మే 2న దేశవ్యాప్తంగా ‘ఎమర్జెన్సీ అలర్ట్’ పరీక్ష.. కేంద్రం కీలక ప్రకటన!

SACHET System: దేశవ్యాప్తంగా మే 2, 2026న  లక్షలాది మంది మొబైల్ ఫోన్లలో ఒక్కసారిగా పెద్ద సైరన్ శబ్దం వినిపించే అవకాశం ఉంది. అయితే, ఈ శబ్దం విన్నప్పుడు ప్రజలు ఆందోళన చెందాల్సిన అవసరం లేదని కేంద్ర ప్రభుత్వం స్పష్టం చేసింది. భవిష్యత్తులో ఎదురయ్యే ప్రకృతి విపత్తుల నుంచి ప్రజలను రక్షించేందుకు ప్రభుత్వం సిద్ధం చేసిన ఒక అత్యాధునిక వ్యవస్థ పనితీరును పరీక్షించడమే దీని ముఖ్య ఉద్దేశ్యం.

 ‘సాచెట్’ (SACHET) సిస్టమ్..
వరదలు,  భూకంపాలు లేదా  తుఫానులువంటి అత్యవసర పరిస్థితుల్లో ప్రజలందరినీ ఒకేసారి అప్రమత్తం చేయడానికి టెలికమ్యూనికేషన్ శాఖ , జాతీయ విపత్తు నిర్వహణ సంస్థ (NDMA) కలిసి ‘సాచెట్’ (SACHET) అనే కొత్త హెచ్చరిక వ్యవస్థను రూపొందించాయి. ఈ వ్యవస్థ సరిగ్గా పనిచేస్తుందో లేదో తనిఖీ చేసేందుకు ఈ విచారణ (టెస్ట్) నిర్వహిస్తున్నారు.

 ఫోన్‌లో ఏం జరుగుతుంది?
మీ మొబైల్‌కు ఒక ప్రత్యేక సందేశం (Message) వస్తుంది. ఆ మెసేజ్‌తో పాటు ఒక పెద్ద సైరన్ శబ్దం వినిపిస్తుంది. ఫోన్ ‘సైలెంట్ మోడ్’లో ఉన్నప్పటికీ ఈ శబ్దం వినిపించే అవకాశం ఉంది. ఇది కేవలం పరీక్ష మాత్రమే కాబట్టి, ఆ సందేశం లేదా శబ్దంపై మీరు ఎలాంటి చర్య తీసుకోవాల్సిన పనిలేదు.

కామన్ అలర్టింగ్ ప్రోటోకాల్ ..
ఈ అత్యవసర హెచ్చరిక వ్యవస్థ అంతర్జాతీయ ప్రమాణాలకు అనుగుణంగా ‘కామన్ అలర్టింగ్ ప్రోటోకాల్’ (CAP) ఆధారంగా పనిచేస్తుంది. ప్రస్తుతం ఇది దేశంలోని 36 రాష్ట్రాలు , కేంద్ర పాలిత ప్రాంతాల్లో అందుబాటులో ఉంది.

ప్రమాద సమయంలో కేవలం సెకన్ల వ్యవధిలో వేలాది మందికి సమాచారం చేరుతుంది.

ముందస్తు హెచ్చరికల ద్వారా భారీ ప్రాణ నష్టాన్ని నివారించవచ్చు.

ప్రమాదం పొంచి ఉన్న ప్రాంతాల్లోని ఫోన్లకు మాత్రమే హెచ్చరికలు వెళ్లేలా ఈ టెక్నాలజీని డిజైన్ చేశారు.

రేపు మీ ఫోన్‌లో ‘ఎమర్జెన్సీ అలర్ట్’ అని మెసేజ్ వచ్చినా అది ప్రభుత్వం చేస్తున్న పరీక్ష మాత్రమేనని గుర్తించి, ఈ విషయాన్ని ఇతరులకు కూడా తెలియజేయాలని అధికారులు కోరుతున్నారు.