కడప పొలిటికల్ వార్.. వైసీపీ నేతలపై భారీగా కేసులు..!
- Published By: G Vencatesh
- October 18, 2026 / 01:20 PM IST
ఆంధ్రప్రదేశ్‌లో స్థానిక సంస్థల ఎన్నికల నామినేషన్ల ప్రక్రియ తీవ్ర ఉద్రిక్తతలకు దారితీస్తోంది. కడప(Kadapa) నగరంలోని గాంధీనగర్ ఉన్నత పాఠశాల నామినేషన్ కేంద్రం వద్ద నిన్న చోటుచేసుకున్న రాళ్లదాడి మరియు ఘర్షణల నేపథ్యంలో పోలీసులు ఘాటుగా స్పందించారు. ఈ హింసాత్మక ఘటనకు కారకులుగా గుర్తిస్తూ.. వైఎస్సార్ కాంగ్రెస్ పార్టీకి(YSRCP) చెందిన దాదాపు 70 మంది ముఖ్య నేతలు, కార్యకర్తలపై పోలీసులు శనివారం అర్ధరాత్రి కేసు నమోదు చేశారు.
స్థానిక సంస్థల నామినేషన్ల దాఖలుకు చివరి రోజుల్లో అధికార, ప్రతిపక్ష పార్టీల మధ్య తీవ్ర పోటీ నెలకొంది. ఈ క్రమంలో నిన్న గాంధీనగర్ పాఠశాల కేంద్రం వద్ద నామినేషన్లు వేసేందుకు వచ్చిన అభ్యర్థులు, వారి మద్దతుదారుల మధ్య తీవ్ర వాగ్వాదం చోటుచేసుకుంది. ఈ గొడవ కాస్తా ముదిరి పరస్పరం రాళ్లదాడికి దారితీసింది. నామినేషన్ కేంద్రం పరిసరాల్లో కొందరు ఆందోళనకారులు కత్తులు, కర్రలు, రాళ్లతో హల్‌చల్ చేయడంతో అక్కడ తీవ్ర భయాందోళనలు వ్యక్తమయ్యాయి.
పరిస్థితిని అదుపు చేయడానికి పోలీసులు లాఠీఛార్జ్ కూడా చేయాల్సి వచ్చింది. ఈ ఘటనపై నమోదైన ఫిర్యాదులు, అక్కడ లభ్యమైన సీసీటీవీ ఫుటేజీలు మరియు మీడియా విజువల్స్ ఆధారంగా పోలీసులు నిందితులను గుర్తించారు. నామినేషన్ల ప్రక్రియకు ఆటంకం కలిగించడం, ప్రభుత్వ విధులకు ఆటంకం, శాంతిభద్రతలకు విఘాతం కలిగించడం, గుంపులుగా చేరి దాడులకు తెగబడటం వంటి పలు తీవ్రమైన సెక్షన్ల కింద వైసీపీ నేతలపై ఎఫ్‌ఐఆర్ నమోదు చేసినట్లు తెలుస్తోంది.
మరోవైపు, ఈ కేసుల నమోదుపై వైసీపీ శ్రేణులు మండిపడుతున్నాయి. అధికార కూటమి నేతలు తమ అభ్యర్థులను భయభ్రాంతులకు గురిచేస్తూ, నామినేషన్లు వేయకుండా అడ్డుకుంటున్నారని, తిరగబడిన తమపైనే రివర్స్‌లో అక్రమ కేసులు పెడుతున్నారని ఆరోపిస్తున్నారు. ఈ ఘటనతో కడప జిల్లా వ్యాప్తంగా అదనపు బలగాలను మోహరించి, పోలీసులు గట్టి నిఘా ఏర్పాటు చేశారు.
