RRR vs PVS: రఘురామపై పీవీ సునీల్ లాజికల్ డిమాండ్..! అసలు కథేంటి?

ఆంధ్రప్రదేశ్ రాజకీయ, అధికార వర్గాల్లో ఖాకీ వర్సెస్ ఖాదీ పోరు మరోసారి రసవత్తరంగా మారింది. గత ఐదేళ్లుగా ఒకరిపై ఒకరు తీవ్ర ఆరోపణలు చేసుకున్న సీనియర్ ఐపీఎస్ అధికారి పీవీ సునీల్ కుమార్, ఎంపీ రఘురామ కృష్ణరాజు (RRR) వ్యవహారం ఇప్పుడు కొత్త మలుపు తిరిగింది. ఇప్పటికే సస్పెన్షన్ లో ఉండి, క్రిమినల్ కేసు విచారణ ఎదుర్కొంటున్న సునీల్ కుమార్.. రఘురామ కృష్ణరాజును టార్గెట్ చేస్తూ చేసిన తాజా వ్యాఖ్యలు సోషల్ మీడియాలో పెను దుమారం రేపుతున్నాయి. దీనికి ప్రతిగా నెటిజన్లు, రఘురామ వర్గీయులు సంధిస్తున్న ప్రశ్నలు సునీల్ కుమార్ కు ఇబ్బందికరంగా మారాయి.

ప్రభుత్వ అనుమతి లేకుండా విదేశాలకు వెళ్లారన్న ఆరోపణపై, అలాగే రఘురామ కృష్ణరాజు కస్టోడియల్ టార్చర్ కేసులో నిందితుడిగా ఉన్న పీవీ సునీల్ కుమార్ ప్రస్తుతం సస్పెన్షన్ లో ఉన్నారు. ఈ కేసు విచారణ నిమిత్తం ఆయన ఇటీవలే అధికారుల ముందు హాజరయ్యారు. సరిగ్గా ఇదే సమయంలో, బ్యాంకు రుణాల ఎగవేత కేసులో రఘురామ కృష్ణరాజుకు సుప్రీంకోర్టులో చుక్కెదురైంది. తనపై ఉన్న కేసును కొట్టివేయాలంటూ (Quash) ఆర్ఆర్ఆర్ దాఖలు చేసిన పిటిషన్ ను సుప్రీంకోర్టు తిరస్కరించింది. దీంతో ఆయనపై విచారణకు మార్గం సుగమమైంది.

దీనిని అదనుగా తీసుకున్న పీవీ సునీల్ కుమార్, సోషల్ మీడియా వేదికగా ఒక కొత్త డిమాండ్ ను తెరపైకి తెచ్చారు. “నాపై వచ్చిన ఆరోపణల విచారణ సక్రమంగా, నిష్పక్షపాతంగా జరిగేందుకు నన్ను సస్పెండ్ చేశారు. ఇప్పుడు రఘురామ కృష్ణరాజుపై విచారణకు సుప్రీంకోర్టు గ్రీన్ సిగ్నల్ ఇచ్చింది. మరి విచారణ సజావుగా సాగాలంటే ఆయన కూడా తన పదవికి రాజీనామా చేయాలి కదా? లేదా ప్రభుత్వం ఆయన్ను తప్పించాలి కదా? చట్టం ముందు అందరూ సమానమే అనే మెసేజ్ వెళ్లాలి” అనేది సునీల్ కుమార్ వాదన.

సునీల్ కుమార్ లేవనెత్తిన ఈ లాజిక్ పై సోషల్ మీడియాలో, ముఖ్యంగా కూటమి ప్రభుత్వ మద్దతుదారుల నుంచి తీవ్ర వ్యతిరేకత వ్యక్తమవుతోంది. సునీల్ కుమార్ వైఖరిని “చింత చచ్చినా పులుపు చావలేదు” అనే సామెతతో పోలుస్తూ సెటైర్లు వేస్తున్నారు.

