Ganta Srinivasa Rao: జగన్ పై గంటా శ్రీనివాసరావు ఘాటు వ్యాఖ్యలు..

టీడీపీ (TDP) సీనియర్ నేత, భీమిలి (Bheemili) ఎమ్మెల్యే గంటా శ్రీనివాసరావు (Ganta Srinivasa Rao) తాజాగా విశాఖపట్నం (Visakhapatnam) లో మీడియాతో మాట్లాడారు. ఈ సందర్భంగా వైసీపీ అధినేత, మాజీ ముఖ్యమంత్రి వైఎస్ జగన్‌ (YS Jagan) పై కఠిన వ్యాఖ్యలు చేశారు. జగన్‌ మానసిక స్థితి సరిగాలేదని, అవసరమైతే వైద్య పరీక్షలు చేయించుకోవాల్సిన పరిస్థితి ఉందని ఆయన విమర్శించారు.

ప్రజలు గత ఎన్నికల్లో పొరపాటున 11 సీట్లు ఇచ్చారని, అయితే రాబోయే ఎన్నికల్లో జగన్‌ పార్టీకి ఒకటి లేదా రెండు సీట్లు మాత్రమే దక్కే అవకాశం ఉందని ఆయన అంచనా వేశారు. జగన్‌ ప్రభుత్వంపై కూడా ఆయన తీవ్ర విమర్శలు చేశారు. ముఖ్యంగా వైద్య కళాశాలల అంశాన్ని ప్రస్తావిస్తూ, ప్రైవేటీకరణ జరుగుతుందని జగన్‌ చేసిన ఆరోపణలను ఖండించారు. కళాశాలలు ప్రభుత్వ ఆధ్వర్యంలోనే ఉంటాయని, కేవలం నిర్మాణ బాధ్యతలను మాత్రమే ప్రైవేట్ సంస్థలకు ఇస్తున్నామని స్పష్టం చేశారు. పబ్లిక్ ప్రైవేట్ పార్టనర్‌షిప్‌ (PPP) అనే పదం అర్థం కూడా జగన్‌కు తెలియకపోవడం విచారకరమని వ్యాఖ్యానించారు.

అలాగే, కాంట్రాక్టర్లను బెదిరించడం సరికాదని గంటా అన్నారు. ప్రజలను భయపెట్టే విధంగా మాట్లాడడం ఒక ప్రజా ప్రతినిధికి తగదని వ్యాఖ్యానించారు. యూరియా (Urea) అంశంలో జగన్‌ చేసిన వ్యాఖ్యలు తప్పని, వాస్తవాలు తెలియకుండా విమర్శించడం సరైంది కాదని అన్నారు. ముఖ్యమంత్రి చంద్రబాబు నాయుడు (Chandrababu Naidu), జనసేన అధినేత పవన్ కళ్యాణ్‌ (Pawan Kalyan), వ్యవసాయ మంత్రి అచ్చెన్నాయుడు (Atchannaidu) లపై జగన్‌ చేసిన వ్యాఖ్యలను తీవ్రంగా తప్పుబట్టారు.

అసెంబ్లీలో ప్రతిపక్ష హోదా (Opposition Status) గురించి కూడా గంటా మాట్లాడారు. అసెంబ్లీలో 10 శాతం సీట్లు లేకపోతే ప్రతిపక్ష హోదా రావడం అసాధ్యమని, ఈ విషయం జగన్‌కూ తెలుసునని అన్నారు. అయినప్పటికీ, హోదా కోసం యాగీ చేస్తూ బెదిరింపులు చేయడం సరైంది కాదని విమర్శించారు. జగన్‌ అసెంబ్లీకి రాకుండా మీడియా ముందే హెచ్చరికలు చేయడం ప్రజలకు అంగీకారమయ్యే విషయం కాదని గంటా అభిప్రాయపడ్డారు. ప్రతిపక్ష హోదా అనేది ప్రజల చేతుల మీదుగా రావలసినదని, ప్రజలు సీట్లు ఇవ్వనప్పుడు హోదా ఎలా వస్తుందని ప్రశ్నించారు.

విశాఖపట్నం (Visakhapatnam) లో 500 కోట్ల రూపాయలు ఖర్చు చేసి నిర్మించిన భవనాన్ని ఎవరికి ఉపయోగపడేలా కట్టారో ఇప్పటికీ జగన్‌ చెప్పలేదని ఆయన డిమాండ్ చేశారు. ఇది ప్రజా డబ్బు వృధా కాదా అని ప్రశ్నిస్తూ, జగన్‌ తన నిర్ణయాలపై సమాధానం చెప్పాల్సిన బాధ్యత ఉందని అన్నారు. మొత్తం మీద గంటా శ్రీనివాసరావు చేసిన వ్యాఖ్యలు జగన్‌ పై మరింత ఒత్తిడిని సృష్టించేలా ఉన్నాయని, రాజకీయ వర్గాల్లో పెద్ద చర్చనీయాంశంగా మారాయి.