White House: ట్రంప్ గోల్డ్ కార్డుకు విశేష స్పందన..

అమెరికా అధ్యక్షుడు డొనాల్డ్‌ ట్రంప్‌ (Donald Trump) ఇటీవల ప్రకటించిన ‘గోల్డ్‌ కార్డు’కు భారీ గిరాకీ ఉన్నట్లు తెలుస్తోంది. ఒక్కరోజే 1000 కార్డులను (Gold Card) విక్రయించినట్లు వాణిజ్యశాఖ మంత్రి హోవర్డ్‌ లుట్నిక్‌ వెల్లడించారు. వీటి ద్వారా 5బిలియన్‌ డాలర్లు సేకరించామని చెప్పారు. ఓ పాడ్‌కాస్ట్‌లో మాట్లాడుతూ.. లక్షలాది మంది ఈ కార్డును కొనేందుకు సిద్ధంగా ఉన్నారని, వీటిద్వారా 5 ట్రిలియన్‌ డాలర్లు సేకరించే అవకాశం ఉందన్నారు.

‘‘ప్రపంచ వ్యాప్తంగా 3.7కోట్ల మందికి ఈ కార్డు కొనే సామర్థ్యం ఉంది. కనీసం 10లక్షల మంది దీనిని కొనుగోలు చేస్తారని అధ్యక్షుడు ట్రంప్‌ భావిస్తున్నారు’’ అని లుట్నిక్‌ తెలిపారు.ట్రంప్‌ మదిలో నుంచి వచ్చిన ఆలోచనే అని చెప్పారు. అధ్యక్షుడి ఆలోచనను అమలు చేయడమే తన బాధ్యత అని, దీన్ని అమలు చేసే ప్రణాళిక తన వద్ద ఉందన్నారు.

ఇన్వెస్టర్‌ వీసాతో..

ప్రస్తుతం ఉన్న పెట్టుబడి వీసా ఈబీ-5 (Investor visa) స్థానంలో గోల్డ్‌ కార్డు తీసుకురానున్నట్లు అమెరికా అధ్యక్షుడు ట్రంప్‌ ఇటీవల వెల్లడించారు. 5 మిలియన్‌ డాలర్లు చెల్లించగలిగే వారికి నేరుగా అమెరికా పౌరసత్వాన్ని అందజేస్తారు. ప్రపంచ వ్యాప్తంగా సంపన్నులను ఆకర్షించేందుకే దీనిని ప్రవేశపెట్టామని, వారు అమెరికాకు వచ్చి భారీగా ఖర్చుపెడితే స్థానికంగా ఉద్యోగాలు కూడా పెరుగుతాయని ట్రంప్‌ పేర్కొన్నారు.

ఇదే విషయంపై ఇటీవల మరో సందర్భంలో లుట్నిక్‌ మాట్లాడుతూ.. 2.5లక్షల మంది ఈ గోల్డ్‌ కార్డు కొనేందుకు ఆసక్తి చూపుతున్నట్లు చెప్పారు. EB-5 ప్రోగ్రామ్‌ వల్ల జరుగుతున్న మోసాలు, ఇతర అక్రమాలను అరికట్టేందుకు వీటిని తీసుకొస్తున్నాం. చట్టబద్ధ ఇన్వెస్టర్లకు పౌరసత్వం, శాశ్వత నివాసం కల్పించేందుకు ఇది ఉపయోగపడుతుందన్నారు. ఈబీ-5 వీసా విధానాన్ని అమెరికా 1990లో తీసుకొచ్చింది. వేలాది మంది ఈ ఇన్వెస్టర్‌ వీసాలను పొందారు. అయితే, ఈ విధానంతో మోసాలు జరుగుతున్నాయని, కొందరు అక్రమంగా నిధులు పొందుతున్నారని ఇటీవల జరిపిన అధ్యయనంలో తేలింది. దీంతో 2022లో కొన్ని సవరణలు చేశారు. తాజాగా దీని స్థానంలో గోల్డ్‌ కార్డును ప్రవేశపెడుతున్నట్లు ట్రంప్‌ ప్రకటించారు.