స‌మంతకు భ‌లే క‌లిసొచ్చిందిగా

సమంత(Samantha) ప్రధాన పాత్రలో తెరకెక్కిన మా ఇంటి బంగారం(Maa Inti Bangaram) బాక్సాఫీస్ వద్ద ఊహించని జోరు చూపిస్తోంది. రిలీజ్ రోజున సినిమా గురించి పూర్తిగా యునానిమ‌స్ ప్రశంసలు రాకపోయినా, ప్రేక్షకుల స్పందన రోజురోజుకూ బలపడుతోంది. రివ్యూలు మిశ్ర‌మంగా వచ్చినప్పటికీ కలెక్షన్లపై వాటి ప్రభావం పెద్దగా కనిపించలేదు. తొలి వారాంతానికే రూ.40 కోట్ల మార్క్ దాటిన ఈ సినిమా, సోమవారం నాటికి రూ.50 కోట్ల క్లబ్‌లోకి అడుగుపెట్టినట్లు ట్రేడ్ వర్గాలు చెబుతున్నాయి. ముఖ్యంగా సమీప భవిష్యత్తులో పెద్ద సినిమాల పోటీ లేకపోవడం మా ఇంటి బంగారంకు అదనపు బలంగా మారింది. మరో వారాంతం కూడా కలిసొస్తే సినిమా మరిన్ని రికార్డుల వైపు వెళ్లే అవకాశం కనిపిస్తోంది.

ఇక జూన్ 26న విడుదల కావాల్సిన లెనిన్(Lenin) జూలై 10కు వాయిదా పడటంతో ఈ నెలాఖరు బాక్సాఫీస్ క్యాలెండర్‌లో ఖాళీ ఏర్పడింది. దీంతో ఆ అవకాశాన్ని రీ రిలీజ్ సినిమాలు పూర్తిగా వినియోగించుకునేందుకు సిద్ధమయ్యాయి. ఒక్కడు(Okkadu), కన్నప్ప(Kannappa), హనుమాన్ 3డి(Hanuman 3D), సినిమా చూపిస్త మావా(Cinema Chupistha mama) వంటి సినిమాలు మళ్లీ ప్రేక్షకుల ముందుకు వస్తున్నాయి. ముఖ్యంగా హనుమాన్ 3డిని కొత్త అనుభూతిగా ప్రమోట్ చేస్తుండగా, కన్నప్పలో ప్రభాస్(Prabhas) క్యామియో మరోసారి ఆసక్తిని రేకెత్తిస్తోంది. అయితే ఈ రీ రిలీజ్‌లకు ప్రేక్షకుల నుంచి ఎంత మేర రెస్పాన్స్ వస్తుందన్నది ఆసక్తికరంగా మారింది.

అయితే ఒకేసారి ఇన్ని రీ రిలీజ్‌లు రావడం వల్ల ప్రేక్షకుల్లో అలసట పెరిగే ప్రమాద‌ముందనే అభిప్రాయాలు కూడా వినిపిస్తున్నాయి. ఇటీవల రీ రిలీజ్ అయిన గౌతమ్ నందా(Gowtham Nanda), అంతకుముందు వచ్చిన కృష్ణ(Krishna), ఊసరవెల్లి(Oosaravelli) వంటి సినిమాలు పెద్దగా ప్రభావం చూపలేకపోయాయి. కొన్ని సెంట‌ర్ల‌లో మినహా ఆశించిన స్థాయిలో ప్రేక్షకాదరణ దక్కలేదు. దీంతో ప్రస్తుతం రాబోతున్న రీ రిలీజ్‌లలో ఏవి నిజంగా బాక్సాఫీస్ వద్ద సందడి చేస్తాయో, ఏవి నిశ్శబ్దంగా వెళ్లిపోతాయో చూడాలి. మొత్తానికి 2026 తొలి అర్ధభాగం చివరి వారం కొత్త సినిమాల కంటే పాత సినిమాల హడావుడికే వేదికగా మారింది.