అమెరికా గ్రీన్ కార్డ్ క్యూలో గేమ్ మారిందా? ఇండియన్స్ కి కొత్త Visa Bulletin‌ లో ట్విస్ట్ ఇదే!!

—సూర్య ప్రకాష్ జోశ్యుల

అమెరికాలో ఉద్యోగం చేస్తూ, అక్కడే స్థిరపడాలని కంటున్న వేలాది మంది భారతీయులకు ప్రతి నెలా వచ్చే ‘US Visa Bulletin’ ఒక పెద్ద మైలురాయిలాంటిది. ఏళ్లుగా ఎదురుచూస్తున్న వారికి ఈ బులెటిన్‌లో తేదీ ఒక్క రోజు ముందుకు కదిలినా అది కొండంత సంతోషాన్ని ఇస్తుంది. ఈ క్రమంలో అక్టోబర్ 2026కు సంబంధించిన తాజా వీసా బులెటిన్ వచ్చేసింది. అమెరికాలో కొత్త ఫిస్కల్ ఇయర్ 2027 ప్రారంభం కావడంతో కొన్ని గ్రీన్ కార్డ్ కేటగిరీల్లో మంచి కదలికే కనిపిస్తోంది. ముఖ్యంగా EB-1, EB-4 కేటగిరీల్లో ఉన్న భారతీయులకు ఇది ఊరటనిచ్చే విషయమే అయినప్పటికీ, మెజారిటీ భారతీయులు ఏళ్ల తరబడి ఎదురుచూస్తున్న EB-2, EB-3 కేటగిరీల్లో మాత్రం ఎలాంటి మార్పు లేకపోవడం నిరాశ పరిచే అంశం. అంటే కొత్త ఫిస్కల్ ఇయర్ తలుపులు తెరిచింది కానీ, అది అందరి కోసం కాదు.

EB-1, EB-4 దరఖాస్తుదారులకు బిగ్ రిలీఫ్

ఈసారి అక్టోబర్ బులెటిన్‌లో భారతీయ EB-1 దరఖాస్తుదారులకు చాలా మంచి వార్తే లభించింది. వీరికి సంబంధించి ‘Final Action Date’ ఇంతకుముందు 2022 అక్టోబర్ 15గా ఉండేది, ఇప్పుడు అది ఏకంగా 2023 ఫిబ్రవరి 1కి చేరుకుంది. అంటే దాదాపు మూడు నెలల కంటే ఎక్కువగానే ముందుకు కదిలింది. సాధారణంగా తమ రంగాల్లో అసాధారణ ప్రతిభ ఉన్నవారు, ప్రొఫెసర్లు, పరిశోధకులు, మల్టీనేషనల్ కంపెనీల టాప్ ఎగ్జిక్యూటివ్‌లు ఈ కేటగిరీ కిందకే వస్తారు కాబట్టి వీరికి ఇది పెద్ద ఊరట. ఇక EB-4 కేటగిరీ విషయానికి వస్తే, తేదీ 2022 అక్టోబర్ 15 నుండి 2022 డిసెంబర్ 15కి (రెండు నెలలు) ముందుకు జరిగింది. దీనితో పాటు సంస్థల్లో పనిచేసే వర్కర్ల కేటగిరీ కూడా ఇదే తేదీకి చేరుకోవడంతో, అక్టోబర్‌లో ప్రధాన కదలికలన్నీ ఈ రెండు కేటగిరీల చుట్టూనే కనిపించాయి.

ఆశలు రేపిన EB-2, EB-3.. కానీ మళ్లీ అదే నిరాశ!

అమెరికాలో గ్రీన్ కార్డ్ క్యూలో ఉన్న భారతీయులలో అత్యధికులు ఉండేది EB-2, EB-3 కేటగిరీల్లోనే. కొత్త ఫిస్కల్ ఇయర్ రాగానే తమ ప్రాసెస్ వేగవంతం అవుతుందని ఆశగా ఎదురుచూసిన ఈ వర్గానికి తాజా బులెటిన్ బ్రేక్ వేసింది. అక్టోబర్‌లో EB-2 దరఖాస్తుదారులకు ‘Final Action Date’ నవంబర్ 1, 2013 దగ్గరే ఆగిపోగా, EB-3కి జనవరి 1, 2014 దగ్గరే స్థిరంగా ఉండిపోయింది. అంటే గత నెల ఉన్న తేదీల నుంచి ఒక్క అడుగు కూడా ముందుకు పడలేదు. కొత్త ఆర్థిక సంవత్సరం మొదలైనంత మాత్రాన ఈ కేటగిరీల్లో ఉన్నవారి ప్రాసెస్ వెంటనే స్పీడందుకోదని, వీరి నిరీక్షణ ఇంకా కొనసాగుతుందనే విషయాన్ని ఇది స్పష్టం చేస్తోంది.

అసలు ట్విస్ట్ ‘Dates for Filing’లోనే ఉంది!

