FIFA World Cup: ఫిఫా ప్రపంచకప్ విజేతకు భారీ ప్రైజ్ మనీ..!

2026 ఫుట్‌బాల్‌ ప్రపంచకప్‌ విజేత జట్టుకు .. రికార్డ్ స్థాయిలో రూ.451 కోట్ల ప్రైజ్‌మనీ దక్కనుంది. 2022 ప్రపంచకప్‌ గెలిచిన అర్జెంటీనాకు రూ.379 కోట్లు లభించాయి. గత కప్‌తో పోలిస్తే ఈసారి మొత్తం నగదు బహుమతిని ఫిఫా 48.9 శాతం పెంచింది. 2022 కప్‌లో మొత్తం ప్రైజ్‌మనీ 3971 కోట్లు కాగా.. ఈసారి రూ.5911 కోట్లకు పెరిగింది.

గ్రూప్‌ దశలో పోటీపడే 48 జట్లకు రూ.81 కోట్ల చొప్పున దక్కనున్నాయి. ఈ టోర్నీ సన్నద్ధత కోసం ప్రతి జట్టుకు రూ.13.53 కోట్లు లభిస్తాయి. రౌండ్‌ ఆఫ్‌ 32 దశకు చేరే జట్లకు రూ.99.27 కోట్లు చొప్పున.. ప్రిక్వార్టర్స్‌లో ప్రవేశించే టీమ్‌లకు రూ.135 కోట్ల చొప్పున లభిస్తాయి. క్వార్టర్స్‌ చేరే జట్లకు రూ.171 కోట్ల చొప్పున దక్కుతాయి. నాలుగో స్థానంలో నిలిచే జట్టు రూ.243 కోట్లు, మూడో స్థానాన్ని సాధించే టీమ్‌ రూ.261 కోట్లు సంపాదిస్తాయి. రన్నరప్‌కు రూ.297 కోట్లు లభిస్తాయి.

ప్రపంచకప్‌ విజేతతో పోలిస్తే క్లబ్‌ ప్రపంచకప్‌లో గెలిచే జట్టుకే ఎక్కువ నగదు బహుమతి దక్కుతోంది. 2025 క్లబ్‌ ప్రపంచకప్‌ నెగ్గిన చెల్సీకి రూ.1128 కోట్లు లభించాయి. జాతీయ జట్లతో పోలిస్తే క్లబ్‌ జట్ల నిర్వహణకు ఎక్కువ ఖర్చులు అవుతుండడంతో ఫిఫా అందుకు తగ్గట్టే ప్రైజ్‌మనీ ఇస్తోంది.

ప్రపంచవ్యాప్తంగా ఫుట్ బాల్ కు విపరీతమైన క్రేజ్ ఉంది. దీనిలో భాగంగా ప్రపంచకప్ పోటీల్లో గెల్చేందుకు .. ఫుట్ బాల్ ఆడే అన్ని దేశాలు ప్రయత్నాలు చేస్తుంటాయి. దీనికి తగ్గట్లే ఫిఫా సైతం.. ఆటకు ఆదరణ పెంచేందుకు ప్రయత్నిస్తోంది. ఫుట్ బాల్ ఆడని దేశాల్లో సైతం.. ఆటపట్ల ఆసక్తి పెంచేందుకు అన్ని రకాలుగా ప్రయత్నాలు చేస్తోంది కూడా. దీనికి తగ్గట్లుగా ఫుట్ బాల్ ఫ్రాంచైజీలు, క్లబ్బులు.. పోటాపోటీగా తలపడుతుంటాయి. వాటికి ప్రత్యేకంగా అభిమానగణం కూడా ఉంది.