కాళేశ్వరం చుట్టూ కాక రేపుతున్న రాజకీయం!
- Published By: Vasishta
- July 6, 2026 / 10:20 AM IST
కాళేశ్వరం ప్రాజెక్టు చుట్టూ అధికార కాంగ్రెస్, ప్రతిపక్ష బీఆర్ఎస్ మధ్య మాటల యుద్ధం ముదిరి పాకాన పడింది. రాష్ట్రంలో నెలకొన్న కరవు పరిస్థితులు, గోదావరి జలాలు సముద్రం పాలవుతున్న తీరుపై ఇరు పక్షాలు పరస్పరం విమర్శనాస్త్రాలు సంధించుకుంటున్నాయి. కన్నెపల్లి పంపుహౌస్ను ఆన్ చేసి రైతాంగానికి నీరందించాలని బీఆర్ఎస్ డిమాండ్ చేస్తుండగా, భద్రతా కారణాల దృష్ట్యా అది అసాధ్యమని కాంగ్రెస్ ప్రభుత్వం స్పష్టం చేస్తోంది. ఈ నేపథ్యంలో కాళేశ్వరం ప్రాజెక్టు పునరుద్ధరణ, నీటి ఎత్తిపోతలపై ఇరు పార్టీల వాదనలు, క్షేత్రస్థాయి పరిస్థితులపై సర్వత్రా ఉత్కంఠ నెలకొంది.
కేటీఆర్ నేతృత్వంలోని బీఆర్ఎస్ పార్టీ నేతల బృందం జయశంకర్ భూపాలపల్లి జిల్లా మహదేవపూర్ మండలం కాళేశ్వరం ప్రాజెక్టులోని కన్నెపల్లి పంపుహౌస్ను స్వయంగా పరిశీలించింది. సూపర్ ఎల్నినో, కరవు పరిస్థితుల వల్ల తెలంగాణ రైతాంగం తీవ్ర ఇబ్బందులు పడుతోందని కేటీఆర్ ఆందోళన వ్యక్తం చేశారు. కళ్లముందే లక్ష క్యూసెక్కుల గోదావరి నీరు దిగువకు వృథాగా వెళ్లి సముద్రంలో కలుస్తున్నా ప్రభుత్వం స్పందించడం లేదని విమర్శించారు.
మేడిగడ్డ బ్యారేజీలో రెండు పిల్లర్లు దెబ్బతిని 31 నెలలు గడుస్తున్నా కాంగ్రెస్ ప్రభుత్వం ఇంతవరకు శాశ్వత మరమ్మతులు చేపట్టలేదని కేటీఆర్ విమర్శించారు. బ్యారేజీ పరిస్థితితో సంబంధం లేకుండానే కన్నెపల్లి మోటార్లు ఆన్ చేసి నీటిని ఎత్తిపోయడానికి సాంకేతికంగా వీలుందని చెప్పారు. కాళేశ్వరం ప్రాజెక్టు ద్వారా రోజూ రెండు టీఎంసీల నీటిని ఎత్తిపోసి కరవును అధిగమించొచ్చు అని కేటీఆర్ స్పష్టం చేశారు. ప్రభుత్వం ఇప్పటికైనా దిగిరాకపోతే బీఆర్ఎస్ అధినేత కేసీఆర్తో చర్చించి, 50 వేల మందితో కాళేశ్వరాన్ని ముట్టడించి, మోటార్లు ఆన్ చేసి నీటిని ఎత్తిపోస్తామని కేటీఆర్ హెచ్చరించారు. రేవంత్రెడ్డి ప్రభుత్వానికి చేతకాకపోతే, వారంపాటు ప్రాజెక్టును కేసీఆర్కు అప్పగిస్తే అన్నదాతలకు నీరందిస్తామని సవాల్ విసిరారు.
