YSRCP: సింగయ్య కుటుంబానికి వైసీపీ ఆర్థిక సాయం..!

పల్నాడు (Palnadu) జిల్లా సత్తెనపల్లిలో (Sattenapalli) వైసీపీ (YCP) అధినేత, మాజీ ముఖ్యమంత్రి వైఎస్ జగన్మోహన్ రెడ్డి (YS Jagan) పర్యటన సందర్భంగా జరిగిన దుర్ఘటనల్లో ఇద్దరు వ్యక్తులు మరణించారు. జగన్ కాన్వాయ్‌లోని ఒక వాహనం ఢీకొనడం వల్ల వెంగళాయపాలెంకు చెందిన 53 ఏళ్ల సింగయ్య (Singaiah) అనే వైసీపీ కార్యకర్త మృతి చెందాడు. ఈ ఘటనపై టీడీపీ (TDP) తీవ్ర విమర్శలు గుప్పించడంతో రాజకీయ రగడ మరింత ఉద్ధృతమైంది. అయితే, సింగయ్య కుటుంబానికి వైసీపీ నాయకులు ఇవాళ రూ.10 లక్షల ఆర్థిక సాయం అందజేయడంతో ఈ వివాదానికి తెర దించే ప్రయత్నం జరిగింది.

ఈనెల 18న జగన్మోహన్ రెడ్డి పల్నాడు జిల్లాలోని రెంటపాళ్ల గ్రామానికి వెళ్లారు. గతేడాది జూన్ 11న ఆత్మహత్య చేసుకున్న వైసీపీ ఉప సర్పంచ్ కొర్లకుంట నాగమల్లేశ్వర రావు కుటుంబాన్ని పరామర్శించడం, ఆయన విగ్రహాన్ని ఆవిష్కరించడం ఈ పర్యటన ఉద్దేశం. రెంటపాళ్ల పర్యటనకు బయలుదేరిన జగన్ కాన్వాయ్‌లో వేలాది మంది కార్యకర్తలు, అనేక వాహనాలు పాల్గొన్నాయి. అయితే పోలీసులు కేవలం మూడు వాహనాలు, 100 మంది వ్యక్తులతో మాత్రమే పర్యటనకు అనుమతించారు. ఈ ఆంక్షలను ఉల్లంఘిస్తూ జగన్ కాన్వాయ్‌లో భారీ ఎత్తున వాహనాలు, కార్యకర్తలు చేరడంతో గుంటూరు జిల్లాలోని ఎటుకూరు వద్ద ఒక వాహనం సింగయ్యను ఢీకొంది. స్థానికులు ఆయనను గుంటూరు జనరల్ ఆసుపత్రికి తరలించినప్పటికీ, ఆయన ప్రాణాలు కోల్పోయారు. సింగయ్యను ఢీకొన్న వాహనం జగన్ కాన్వాయ్‌లోని అధికారిక వాహనం కాదని, AP26CE0001 నంబర్ గల ఒక ప్రైవేటు టాటా సఫారీ వాహనమని జిల్లా ఎస్పీ వెల్లడించారు. వైసీపీ కార్యకర్తలు గాయపడిన సింగయ్యను రోడ్డు పక్కన వదిలేసి వెళ్లిపోయారని స్థానికులు ఆరోపించారు. ఇది వివాదానికి దారితీసింది.

ఈ ఘటనపై టీడీపీ నాయకులు తీవ్ర విమర్శలు గుప్పించారు. జగన్ పర్యటనను హింసను రెచ్చగొట్టే చర్యగా ముఖ్యమంత్రి చంద్రబాబు అభివర్ణించారు. పోలీసు ఆంక్షలను ఉల్లంఘించి, ఇరుకు రోడ్లలో భారీ ర్యాలీలు నిర్వహించడం, రెచ్చగొట్టే ప్లకార్డులతో హింసాత్మక వాతావరణాన్ని సృష్టించారని ఆరోపించారు. ముఖ్యంగా ఈ పర్యటనలో వైసీపీ కార్యకర్తలు ‘రప్పా రప్పా నరుకుతాం’ అనే ప్లకార్డులు ప్రదర్శించడం మరింత వివాదానికి కారణమైంది. 2029లో వైసీపీ అధికారంలోకి వస్తే ప్రత్యర్థులను నరికేస్తామని హెచ్చరించడం అగ్నికి ఆజ్యం పోసినట్లయింది. ఈ ప్లకార్డును ప్రదర్శించిన వైసీపీ కార్యకర్త రవి తేజను పోలీసులు అదుపులోకి తీసుకున్నారు. ఆ తర్వాత కూడా జగన్ రప్పా రప్పా కామెంట్స్ సమర్థించుకోవడంతో మరింత వివాదం చెలరేగింది.

ఓవైపు ఇద్దరు కార్యకర్తలు మృతి చెందడం, రప్పా రప్పా వ్యాఖ్యలపై రగడ చెలరేగడంతో వైసీపీ డైలమాలో పడింది. ఈ వివాదం మరింత ఉద్ధృతం కాకుండా ఉండేందుకు, వైసీపీ నాయకులు సింగయ్య కుటుంబాన్ని పరామర్శించి, పార్టీ తరఫున రూ.10 లక్షల ఆర్థిక సాయం అందజేశారు. ఈ కార్యక్రమంలో గుంటూరు జిల్లా వైసీపీ అధ్యక్షుడు అంబటి రాంబాబు, మాజీ ఎమ్మెల్యే మోదుగుల వేణుగోపాల్ రెడ్డి, ఎమ్మెల్సీ లేళ్ల అప్పిరెడ్డి తదితరులు పాల్గొన్నారు. ఇదే సమయంలో, టీడీపీ నాయకులు కూడా సింగయ్య కుటుంబానికి రూ.50,000, వైసీపీ ఇన్‌ఛార్జ్ రూ.30,000 సాయం అందించారు. మొత్తానికి జగన్ టూర్ వైసీపీ, టీడీపీ మధ్య రాజకీయ ఉద్రిక్తతలను మరింత పెంచింది. అయితే సింగయ్య కుటుంబానికి అందిన సాయం ఈ విషయంలో కొంత ఊరటనిచ్చింది.