తాతతో కలిసి తిరుమల శ్రీవారి సేవలో ఉపాసన కొణిదెల

మెగా పవర్ స్టార్ రామ్ చరణ్(ram charan) భార్య‌, అపోలో హాస్పిటల్స్(Apollo hospitals) ఫ్యామిలీకి చెందిన ఉపాసన కొణిదెల(Upasana Konidela) తన ఫ్యామిలీతో కలిసి ఆధ్యాత్మిక యాత్ర చేపట్టారు. అపోలో హాస్పిటల్స్ వ్యవస్థాపక ఛైర్మన్, తన తాత డాక్టర్ ప్రతాప్ సి. రెడ్డి(Prathap C. Reddy)తో కలిసి తిరుమల శ్రీ వేంకటేశ్వర స్వామివారిని దర్శించుకున్నారు. కలియుగ ప్రత్యక్ష దైవంగా కొలిచే శ్రీవారి సన్నిధిలో తాతా మనవరాళ్లు ప్రత్యేక పూజలు నిర్వహించి స్వామివారి ఆశీస్సులు అందుకున్నారు. ఈ సందర్భంగా ఆలయానికి చేరుకున్న వారికి టీటీడీ అధికారులు సంప్రదాయబద్ధంగా స్వాగతం పలికారు.

దర్శనానంతరం ఆలయ సంప్రదాయాల ప్రకారం పలు కార్యక్రమాలు నిర్వహించారు. రంగనాయకుల మండపంలో వేద పండితులు డాక్టర్ ప్రతాప్ సి. రెడ్డి, ఉపాసనలకు వేదాశీర్వచనం అందించారు. త‌ర్వాత ఆలయ అధికారులు వారికి శ్రీవారి తీర్థప్రసాదాలను అందజేశారు. తిరుమల క్షేత్రంలో భక్తిశ్రద్ధలతో గడిపిన వారి పర్యటన ప్రత్యేక ఆకర్షణగా నిలిచింది. ప్రముఖ పారిశ్రామికవేత్తగా గుర్తింపు పొందిన ప్రతాప్ సి. రెడ్డి, ఆయన మనవరాలు ఉపాసన కలిసి స్వామివారిని దర్శించుకోవడం విశేషంగా మారింది.

మరోవైపు, ఉపాసన తన కుటుంబ సంప్రదాయాలకు, ఆధ్యాత్మిక విలువలకు ప్రాధాన్యం ఇస్తుంటారు. వ్యాపార, సామాజిక కార్యక్రమాలతో బిజీగా ఉన్నప్పటికీ కుటుంబ సభ్యులతో కలిసి పుణ్యక్షేత్రాలను సందర్శించడం ప్రాధాన్యం సంతరించుకుంది. తాతతో కలిసి తిరుమలలో శ్రీవారి ఆశీస్సులు అందుకున్న సందర్భంపై అభిమానులు, నెటిజన్లు సంతోషం వ్యక్తం చేస్తున్నారు. వారి తిరుమ‌ల‌ పర్యటనకు సంబంధించిన వివరాలు ప్రస్తుతం ఆసక్తికరంగా మారాయి.