గ్యాస్ సిలిండర్‌పై కేంద్రం షాకింగ్ రూల్..Aadhaar Biometric లేకపోతే ఇక బుక్ చేయలేరు!
- Published By: Surya Prakash josyula
- October 2, 2026 / 07:24 PM IST
ఇప్పటివరకు ఊరికే ఒక ఫార్మాలిటీలా ఉన్న ఆధార్ కేవైసీ (e-KYC) ఇప్పుడు అత్యంత కీలకంగా మారింది. అక్టోబర్ 1 నుంచి కొత్త నిబంధన అమల్లోకి రావడంతో, బయోమెట్రిక్ ఆధార్ అథెంటికేషన్ పూర్తి చేస్తేనే 14.2 కిలోల గృహ వినియోగ LPG సిలిండర్ సబ్సిడీ ధరకు లభిస్తుంది. ఒకవేళ మీరు ఇంకా ఈ ప్రక్రియ పూర్తి చేయకపోతే గ్యాస్ సబ్సిడీని కోల్పోవాల్సి వస్తుంది.
ఆధార్ బయోమెట్రిక్ చేయకపోతే గ్యాస్ బంద్ అవుతుందా?
చాలామందికి ఉన్న పెద్ద అనుమానం.. ఈ కేవైసీ చేయకపోతే గ్యాస్ సరఫరా పూర్తిగా ఆగిపోతుందా అని! కానీ కంగారు పడాల్సిన పనిలేదు. ఆధార్ అథెంటికేషన్ పూర్తి చేయకపోయినా మీకు గ్యాస్ డెలివరీ అవుతుంది, కాకపోతే సబ్సిడీ లేదా నియంత్రిత ధర వర్తించదు. మీరు మార్కెట్ లో ఉండే పూర్తి ధర చెల్లించి సిలిండర్ కొనుగోలు చేయాల్సి ఉంటుంది. అంతేకాకుండా, సబ్సిడీ లేని వినియోగదారులు 5 కిలోల ఎఫ్‌టీఎల్ సిలిండర్ లేదా 10 కిలోల కాంపోజిట్ ఫైబర్ సిలిండర్లను ఆయిల్ కంపెనీల యాప్స్, వెబ్‌‌సైట్లు లేదా వాట్సాప్ బాట్ ద్వారా ఎంచుకుని రీఫిల్ చేసుకునే సౌలభ్యం కూడా ఉంది.
ఈ కొత్త నిబంధన వెనుక ఉన్న అసలు కారణం ఏంటి?
సబ్సిడీ సొమ్ము నిజమైన లబ్ధిదారులకు మాత్రమే చేరాలనే ఉద్దేశంతో ప్రభుత్వం ఈ నిర్ణయం తీసుకుంది. గృహ అవసరాల కోసం ఇచ్చే సబ్సిడీ సిలిండర్లను కమర్షియల్, ఇండస్ట్రియల్ అవసరాలకు వాడకుండా అడ్డుకోవడం, అలాగే నకిలీ లేదా ఒకే ఇంట్లో ఉన్న అదనపు కనెక్షన్లను తొలగించడం దీని ముఖ్య ఉద్దేశం. పెట్రోలియం మంత్రిత్వ శాఖ లెక్కల ప్రకారం సెప్టెంబర్ 19 నాటికే దేశంలో దాదాపు 89.9 శాతం మంది అంటే 27.43 కోట్ల మంది వినియోగదారులు ఆధార్ అథెంటికేషన్ పూర్తి చేసుకున్నారు. వీరంతా మళ్లీ కొత్తగా ఏమీ చేయాల్సిన అవసరం లేదు, ఎప్పటిలాగే తమ సబ్సిడీ సిలిండర్లను బుక్ చేసుకోవచ్చు.
ఆధార్ అథెంటికేషన్ ఎలా పూర్తి చేసుకోవాలి?
ఇంకా ఆధార్ e-KYC పూర్తి చేయనివారు ఆందోళన చెందకుండా సులభంగానే ఈ పని పూర్తి చేయవచ్చు. దీనికోసం ప్రభుత్వం మూడు మార్గాలను అందుబాటులోకి తెచ్చింది.
ఇంటికి LPG సిలిండర్ డెలివరీ ఇచ్చే సమయంలో డెలివరీ బాయ్ వద్ద ఉండే పరికరం ద్వారా బయోమెట్రిక్ ఇవ్వవచ్చు.
మీ పరిధిలోని గ్యాస్ డిస్ట్రిబ్యూటర్ షోరూమ్‌కి నేరుగా వెళ్లి పూర్తి చేసుకోవచ్చు.
మీ గ్యాస్ ఏజెన్సీకి సంబంధించిన అధికారిక మొబైల్ యాప్స్ (ఇండేన్ కోసం IndianOil ONE, భారత్ గ్యాస్ కోసం HelloBPCL, హెచ్‌పీ కోసం HP PAY) ద్వారా ఇంట్లో కూర్చునే అథెంటికేషన్ ప్రక్రియను ముగించవచ్చు.
సబ్సిడీ వివరాలు & అక్టోబర్ 1 LPG ధరల మార్పులు
ప్రస్తుతం 14.2 కిలోల డొమెస్టిక్ సిలిండర్‌పై ప్రభుత్వం ఇచ్చే ఇంప్లిసిట్ సబ్సిడీ సుమారు రూ.210గా ఉంది. అయితే ఇది నేరుగా వినియోగదారుల బ్యాంక్ ఖాతాలో పడే మొత్తం కాదని గమనించాలి. మరొకవైపు, కొత్త ఆధార్ నిబంధనతో పాటే అక్టోబర్ 1న సిలిండర్ల ధరలు కూడా మారాయి. ఢిల్లీలో 19 కిలోల కమర్షియల్ సిలిండర్ ధర రూ.62.50 పెరిగి రూ.2,810కి చేరగా, 5 కిలోల FTL సిలిండర్ ధర రూ.15.50 పెరిగి రూ.779.50కి చేరింది. అయితే సాధారణ గృహ వినియోగ 14.2 కిలోల సిలిండర్ ధరలో మాత్రం ఎలాంటి మార్పూ లేదు. కాబట్టి సబ్సిడీ ధరకే గ్యాస్ పొందాలనుకునేవారు వెంటనే తమ ఆధార్ బయోమెట్రిక్ కేవైసీని పూర్తి చేసుకోవడం మంచిది.
