YS Jagan: బిగ్ బాస్ జగనేనా..? నెక్స్ట్ టార్గెట్ ఆయనేనా..?

ఆంధ్రప్రదేశ్‌లో రూ.3,500 కోట్ల లిక్కర్ స్కాం కేసు (AP Liquor Scam Case) రాష్ట్ర రాజకీయాలను కుదిపేస్తోంది. ఈ కేసులో వైసీపీ ఎంపీ పి.వి.మిథున్ రెడ్డి అరెస్టుతో (Mithun Reddy Arrest) రాజకీయ వాతావరణం మరింత వేడెక్కింది. స్పెషల్ ఇన్వెస్టిగేషన్ టీమ్ (SIT) దర్యాప్తు మరింత లోతుగా వెళుతున్న కొద్దీ, అన్ని వేళ్లూ మాజీ ముఖ్యమంత్రి వైఎస్ జగన్మోహన్ రెడ్డి (YS Jagan) వైపు చూపిస్తున్నాయని వార్తా కథనాలు పేర్కొంటున్నాయి. ఎక్సైజ్ శాఖ మంత్రి కొల్లు రవీంద్ర (Kollu Ravindra) సైతం ఈ కేసులో “పెద్ద తిమింగలం” త్వరలోనే బయటకు వస్తుందని సూచనప్రాయంగా వ్యాఖ్యానించారు. దీంతో జగన్‌పై అనుమానాలు మరింత బలపడ్డాయి.

2019-2024 మధ్య వైసీపీ ప్రభుత్వ హయాంలో భారీ లిక్కర్ స్కాం జరిగిందనే ఆరోపణలపై కేసు నమోదైంది. ఆంధ్రప్రదేశ్ స్టేట్ బెవరేజెస్ కార్పొరేషన్ లిమిటెడ్ (APSBCL) ద్వారా మద్యం సరఫరా, విక్రయాలలో అక్రమాలు జరిగాయనే ఆరోపణలపై దర్యాప్తు జరుగుతోంది. ఎస్‌ఐటీ దాఖలు చేసిన 305 పేజీల ప్రాథమిక ఛార్జ్‌షీట్‌లో, ఈ కుంభకోణంలో జగన్మోహన్ రెడ్డి పేరు పలుమార్లు ప్రస్తావించింది. ఈ ఛార్జ్‌షీట్‌లో కేసిరెడ్డి రాజశేఖర్ రెడ్డి (ఎ-1), విజయసాయి రెడ్డి (ఎ-5), మిథున్ రెడ్డి (ఎ-4), బాలాజీ గోవిందప్ప (ఎ-33) తదితరులు లంచాలను సేకరించి, జగన్‌కు చేరవేసినట్లు ఆరోపణలు ఉన్నాయి. నెలకు సగటున రూ. 50-60 కోట్లు లంచాల రూపంలో సేకరించినట్లు ఛార్జ్‌షీట్‌లో పేర్కొన్నారు.

రాజంపేట లోక్‌సభ ఎంపీ, వైసీపీ ఫ్లోర్ లీడర్ అయిన పి.వి. మిథున్ రెడ్డిని జులై 19న ఎస్‌ఐటీ అరెస్టు చేసింది. ఏడు గంటలపాటు విచారణ అనంతరం, ఆయన ఆరోగ్య పరీక్షలు నిర్వహించిన తర్వాత విజయవాడ ఏసీబీ కోర్టులో హాజరుపరిచారు. కోర్టు ఆయనను ఆగస్టు 1 వరకు జ్యుడీ‌షియల్ రిమాండ్‌కు పంపింది. మిథున్ రెడ్డి మద్యం విధానంలో కీలక పాత్ర పోషించినట్లు, షెల్ కంపెనీల ద్వారా నిధులను మళ్లించినట్లు ఎస్‌ఐటీ ఆరోపిస్తోంది. ఆయన బెయిల్ పిటిషన్‌ను ఆంధ్రప్రదేశ్ హైకోర్టు, సుప్రీంకోర్టు తిరస్కరించడంతో అరెస్టు మార్గం సుగమమైంది.

ఎస్‌ఐటీ ఛార్జ్‌షీట్ ప్రకారం, జగన్మోహన్ రెడ్డి ఈ కుంభకోణంలో “అల్టిమేట్ బెనిఫిషియరీ”గా పేర్కొనబడ్డారు. అయితే ఆయనను ఇంకా నిందితుడిగా పేర్కొనలేదు. 2019లో హైదరాబాద్‌లోని పార్క్ హయత్ హోటల్‌లో జరిగిన సమావేశంలో, సజ్జల శ్రీధర్ రెడ్డి (ఎ-6) ఆధ్వర్యంలో డిస్టిలరీ యజమానులను బెదిరించారని, మాన్యువల్ ఆర్డర్ ఫర్ సప్లై (OFS) విధానాన్ని అనుసరించాలని ఆదేశించినట్లు ఆరోపణలు ఉన్నాయి. ఇందులో భాగంగానే 12-20% వరకు లంచాలు వసూలు చేసినట్లు ఛార్జ్‌షీట్‌లో వెల్లడైంది.

ఎక్సైజ్ మంత్రి కొల్లు రవీంద్ర ఈ కేసు దేశంలోనే అతిపెద్ద లిక్కర్ స్కామ్‌గా అభివర్ణించారు. 2019-2024 మధ్య రూ. 99,413 కోట్ల నగదు లావాదేవీలు డిజిటల్ రూపంలో కాకుండా మాన్యువల్ గా జరిగాయని, ఈ నిధులు ఎక్కడికి వెళ్లాయనే ప్రశ్నను ఆయన లేవనెత్తారు. ఈ కేసు ఢిల్లీ లిక్కర్ స్కాంకు మించినదని, త్వరలో పెద్ద తిమింగలం బయటకు వస్తుందని ఆయన వెల్లడించారు.

మరోవైపు.. మిథున్ రెడ్డి అరెస్టు తర్వాత వైసీపీ నాయకుల ఆందోళన, జగన్‌లో కంగారు స్పష్టంగా కనిపిస్తోందని విశ్లేషకులు అంటున్నారు. ఎస్‌ఐటీ దర్యాప్తు లోతుగా వెళుతున్న కొద్దీ, మరిన్ని ఆధారాలు బయటపడే అవకాశం ఉందని, ఇది జగన్‌ను నేరుగా ఇరుక్కునేలా చేయవచ్చని వారు అంచనా వేస్తున్నారు. ఎన్‌ఫోర్స్‌మెంట్ డైరెక్టరేట్ (ED) కూడా ఈ కేసులో మనీలాండరింగ్ దర్యాప్తును ప్రారంభించడంతో, ఈ కేసు మరింత సంక్లిష్టంగా మారుతోంది.