప ఎన్నిక అంశం హాట్‌టాపిక్‌గా మారింది. న్యాయపరమైన కారణాల వల్ల ఈ ఎన్నిక కాస్త ఆలస్యమవుతున్నప్పటికీ, త్వరలోనే పోరు అనివార్యమని అన్ని ప్రధాన రాజకీయ పార్టీలు బలంగా నమ్ముతున్నాయి. ఈ నేపథ్యంలో ప్రధాన ప్రతిపక్షమైన బీఆర్ఎస్ ఈ స్థానంపై ప్రత్యేక దృష్టి సారించింది. ఖైరతాబాద్‌ గడ్డపై గులాబీ జెండా ఎగురవేయడం ద్వారా అధికార కాంగ్రెస్ పార్టీకి గట్టి సందేశం ఇవ్వాలని బీఆర్ఎస్ హైకమాండ్ ప్రణాళికలు రచిస్తోంది.

కాంగ్రెస్ పార్టీని సమర్థవంతంగా ఎదుర్కొని, నియోజకవర్గంలో పార్టీ కేడర్‌లో జోష్ నింపేలా ఒక బలమైన అభ్యర్థిని బరిలోకి దింపాలని బీఆర్ఎస్ నాయకత్వం భావిస్తోంది. ఈ క్రమంలో పలువురి పేర్లను పరిశీలించినప్పటికీ, తొలి ఆప్షన్‌గా మాజీ మంత్రి తలసాని శ్రీనివాస యాదవ్ కుమారుడు తలసాని సాయి కిరణ్ యాదవ్ పేరు ప్రముఖంగా వినిపిస్తోంది. దాదాపుగా ఆయనకే ఖైరతాబాద్‌ టికెట్ ఖాయమని పార్టీ శ్రేణులు బలంగా విశ్వసిస్తున్నాయి.

సాయి కిరణ్ యాదవ్ బీసీ సామాజిక వర్గానికి చెందినవారు కావడం, హైదరాబాద్ నగరంలో యాదవ సామాజిక వర్గానికి, స్థానిక ప్రజలకు ఆయనపై ఉన్న మంచి పట్టు పార్టీకి కలిసొచ్చే ప్రధాన అంశం. తండ్రి తలసాని శ్రీనివాస యాదవ్ సీనియారిటీ, రాజకీయ పరిపక్వత, నియోజకవర్గంలో ఆయనకంటూ ఉన్న ప్రత్యేక పాపులారిటీ అభ్యర్థి గెలుపునకు బలమైన పునాది వేస్తాయని పార్టీ అంచనా వేస్తోంది. సాయి కిరణ్ యాదవ్ యువకుడు కావడంతో పాటు సోషల్ మీడియాలో, యువతలో మంచి ఫాలోయింగ్ కలిగి ఉన్నారు. ఇది జెన్ జీ ఓటర్లను ఆకర్షించడంలో కీలక పాత్ర పోషిస్తుందని బీఆర్ఎస్ నమ్ముతోంది. గత సార్వత్రిక ఎన్నికల్లో సికింద్రాబాద్ పార్లమెంట్ స్థానం నుంచి పోటీ చేసిన అనుభవం సాయి కిరణ్ యాదవ్‌కు ఉంది. ఈ ఎన్నికల అనుభవం ఖైరతాబాద్‌లో వ్యూహాత్మకంగా వ్యవహరించేందుకు దోహదపడుతుందని హైకమాండ్ భావిస్తోంది.

ఈ అంశాలన్నింటినీ బేరీజు వేసుకున్న బీఆర్ఎస్ అధిష్టానం.. ఇప్పటికే సాయి కిరణ్ యాదవ్‌కు అభ్యర్థిత్వంపై సూచనప్రాయంగా స్పష్టతనిచ్చినట్లు విశ్వసనీయ సమాచారం. హైకమాండ్ నుంచి గ్రీన్ సిగ్నల్ రావడంతో సాయి కిరణ్ యాదవ్ ఏమాత్రం ఆలస్యం చేయకుండా క్షేత్రస్థాయిలో గ్రౌండ్ వర్క్ ప్రారంభించారు. నియోజకవర్గంలోని ముఖ్య నేతలు, కార్పొరేటర్లు, యూత్ లీడర్లతో వరుస భేటీలు నిర్వహిస్తూ కేడర్‌లో ఉత్సాహం నింపుతున్నారు.

మొత్తానికి…, ఖైరతాబాద్‌ ఉప ఎన్నికను బీఆర్ఎస్ అత్యంత ప్రతిష్టాత్మకంగా తీసుకున్నట్లు స్పష్టమవుతోంది. తలసాని సాయి కిరణ్ యాదవ్ ఎంట్రీతో ఇక్కడ రాజకీయం మరింత రసవత్తరంగా మారుతుందనడంలో సందేహం లేదు. అధికార కాంగ్రెస్‌ను దీటుగా ఎదుర్కొని ఈ స్థానాన్ని కైవసం చేసుకోవడం ద్వారా రాష్ట్ర రాజకీయాల్లో మరోసారి సంచలనం సృష్టించాలని బీఆర్ఎస్ వ్యూహాత్మకంగా అడుగులు వేస్తోంది.