YCP: ఎన్నికల కమిషన్ సహకారం లేకపోవడంపై వైసీపీ అసంతృప్తి..

ఉమ్మడి కడప జిల్లాలో (Kadapa District) జరిగిన పులివెందుల (Pulivendula), ఒంటిమిట్ట (Ontimitta) జడ్పీటీసీ ఉప ఎన్నికల ఫలితాలు వైసీపీకి పెద్ద షాక్ ఇచ్చాయి. ఎప్పటిలాగే తమ ఆధిపత్యం కొనసాగుతుందని భావించిన వైసీపీ నాయకులు, ఈసారి విరుద్ధ ఫలితాలు రావడంతో తీవ్ర ఆవేదన వ్యక్తం చేస్తున్నారు. ముఖ్యంగా ఎన్నికల కమిషన్ (Election Commission) నుంచి ఆశించిన మద్దతు అందకపోవడం ఓటమికి కారణమని వారు ఆత్మపరిశీలన చేస్తున్నారని తెలుస్తోంది. ప్రభుత్వంగా అన్ని ఏర్పాట్లు చేసినప్పటికీ, పోలింగ్ రోజున తాము అనుకున్న వాతావరణం ఏర్పడలేదని వారి వాదన. ఈ పరిస్థితుల్లో తాము నిలబెట్టుకున్న గడపలు కూలిపోయాయని పార్టీ నేతలు అనుకుంటున్నారు.

ప్రస్తుతం రాష్ట్ర ఎన్నికల కమిషనర్‌గా (State Election Commissioner) నీలం సాహ్ని (Neelam Sahni) ఉన్నారు. వైసీపీ ప్రభుత్వం కాలంలో ప్రధాన కార్యదర్శిగా పనిచేసిన ఆమె రిటైర్మెంట్ అనంతరం కమిషనర్‌గా నియమితులయ్యారు. గతంలో నిమ్మగడ్డ రమేష్ (Nimmagadda Ramesh) తో వైసీపీకి విభేదాలు రావడంతో, తమ మాట వింటారనే నమ్మకంతోనే నీలం సాహ్నిని ఎంపిక చేశారని చెప్పుకుంటారు. కానీ ఇప్పుడు కమిషన్ నుంచి అనుకున్న సహకారం అందకపోవడంతో పార్టీ వర్గాల్లో అసంతృప్తి వ్యక్తమవుతోంది.

ఈ ఉప ఎన్నికల్లో అధికార పార్టీ పలు అక్రమాలకు పాల్పడిందని వైసీపీ చేసిన ఫిర్యాదులను కమిషన్ పట్టించుకోలేదని ఆరోపణలు ఉన్నాయి. పోలింగ్ కేంద్రాల వద్ద అవకతవకలు జరిగాయని ఆధారాలు చూపించినా వాటిని పట్టించుకోలేదని నేతలు మండిపడుతున్నారు. అంతేకాదు, తమకే అనుకూలంగా ఉంటుందని నమ్మిన కమిషన్ ఎందుకు ఇలా వ్యవహరించిందని లోలోపల అనుమానాలు వ్యక్తం చేస్తున్నారు.

హైకోర్టు (High Court) లో కూడా వైసీపీ పిటిషన్ వేసింది. రీపోలింగ్ జరగాలని కోరినా, న్యాయస్థానం ఎన్నికల ప్రక్రియలో జోక్యం చేసుకోలేమని స్పష్టం చేసింది. దీంతో కౌంటింగ్ పూర్తయి ఫలితాలు ప్రకటించబడ్డాయి. ముఖ్యంగా మాజీ సీఎం జగన్ (Jagan Mohan Reddy) స్వస్థలమైన పులివెందులలో ఓటమి వాటిల్లడం పార్టీకి మరింత నిరాశ కలిగించింది.

వైసీపీ నేతలు పోలింగ్ సమయంలో పక్క మండలాల నుంచి వచ్చిన వారు స్థానికుల పేర్లతో ఓటేశారు అని వీడియోలు, ఫోటోలు విడుదల చేశారు. అయితే ఇవి మార్ఫింగ్ చేసినవని టీడీపీ (TDP) తీవ్ర ప్రతిస్పందన వ్యక్తం చేస్తోంది. అంతేకాదు, మాజీ మంత్రి అంబటి రాంబాబు (Ambati Rambabu) షేర్ చేసిన ఒక వీడియో పశ్చిమ బెంగాల్‌ (West Bengal) కి సంబంధించినదని చూపిస్తూ టీడీపీ ఎద్దేవా చేసింది.

ఇక తమ వాదన సబబు అని నిరూపించుకోవడానికి ఎన్నికల కమిషన్ వద్ద వెబ్ కాస్టింగ్ వీడియోలు, సీసీ కెమెరా రికార్డింగులు, పోలింగ్ అధికారి డైరీలు, ఏజెంట్ల జాబితాలు, ఫామ్-12, ఫామ్-32 వంటి వివరాలు ఇవ్వాలని వైసీపీ విజ్ఞప్తి చేసింది. అయితే విశ్లేషకులు దీన్ని ఓటమి దాచుకోవడానికి చేసిన ప్రయత్నంగా చూస్తున్నారు. పోలింగ్ రోజున ఎలాంటి అల్లర్లు జరగలేదని, జరగుంటే మీడియాలో తప్పకుండా వచ్చేదని టీడీపీ వర్గాలు చెబుతున్నాయి. కొన్ని సంవత్సరాలుగా తమ అడ్డాగా ఉన్న ప్లేస్ లో ఎదురైన ఈ ఓటమి తర్వాత వైసీపీ కొత్త వ్యూహం ఏమిటి, ఎన్నికల కమిషన్ నుంచి తెచ్చుకున్న సమాచారం ఆధారంగా ఏమి చేయబోతోందనే అంశం రాజకీయ వర్గాల్లో ఆసక్తి రేపుతోంది.