బీఆర్ఎస్ ఆరోపణలను నీటిపారుదల శాఖ మంత్రి ఉత్తమ్కుమార్రెడ్డి తీవ్రంగా ఖండించారు. బీఆర్ఎస్ హయాంలో జరిగిన కమీషన్ల కక్కుర్తి, నాసిరకం నిర్మాణం వల్లే ప్రాజెక్టుకు గుండెకాయ వంటి మేడిగడ్డ బ్యారేజీ కుంగిపోయిందని, అన్నారం, సుందిళ్ల బ్యారేజీలు కూడా పనికిరాకుండా పోయాయని ఆరోపించారు. పవర్పాయింట్ ప్రజంటేషన్ ద్వారా ప్రాజెక్టు ప్రస్తుత స్థితిని, సాంకేతిక అడ్డంకులను ప్రభుత్వం వివరించింది.
నేషనల్ డ్యామ్ సేఫ్టీ అథారిటీ ఆదేశాల ప్రకారం మేడిగడ్డ బ్యారేజీ గేట్లను పూర్తిగా తెరిచి ఉంచాలని, భూ భౌతిక పరీక్షలు పూర్తయ్యాకే మరమ్మతులు చేపట్టాలని ఉత్తమ్ వివరించారు. పంపుహౌస్లు నడపాలంటే బ్యారేజీల్లో నీటి మట్టాన్ని గణనీయంగా పెంచాల్సి ఉంటుంది. దెబ్బతిన్న బ్యారేజీల్లో నీటిని నిలిపితే అవి పూర్తిగా కొట్టుకుపోయే ప్రమాదం ఉంది. అదే జరిగితే మేడిగడ్డ దిగువన ఉన్న గ్రామాలతో పాటు భద్రాచలం పట్టణం కూడా జలమయమవుతుందని ప్రభుత్వం హెచ్చరించింది. ప్రాజెక్టు అంచనా వ్యయం రూ.1.50 లక్షల కోట్లకు చేరిందని, ఇంత ఖర్చు చేసినా కొత్తగా ఒక్క ఎకరాకు కూడా సాగునీరు ఇవ్వలేదన్న కాగ్ నివేదికలను మంత్రి లేవనెత్తారు. డిజైన్లు పూర్తికాగానే పునరుద్ధరణ పనులు ప్రారంభించి, మూడు బ్యారేజీలకు డయాఫ్రం వాల్ నిర్మించి వచ్చే వానాకాలం నాటికి వినియోగంలోకి తెస్తామని స్పష్టం చేశారు.
ఈ వివాదం కేవలం మాటలకే పరిమితం కాకుండా క్షేత్రస్థాయిలో ఉద్రిక్తతలకు దారితీసింది. పర్యటనకు బయలుదేరిన కేటీఆర్ కాన్వాయ్ను జనగామ జిల్లా పెంబర్తి వద్ద, అనంతరం కోమాళ్ల టోల్గేట్ వద్ద పోలీసులు నియంత్రించడం బీఆర్ఎస్ శ్రేణుల ఆగ్రహానికి కారణమైంది. కన్నెపల్లి పంప్హౌస్ వద్ద బీఆర్ఎస్ ఎమ్మెల్యేలు గంగుల కమలాకర్, పాడి కౌశిక్రెడ్డి స్వయంగా బారికేడ్లను తొలగించడంతో పోలీసులకు, కార్యకర్తలకు మధ్య తోపులాట జరిగింది.
కాళేశ్వరం ప్రాజెక్టు చుట్టూ నడుస్తున్న ఈ రాజకీయం రైతుల ప్రయోజనాలకు, సాంకేతిక నిబంధనలకు మధ్య నలిగిపోతోంది. ఒకవైపు కరవుతో నీటి అవసరం అత్యంత కీలకంగా మారగా, మరోవైపు మానవ తప్పిదాల వల్ల దెబ్బతిన్న బ్యారేజీల భద్రత ప్రభుత్వానికి సవాలుగా నిలిచింది. అంతిమంగా ఎన్డీఎస్ఏ నివేదికలు, నిపుణుల కమిటీల సూచనల ప్రకారమే ప్రాజెక్టు భవిష్యత్తు ఆధారపడి ఉంటుంది.
