Chandra Babu: బాబును మెప్పించిన కోవూరు ఎమ్మెల్యే..

తెలుగు దేశం పార్టీ (TDP) అధ్యక్షుడు, సీఎం చంద్రబాబు నాయుడు (Chandrababu Naidu) తన ప్రామాణికతకు ప్రసిద్ధి. ప్రతి ఒక్కరి పనితీరును జాగ్రత్తగా గమనించే ఆయన, తమ పార్టీ నేతలలో పనితీరుపై ఆసక్తి ఉంటే మాత్రమే మెచ్చుకుంటారు. రోజుకు పద్దెనిమిది గంటల పాటు నిరంతరం పని చేసే ఆయనకు వయసు అడ్డు కాదు. అలాంటి వ్యక్తి నోట పాజిటివ్ కామెంట్ రావడం అంటే అది సాధారణ విషయమేం కాదు.

ఇటీవల పార్టీ ఎమ్మెల్యేలతో నిర్వహించిన టెలికాన్ఫరెన్స్ లో చంద్రబాబు ఒక ఎమ్మెల్యే పనితీరును ప్రస్తావించారని తెలిసింది. ఆ ఎమ్మెల్యేల మరెవరో కాదు వేమిరెడ్డి ప్రశాంతి రెడ్డి (Vemireddy Prashanthi Reddy), కోవూరు (Kovur) నియోజకవర్గం నుండి 2024 లో తొలిసారి ఎమ్మెల్యేగా గెలిచారు. ఆమె ప్రత్యర్థి ఏపీ రాజకీయాలలో ఎంతో ఖ్యాతి పొందిన మాజీ మంత్రి నల్లపురెడ్డి ప్రసన్న కుమార్ రెడ్డి (Nallapureddy Prasanna Kumar Reddy). గెలిచిన తర్వాత ప్రశాంతి రెడ్డి ప్రజల మధ్యే ఎక్కువగా కనిపిస్తున్నారు. ఆమె భర్త వేమిరెడ్డి ప్రభాకరరెడ్డి (Vemireddy Prabhakar Reddy), నెల్లూరు లోక్‌సభ (Nellore Lok Sabha) సభ్యుడు. ఆయన స్థాపించిన ‘VPR’ సంస్థ ద్వారా కోవూరు ప్రాంతంలో ఆమె పలు సేవా కార్యక్రమాలు నిర్వహిస్తున్నారు.

ఈ సేవా కార్యక్రమాలు ముఖ్యంగా గ్రామీణ ప్రాంతాల్లో మంచినీటి సమస్యల పరిష్కారంపై దృష్టి సారించాయి. రోడ్లు, ఇతర మౌలిక సదుపాయాలపై కూడా ఆమె ప్రత్యేక శ్రద్ధ చూపుతున్నారు. రోజూ ప్రజలతో కలసి మాట్లాడటం, పార్టీ కార్యకర్తలతో నేరుగా ఇంటరాక్ట్ అవ్వడం వల్ల ఆమెకు మంచి పేరు వచ్చింది. పార్టీ క్యాడర్ అంతా ఆమెతో ఉన్నట్లు సమాచారం.

అంతే కాదు, భర్త గెలిచిన నెల్లూరు పార్లమెంట్ పరిధిలోని ఇతర నియోజకవర్గాల్లోనూ సమస్యలను గమనించి వాటికి పరిష్కారాల కోసం కృషి చేస్తూ, తన వంతుగా వ్యక్తిగత నిధులు వెచ్చించి ప్రజలకు సేవ చేస్తున్నారు. ఆమె రాజకీయాలలోకి వచ్చిన ఉద్దేశం కూడా సేవే. ఇటువంటి భావనతో పని చేస్తూ గుర్తింపు తెచ్చుకున్న ఆమె తిరుమల తిరుపతి దేవస్థానం (TTD) పాలకమండలిలో సభ్యురాలిగా నియమితులయ్యారు. తద్వారా ఆధ్యాత్మిక రంగంలోనూ కార్యకర్తలకు చేరువ అవుతున్నారు. ఈ అంశాలన్నీ పార్టీ ప్రధాన నేతలకు చేరడంతో బాబు ఆమెను ఇతర ఎమ్మెల్యేలందరికీ ఆదర్శంగా నిలిపారని చెబుతున్నారు. ఆమె శ్రద్ధ, పట్టుదల, ప్రజలతో అనుసంధానం పార్టీలో చర్చకు దారి తీసింది. కొందరైతే భవిష్యత్తులో ఆమెకు మంత్రి స్థానం కూడా ఖాయం అనుకుంటున్నారు.