బాక్సాఫీస్ వద్ద సమంత జోరు.. నిర్మాతలకు కొత్త ధైర్యం ఇచ్చిన ‘మా ఇంటి బంగారం’

సమంత(Samantha) ప్రధాన పాత్రలో తెరకెక్కిన మా ఇంటి బంగారం(Maa Inti Bangaram) తెలుగు బాక్సాఫీస్ వద్ద అనూహ్య విజయాన్ని నమోదు చేసింది. దాదాపు మూడు సంవత్సరాల తర్వాత సమంత నేరుగా తెలుగు ప్రేక్షకుల ముందుకు రావడంతో సినిమాపై మొదటి నుంచే ఆసక్తి కనిపించింది. రిలీజైన‌ తొలి రోజు నుంచే కుటుంబ ప్రేక్షకులు, యూత్ థియేటర్లకు భారీగా తరలివచ్చారు. ముఖ్యంగా తొలి వీకెండ్‌లో సినిమా అద్భుతమైన వసూళ్లను నమోదు చేయగా, మొదటి సోమవారం కూడా కలెక్షన్లు బలంగా కొనసాగడం ట్రేడ్ వర్గాలను ఆశ్చర్యపరిచింది. ఈ స‌క్సెస్ తో సమంతకు తెలుగు రాష్ట్రాల్లో ఉన్న క్రేజ్ ఏమాత్రం తగ్గలేదని మరోసారి రుజువైంది.

ఈ సినిమా విజయంతో తెలుగు చిత్ర పరిశ్రమలో ఒక కొత్త చర్చ మొదలైంది. యాక్షన్ ప్రధానంగా సాగే మహిళా కేంద్రిత కథలకు మార్కెట్ లేదనే అభిప్రాయాన్ని మా ఇంటి బంగారం బలంగా ఖండించినట్లు కనిపిస్తోంది. ముఖ్యంగా యాక్షన్ సన్నివేశాల్లో సమంత చూపించిన నటనకు ప్రేక్షకుల నుంచి ప్రశంసలు లభిస్తున్నాయి. గత కొన్నేళ్లుగా మహిళా ప్రధాన కథల సంఖ్య తగ్గిపోవడంతో పాటు స్టార్ హీరోయిన్లు కూడా అలాంటి ప్రయోగాలకు దూరంగా ఉండటం గమనార్హం.

ఇప్పుడు మా ఇంటి బంగారం విజయం నిర్మాతలు, దర్శకులకు కొత్త ధైర్యాన్ని ఇచ్చే అవకాశాలు కనిపిస్తున్నాయి. మహిళా పాత్రల చుట్టూ తిరిగే కథల్లో కూడా భారీ స్థాయి కమర్షియల్ విజయాలు సాధించవచ్చనే నమ్మకాన్ని ఈ సినిమా కల్పించింది. సమంత కూడా తెలుగు ప్రేక్షకుల్లో తనకు ఉన్న ఆదరణను గుర్తించి మరిన్ని ఆసక్తికరమైన ప్రాజెక్టులను ఎంపిక చేసుకునే అవకాశముంది. అదే సమయంలో ఇతర హీరోయిన్లు కూడా బలమైన మహిళా పాత్రలు, విభిన్న జానర్ల వైపు అడుగులు వేయడానికి ఈ సినిమా ప్రేరణగా నిలవొచ్చని సినీ వర్గాలు భావిస్తున్నాయి.