Kakani Govardhan Reddy: కేరళా నుంచి బెంగ‌ళూరు వరకు.. కాకాణి అరెస్టు మిస్ట‌రీ

వైఎస్సార్ కాంగ్రెస్ పార్టీకి చెందిన ప్రముఖ నేత, మాజీ మంత్రి కాకాణి గోవర్ధన్ రెడ్డి (Kakani Govardhan Reddy) ప్రస్తుతం చర్చనీయాంశంగా మారారు. ఆయనపై కేసులు నమోదవ్వడం, పోలీసులు అరెస్ట్ చేయడం, కోర్టు రిమాండ్ విధించడం అన్నీ ఒకదానితో ఒకటి చోటుచేసుకున్నాయి. తాజా సమాచారం ప్రకారం, నెల్లూరు జిల్లా వెంకటగిరి (Venkatagiri) కోర్టు ఆయనకు 14 రోజుల న్యాయ రిమాండ్ విధించింది. అందువల్ల ఆయనను నెల్లూరు (Nellore) జిల్లా జైలుకు తరలించనున్నట్లు సమాచారం.

ఇతరులకంటే భిన్నంగా ఈ అరెస్ట్ ప్రక్రియపై సందిగ్ధత నెలకొంది. ఆదివారం సాయంత్రం పోలీసులు ఆయనను అరెస్ట్ చేసినట్లు ప్రకటించారు. మొదట మీడియాలో వెలువడిన సమాచారం ప్రకారం ఆయనను కేరళ (Kerala) రాజధాని తిరువనంతపురం (Thiruvananthapuram) నుండి బయటపడేందుకు ప్రయత్నిస్తున్న సందర్భంలో పట్టుకున్నామని చెప్పారు. అయితే తర్వాతి అప్‌డేట్లలో ఆయన బెంగుళూరు (Bengaluru) సమీపంలోని గ్రామంలోని రిసార్ట్‌లో పట్టుబడినట్టు పేర్కొన్నారు. ఎలాంటి స్పష్టత లేకపోవడం, రెండు భిన్నమైన కథనాలు రావడం గమనార్హం. కానీ పోలీసులు కోర్టులో సమర్పించిన నివేదికల్లో మాత్రం ఆయన బెంగుళూరుకు దగ్గర్లోని ఓ విలేజ్ రిసార్ట్‌లోనే అరెస్ట్ అయినట్టు రాసారు.

ఈరోజు తెల్లవారుజామునే ఆయనను నెల్లూరుకు తీసుకొచ్చారు. అప్పటి వరకు ఆయనను జిల్లా పోలీసు శిక్షణ కేంద్రంలో ఉంచారు. అక్కడి నుండి భారీ భద్రత మధ్య వెంకటగిరి కోర్టుకు తీసుకెళ్లి హాజరుపరిచారు. గతంలో ఇదే కోర్టులో టీడీపీ నేత సోమిరెడ్డి చంద్రమోహన్ రెడ్డి (Somireddy Chandramohan Reddy) వర్సెస్ కాకాణి మధ్య పరువు నష్టం కేసుకు సంబంధించిన పత్రాలు దొంగిలింపు కేసు నమోదయ్యింది. ఈ నేపధ్యంలో అదే కోర్టులో మళ్లీ ఆయన విచారణకు హాజరుకావడం మరింత ఆసక్తికరంగా మారింది.

కాకాణిపై నమోదైన కేసుల వివరాల్లో గనుల అక్రమ తవ్వకాలు, సుమారు రెండు కోట్ల విలువైన సున్నపురాయి (Quartz) అక్రమ రవాణా, అధిక శబ్దం వచ్చే పేలుడు పదార్థాల వాడకం, గనుల తవ్వకాలను అడ్డుకున్న దళితులపై దాడులు, ఎస్టీల ఇళ్ల కూల్చివేత, దూషణలు (SC/ST కేసు), పోలీసుల విచారణను తప్పుదారి పట్టించడం, విధుల్లో ఉన్న పోలీసులకు ఆటంకం కలిగించడం వంటివి ఉన్నాయి. ఈ పరిణామాలతో కాకాణి పరిస్థితి రాజకీయంగా తీవ్రంగా దెబ్బతినేలా కనిపిస్తుంది. ప్రస్తుతం ఆయన పై ఉన్న కేసులు ఎలా మలుపుతీసుకుంటాయో, ఆయన రిమాండ్ అనంతరం ఏ మార్పులు చోటుచేసుకుంటాయో చూడాలి.