పీవీ సునీల్ కుమార్ సీఐడి చీఫ్ గా అత్యంత అధికారంతో చక్రం తిప్పిన సమయంలో, అప్పటి ముఖ్యమంత్రి వైఎస్ జగన్ మోహన్ రెడ్డిపై సీబీఐ, ఈడీ కేసులు విచారణలో ఉన్నాయి. అక్రమాస్తుల కేసులో ఏ1గా ఉన్న జగన్, ముఖ్యమంత్రిగా కొనసాగితే విచారణ ప్రభావితం అవుతుందని అప్పట్లో విపక్షాలు గగ్గోలు పెట్టాయి. మరి అప్పుడు పీవీ సునీల్ కుమార్ కు “చట్టం ముందు అందరూ సమానమే” అనే సూత్రం గుర్తుకు రాలేదా? అని రఘురామ అభిమానులు ప్రశ్నిస్తున్నారు. ఆ రోజు సీఎం పదవికి రాజీనామా చేయాలని జగన్ ను ఎందుకు కోరలేదని నిలదీస్తున్నారు.

రఘురామ కృష్ణరాజుపై ఉన్నది బ్యాంకు రుణాల ఎగవేత కేసు. కానీ, పీవీ సునీల్ కుమార్ పై ఉన్నది ఒక సిట్టింగ్ ఎంపీని పోలీస్ కస్టడీలో చిత్రహింసలకు గురిచేశారన్న (Custodial Torture) తీవ్రమైన క్రిమినల్ అభియోగం. రక్షక భటులే భక్షకులుగా మారారన్నది ఆయనపై ఉన్న ప్రధాన ఆరోపణ. పైగా, సాక్ష్యాలను తారుమారు చేసే అవకాశం ఒక పోలీసు అధికారికి ఉన్నంతగా, బ్యాంకు కేసులో ఉండదని న్యాయ నిపుణులు అంటున్నారు. ఈ రెండింటినీ ఒకే గాటన కట్టడం సునీల్ కుమార్ అవకాశవాదమేనని విమర్శకులు అంటున్నారు.

విచారణ అధికారి ముందు హాజరైనప్పుడు కూడా సునీల్ కుమార్ బాడీ లాంగ్వేజ్ లో పశ్చాత్తాపం కంటే, పొగరే ఎక్కువగా కనిపించిందని నెటిజన్లు కామెంట్ చేస్తున్నారు. ఇప్పుడు రఘురామపై ట్వీట్ చేయడం ద్వారా.. తాను బాధితుడినని (Victim Card) చూపించుకునే ప్రయత్నం చేస్తున్నారని, కానీ ప్రజలకు గతం ఇంకా గుర్తుంది అని కౌంటర్లు పడుతున్నాయి.

పీవీ సునీల్ కుమార్ తాజా ట్వీట్ వెనుక వ్యూహం స్పష్టంగా కనిపిస్తోంది. తనపై జరుగుతున్న విచారణ, రఘురామపై జరగబోయే విచారణ ఒకటే అని చెప్పడం ద్వారా.. ప్రభుత్వం తనపై కక్ష సాధింపు చర్యలకు పాల్పడుతోందనే నెరేటివ్ ను ప్రజల్లోకి తీసుకెళ్లడం ఆయన ఉద్దేశంగా కనిపిస్తోంది. అయితే, గత ఐదేళ్లలో ఆయన వ్యవహరించిన తీరు, ప్రతిపక్ష నేతలను ఇబ్బంది పెట్టిన విధానం ఇంకా ప్రజల మనసులో నుంచి చెరిగిపోలేదు. అందుకే, ఆయన ఇప్పుడు “ధర్మం, న్యాయం” గురించి మాట్లాడుతుంటే.. అది దెయ్యాలు వేదాలు వల్లించినట్లుగా ఉందని సోషల్ మీడియాలో ట్రోల్స్ వస్తున్నాయి.

మొత్తానికి, సునీల్ కుమార్ ట్వీట్ తో రఘురామను ఇరుకున పెట్టాలనుకున్నారు కానీ, తిరిగి తన గతాన్నే మరోసారి ప్రజలకు గుర్తు చేసినట్లయింది. రానున్న రోజుల్లో ఈ ఇద్దరి మధ్య న్యాయపోరాటం మరింత ముదిరే అవకాశం ఉంది.