RSS: నటుడు వర్సెస్ నేతలు..ముదిరిన సోషల్ మీడియా యుద్ధం..

ఆర్ఎస్ఎస్‌ (Rashtriya Swayamsevak Sangh)పై ప్రముఖ సినీ నటుడు ప్రకాష్ రాజ్‌ (Prakash Raj) తీవ్ర స్థాయిలో విమర్శలు చేయడం రాజకీయ వర్గాల్లో పెద్ద చర్చకు దారి తీసింది. విశాఖపట్నం (Visakhapatnam)లో నిర్వహించిన సీఐటీయూ (CITU) ఉత్సవాలకు హాజరైన ఆయన, ఈ దేశానికి ఆర్ఎస్ఎస్ ఏమి చేసిందని ప్రశ్నించారు. వందేళ్ల చరిత్ర ఉన్న సంస్థ దేశానికి చేసిన సేవలు ఏంటో చెప్పాలని డిమాండ్ చేస్తూ, ఆర్ఎస్ఎస్‌ను “విషం”గా అభివర్ణించారు. స్వాతంత్ర్యానికి ముందు ఏర్పడిన ఈ సంస్థ నుంచి స్వాతంత్ర్య పోరాటంలో పాల్గొన్నవారు ఎవరైనా ఉన్నారా అని నిలదీశారు. ఉంటే ఒకటి రెండు పేర్లు చెప్పాలని సవాల్ విసిరారు.

ఆర్ఎస్ఎస్ వందేళ్లలో సాధించిన ప్రగతి అంటే లాగుల నుంచి ప్యాంట్ల వరకు మారడమేనని ఆయన ఎద్దేవా చేశారు. దేశం మనదే అని చెప్పుకునే ఆ సంస్థ దేశానికి చేసింది ఏమిటో చెప్పాలని డిమాండ్ చేశారు. ఆర్ఎస్ఎస్‌ను ఒక సంస్థగా కాకుండా “బ్రహ్మ రాక్షసుడు”గా పేర్కొనడం మరింత వివాదాస్పదంగా మారింది. అలాగే సర్దార్ వల్లభాయ్ పటేల్‌ (Vallabhbhai Patel) ఒకప్పుడు ఆర్ఎస్ఎస్‌ను నిషేధించారని, అలాంటి వ్యక్తినే తమ నాయకుడిగా చెప్పుకుంటూ బీజేపీ (BJP) భారీ విగ్రహం ఏర్పాటు చేసిందని ప్రకాష్ రాజ్ విమర్శించారు.

ఆర్ఎస్ఎస్ కవాతుల్లో కర్రలు పట్టుకుని తిరగడాన్ని కూడా ఆయన ప్రశ్నించారు. ఆ సంస్థలో ఒక్క మహిళా సభ్యురాలు అయినా ఉన్నారా అని అడుగుతూ, మహిళల గౌరవం గురించి మాట్లాడే హక్కు ఆర్ఎస్ఎస్‌కు ఉందా అని నిలదీశారు. వందేళ్లు గడిచినా ఆ సంస్థకు బుద్ధి రాలేదంటూ ఘాటు వ్యాఖ్యలు చేశారు. ఈ వ్యాఖ్యలకు ఏపీ బీజేపీ ఉపాధ్యక్షుడు విష్ణువర్ధన్ రెడ్డి‌ (Vishnuvardhan Reddy) తీవ్రంగా స్పందించారు. ప్రకాష్ రాజ్‌ను “అర్బన్ నక్సలైట్”గా విమర్శిస్తూ సోషల్ మీడియా వేదికగా ఘాటు కౌంటర్ ఇచ్చారు. దీనికి ప్రకాష్ రాజ్ కూడా ఎక్స్‌ (X) వేదికగా వెంటనే స్పందిస్తూ వ్యంగ్యంగా పోస్టు పెట్టారు. దీంతో ఇరువర్గాల మధ్య మాటల యుద్ధం మరింత ముదిరింది.

నక్సలైట్ల ఎన్‌కౌంటర్లను ప్రశ్నిస్తూ ప్రకాష్ రాజ్ చేసిన వ్యాఖ్యలపై విష్ణువర్ధన్ రెడ్డి మండిపడ్డారు. సినిమా డైలాగులు చెప్పడం మాని వాస్తవాలు తెలుసుకోవాలని సూచించారు. ఆర్ఎస్ఎస్ స్వాతంత్ర్య పోరాటంలో పాత్ర లేదనడం చరిత్రను వక్రీకరించడమేనని చెప్పారు. 1921లో డాక్టర్ హెడ్గేవార్‌ (Dr. Hedgewar) జైలుకు వెళ్లిన విషయాన్ని గుర్తు చేస్తూ, పటేల్ నిషేధం విషయమై ఆధారాలు లేవని తేలాక ఆయనే బ్యాన్ తొలగించారని పేర్కొన్నారు.

ఆర్ఎస్ఎస్‌లో మహిళలు లేరన్న ఆరోపణను ఖండిస్తూ, రాష్ట్ర సేవికా సమితి (Rashtra Sevika Samiti) గత 50 ఏళ్లుగా లక్షలాది మహిళలతో పనిచేస్తోందని తెలిపారు. దేశంలో విపత్తులు సంభవించినప్పుడు సేవ చేస్తున్న సంస్థలు ఏవో తెలుసుకోవాలని ప్రకాష్ రాజ్‌కు సూచించారు. మావోయిస్టుల హింసపై కూడా ఆయన ప్రశ్నలు సంధించారు. 2000 నుంచి 2025 వరకు మావోయిస్టు దాడుల్లో వేల మంది పోలీసులు ప్రాణాలు కోల్పోయారని గుర్తు చేశారు. అప్పుడు ఎందుకు ఖండించలేదని నిలదీశారు. మావోయిస్టులను ఎన్‌కౌంటర్ చేయడంపై ప్రకాష్ రాజ్ చేసిన వ్యాఖ్యలకు ప్రతిగా, హింసను ప్రోత్సహించే వారు ఎవరో ప్రజలు గమనిస్తున్నారని విష్ణువర్ధన్ రెడ్డి వ్యాఖ్యానించారు. ఈ మొత్తం పరిణామాలతో ప్రకాష్ రాజ్–బీజేపీ నేతల మధ్య వివాదం రాజకీయంగా మరింత వేడెక్కినట్టు కనిపిస్తోంది.