ఈ అక్టోబర్ వీసా బులెటిన్‌ను జాగ్రత్తగా గమనిస్తే అసలైన ఆసక్తికరమైన మార్పు ‘Final Action Date’లో కాకుండా ‘Dates for Filing’లో కనిపిస్తుంది. EB-1 కేటగిరీకి ఇదివరకు Dates for Filing 2023 డిసెంబర్ 1గా ఉంటే, ఇప్పుడు ఏకంగా 2024 జూలై 1కి (ఏడు నెలలు ముందుకు) వచ్చింది. ఇక EB-4లో అయితే గతంలో ఉన్న 2023 జనవరి 1 స్థానంలో కొత్త తేదీ 2025 జనవరి 1గా నమోదైంది. అంటే ఏకంగా రెండేళ్ల ముందడుగు పడింది. దీనివల్ల అర్హత ఉన్న మరింత మంది భారతీయ దరఖాస్తుదారులు తమ ‘Adjustment of Status’ అప్లికేషన్లను సమర్పించడానికి మార్గం సుగమం అవుతుంది.

అప్లికేషన్ ఫైలింగ్‌కు, గ్రీన్ కార్డ్ ఆమోదానికి ఉన్న తేడా ఏమిటి?

చాలామందికి ఈ రెండు తేదీల మధ్య తేడాపై గందరగోళం ఉంటుంది. సాధారణంగా ‘Dates for Filing’ అనేది మీ Priority Date ఆధారంగా Adjustment of Status లేదా ఇమ్మిగ్రెంట్ వీసా అప్లికేషన్‌ను ఎప్పుడు ఫైల్ చేయవచ్చో చెప్తుంది. అంటే మీరు ప్రాసెస్ తదుపరి దశకు వెళ్లడానికి ఇది ఉపయోగపడుతుంది. కానీ ‘Final Action Date’ అనేది మీ గ్రీన్ కార్డ్ అధికారిక ఆమోదానికి సంబంధించిన క్యూ లైన్‌ను సూచిస్తుంది. కాబట్టి ఫైలింగ్ తేదీలు ముందుకు వచ్చాయి కదా అని వెంటనే గ్రీన్ కార్డ్ వచ్చేస్తుందని అనుకోకూడదు, ఇది కేవలం అప్లికేషన్ ప్రాసెస్ ప్రారంభించడానికి ఇచ్చే అనుమతి మాత్రమే.

కుటుంబ ఆధారిత గ్రీన్ కార్డుల పరిస్థితి ఇది

ఉద్యోగ ఆధారిత వీసాలతో పోలిస్తే ఫ్యామిలీ గ్రీన్ కార్డ్ కేటగిరీలలో మార్పులు చాలా స్వల్పంగానే ఉన్నాయి. గ్రీన్ కార్డ్ హోల్డర్ల భాగస్వాములు, పిల్లలకు సంబంధించిన F2A కేటగిరీ Final Action Date 2026 ఆగస్టు 22 నుండి సెప్టెంబర్ 22కి (ఒక నెల) ముందుకు జరిగింది. అమెరికా పౌరుల సోదర సోదరీమణుల F4 కేటగిరీలో తేదీ 2006 నవంబర్ 1 నుండి డిసెంబర్ 15కి సవరించబడింది. Dates for Filing విషయానికి వస్తే F4 కేటగిరీ 2007 ఫిబ్రవరి 1కి మారగా, F2A మాత్రం కరెంట్‌‌లోనే కొనసాగుతోంది. మిగిలిన F1, F2B, F3 కేటగిరీలలో ఎలాంటి పెద్ద మార్పులు నమోదు కాలేదు.

అక్టోబర్‌లో కదలిక వెనుక ఉన్న కారణాలు & రాబోయే రోజుల్లో ఏం జరగొచ్చు?

అమెరికాలో కొత్త ఫిస్కల్ ఇయర్ ప్రతి ఏటా అక్టోబర్ 1 నుంచి ప్రారంభమవుతుంది. ఈ సమయంలోనే ఆ సంవత్సరానికి సంబంధించిన వార్షిక ఇమ్మిగ్రెంట్ వీసా కోటాలు కొత్తగా అందుబాటులోకి వస్తాయి. అందుకే గత ఏడాది కోటా పూర్తికావడం వల్ల ఆగిపోయిన కొన్ని కేటగిరీల తేదీలను అక్టోబర్‌లో ముందుకు జరుపుతారు. అయితే ఈ అక్టోబర్‌లో కనిపిస్తున్న వేగం సంవత్సరం పొడవునా ఇలాగే ఉంటుందని చెప్పలేం. పాత అప్లికేషన్ల సంఖ్య, కొత్తగా వచ్చే డిమాండ్, ఈ వీసాలను ఎంత వేగంగా వాడుతున్నారు అనేదానిపైనే రాబోయే నెలల వేగం ఆధారపడి ఉంటుంది. ఒక్కోసారి డిమాండ్ ఎక్కువైతే తేదీలు నెమ్మదించడం లేదా వెనక్కి వెళ్లడం (Retrogressing) కూడా జరుగుతుంటుంది.

మొత్తానికి ఈ అక్టోబర్ 2026 వీసా బులెటిన్ భారతీయులకు పూర్తిగా తీపి వార్త కాకపోయినా, అలాగని పూర్తిగా చేదు వార్తా కాదు. గ్రీన్ కార్డ్ రేసులో కొన్ని వర్గాలకు తలుపులు తెరుచుకున్నాయి, మరికొందరికి మాత్రం నిరీక్షణ తప్పలేదు. రాబోయే నెలల్లో ఈ క్యూ లైన్ ఎంత వేగంగా ముందుకు కదులుతుందో వేచి చూడాలి.