ఎమ్మెల్సీ ఎన్నికలపై బీజేపీ వ్యూహాత్మక మౌనం!?
- Published By: Vasishta
- October 3, 2026 / 11:15 AM IST
తెలంగాణలో గ్రాడ్యుయేట్ ఎమ్మెల్సీ ఎన్నికల వేడి క్రమంగా పెరుగుతోంది. వచ్చే ఏడాది మార్చిలో జరగనున్న ఈ ఎన్నికలకు సంబంధించి ఓటరు నమోదు ప్రక్రియ ఊపందుకుంది. ఈ నేపథ్యంలో బీజేపీ వైఖరి రాజకీయ వర్గాల్లో చర్చనీయాంశంగా మారింది. సాధారణంగా ఎన్నికలకు చాలా ముందే అభ్యర్థులను ప్రకటించి దూకుడు ప్రదర్శించే బీజేపీ, ఈసారి అభ్యర్థుల ఎంపికను వాయిదా వేయాలని నిర్ణయించుకుంది. ఈ నిర్ణయం వెనుక పార్టీ అంతర్గత సమీకరణాలు, తీవ్ర పోటీ, భవిష్యత్తు రాజకీయ లెక్కలు దాగి ఉన్నాయని తెలుస్తోంది.
రెండు పట్టభద్రుల నియోజకవర్గాల స్థానాల కోసం బీజేపీ నుంచి సుమారు 30 మందికి పైగా ఆశావహులు పోటీ పడుతున్నారు. ముఖ్యంగా మహబూబ్ నగర్ – రంగారెడ్డి – హైదరాబాద్ నియోజకవర్గం పరిధిలో ఏకంగా 43 అసెంబ్లీ సెగ్మెంట్లు ఉన్నాయి. ఇక్కడ పోటీ రసవత్తరంగా మారింది. ప్రతి స్థానానికి భారీ సంఖ్యలో నాయకులు పోటీపడుతున్నారు. ఇప్పుడే అభ్యర్థిని ఖరారు చేస్తే టికెట్ దక్కని వారు అసంతృప్తికి గురయ్యే ప్రమాదముందని పార్టీ అధిష్టానం భావిస్తోంది. ఈ అసంతృప్తి పార్టీ క్యాడర్‌లో చీలికలకు, అంతర్గత కుమ్ములాటలకు దారితీస్తుందనే ఆందోళన నాయకత్వాన్ని వెంటాడుతోంది.
అభ్యర్థులను ఇప్పుడే ప్రకటించకుండా జాప్యం చేయడం ద్వారా ఆశావహులందరినీ పార్టీ పనుల్లో నిమగ్నమయ్యేలా చేసింది. ముఖ్యంగా ఓటరు నమోదు కార్యక్రమంలో వాళ్లందరినీ భాగస్వాములను చేస్తోంది. నవంబర్ 6 వరకు దరఖాస్తులకు గడువుంది. నవంబర్ 25న డ్రాఫ్ట్ ఓటరు జాబితా రిలీజ్ చేయనున్నారు. డిసెంబర్ 30న తుది జాబితా వెలువడనుంది. ఈ లోపు ఎవరికి వారు తమ పట్టు నిరూపించుకోవడానికి ప్రయత్నిస్తారని, ఇది పార్టీ బూత్ స్థాయి బలోపేతానికి దోహదపడుతుందని అంచనా వేస్తున్నారు. అయితే.. చివర్లో అభ్యర్థిని ఖరారు చేయడం ద్వారా ప్రచారానికి తగిన సమయం దొరకదని, ముందస్తు ప్రచారమే విజయానికి బాటలు వేస్తుందని కొందరు ఆశావహులు ఆందోళన వ్యక్తం చేస్తున్నారు. అయినా, అధిష్టానం మాత్రం ఆచితూచి అడుగులు వేస్తోంది.
ఈ ఎమ్మెల్సీ ఎన్నికలను కేవలం మండలి సీట్ల గెలుపు కోసమే కాకుండా, పట్టభద్రులు, యువత, ఉద్యోగులు, మధ్యతరగతి వర్గాల్లో పార్టీ ప్రభావాన్ని పరీక్షించుకునే ఒక వేదికగా బీజేపీ చూస్తోంది. అంతేకాక, రాబోయే జీహెచ్ఎంసీ ఎన్నికలు, 2028 అసెంబ్లీ ఎన్నికల నాటికి పార్టీ యంత్రాంగాన్ని సంసిద్ధం చేయడానికి ఇది సరైన అవకాశమని భావిస్తోంది. ప్రత్యర్థి పార్టీలైన కాంగ్రెస్, బీఆర్ఎస్ అభ్యర్థుల స్థానిక బలాలు, నెట్‌వర్క్‌లను నిశితంగా పరిశీలిస్తోంది.
మొత్తానికి, అభ్యర్థుల ప్రకటనలో జాప్యం చేయడం ద్వారా ఒకవైపు అసంతృప్తిని చల్లార్చాలని చూస్తున్న బీజేపీ, మరోవైపు ఓటరు నమోదును ఆయుధంగా మలచుకుని క్షేత్రస్థాయిలో పట్టు బిగించాలని వ్యూహరచన చేస్తోంది. ఈ రాజకీయ చదరంగంలో బీజేపీ అనుసరిస్తున్న ఈ మౌన వ్యూహం ఏ మేరకు ఫలితాన్ని ఇస్తుందో వేచి చూడాలి.
