ట్రంప్ గెలుపు కోసం మస్క్ ఆరాటం.. చట్టాలను సైతం లెక్కచేయని టెస్లా అధినేత..

అమెరికా అధ్యక్ష ఎన్నికల్లో రిపబ్లికన్‌ పార్టీ అభ్యర్థి డొనాల్డ్‌ ట్రంప్‌ విజయం కోసం .. టెస్లా అధినేత ఎలాన్ మస్క్ తీవ్రంగా శ్రమిస్తున్నారు. ట్రంప్ ప్రచారం కోసం మిలియన్ డాలర్లు అందించడమే కాదు. ..స్వయంగా ప్రచారాలు చేస్తూ క్రియాశీలక పాత్ర పోషిస్తున్నారు. ఎన్నికల్లో కీలకమైన స్వింగ్‌ రాష్ట్రాల్లో ప్రతి రోజూ లక్కీ డ్రాలో ఎంపికైన నమోదిత ఓటర్‌కు ఒక మిలియన్‌ డాలర్లు మేర అందిస్తున్నారు. దీనిపై సర్వత్రా విమర్శలు వస్తున్నాయి.

న్యాయశాఖ హెచ్చరికలు బేఖాతర్..

మస్క్ తీరుపై న్యాయశాఖకు ఫిర్యాదులు అందాయి. దీంతో ట్రంప్‌నకు అనుకూలంగా ఓటర్లను మార్చేందుకు మస్క్ ఇస్తున్న తాయిలాలు, ఫెడరల్ ఎన్నికల చట్టాల ఉల్లంఘనల కిందకు వస్తాయని న్యాయశాఖ హెచ్చరించింది. అయినా పట్టించుకోని మస్క్‌ మరికొందరు ఓటర్లకు మిలియన్‌ డాలర్ల సొమ్ము అందించారు. ఈ నేపథ్యంలో న్యాయశాఖ తదుపరి చర్యలేమిటనేది ఆసక్తి కలిగిస్తోంది. న్యాయశాఖ హెచ్చరికలతో బుధవారం నగదు ప్రోత్సాహకాలు ఇవ్వడాన్ని మస్క్‌ ప్రచార బృందం అమెరికా పీఏసీ తాత్కాలికంగా నిలివేసింది. కానీ మళ్లీ గురువారం నుంచి తిరిగి నగదు ప్రోత్సహకాలు ఇవ్వడం ప్రారంభించినట్లు తెలుస్తోంది. గురువారం విస్కాన్ సిన్‌, మిషిగన్‌ రాష్ట్రాల్లో తీసిన లక్కీడ్రాలో ఎంపికైన ఇద్దరు ఓటర్లకు చెరో మిలియన్‌ డాలర్ల చెక్కును అమెరికా పీఏసీ అందించినట్లు సదరు కథనాలు వెల్లడించాయి.

5 ఏళ్లు జైలు శిక్ష పడే అవకాశం…

అమెరికా అధ్యక్ష ఎన్నికల్లో ట్రంప్‌ను గెలిపించేందుకు మస్క్‌ అమెరికా పీఏసీ ప్రచార బృందాన్ని ఏర్పాటు చేశారు. అమెరికాలో వాక్‌ స్వాతంత్య్రం, తుపాకీ హక్కులపై అమెరికా పీఏసీ ఓ పిటిషన్‌ను రూపొందించింది. స్వింగ్‌ రాష్ట్రాల్లో ఈ పిటిషన్‌పై సంతకం చేసిన ప్రతి నమోదిత ఓటరుకు 47 డాలర్లను ఇవ్వనున్నట్లు పీఏసీ ప్రచార బృందం తెలిపింది. అంతేకాకుండా స్వింగ్‌ రాష్ట్రాల్లో నమోదిత ఓటర్ల నుంచి ప్రతి రోజూ లక్కీ డ్రా తీసి ఎంపికైన ఓటర్‌కు ఒక మిలియన్‌ డాలర్లు ఇవ్వనున్నట్లు ప్రకటించింది. శనివారం నుంచి ఈ లక్కీ డ్రా ప్రారంభమైంది. ఇప్పటివరకు పెన్సిల్వేనియా రాష్ట్రంలో ముగ్గురికి, నార్త్‌ కరోలినా రాష్ట్రంలో ఒక ఓటర్‌కు మిలియన్‌ డాలర్ల చొప్పున చెక్కులను అందజేశారు.

ప్రస్తుతం మస్క్‌ ఇస్తోన్న నగదు ప్రోత్సహకాలపై అమెరికా న్యాయ శాఖ విభాగం దర్యాప్తు చేస్తోంది. డబ్బులు ఇవ్వడం ఫెడరల్ ఎన్నికల చట్టాల ఉల్లంఘనల కిందకు వస్తాయని, ఇప్పటికే మస్క్‌ ప్రచార బృందం అమెరికా పీఏసీకి న్యాయశాఖ హెచ్చరిక లేఖ పంపింది. ఇది చట్టవిరుద్ధమని తేలితే మస్క్‌కు ఐదేళ్లు జైలు శిక్ష పడొచ్చని న్యాయ నిపుణులు చెబుతున్నారు.