Raghu Ramakrishna Raju: అప్పుడు చంద్ర బాబు కు లేనిది ఇప్పుడు జగన్ మాత్రం ఎందుకు?

ఏపీ డిప్యూటీ స్పీకర్ రఘురామ కృష్ణ రాజు (Raghu Ramakrishna Raju) తాజాగా చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి. వైసీపీ (YCP) అధినేత, మాజీ ముఖ్యమంత్రి వైఎస్ జగన్మోహన్ రెడ్డి (Jagan Mohan Reddy) ప్రాతినిధ్యం వహిస్తున్న పులివెందుల నియోజకవర్గంలో (Pulivendula Constituency) త్వరలో ఉప ఎన్నికలు రావొచ్చని ఆయన అంచనా వేశారు. అయితే, దీనికి కొన్ని షరతులు ఉంటాయని ఆయన స్పష్టం చేశారు. ఎందుకంటే జగన్మోహన్ రెడ్డి అసెంబ్లీకి వరుసగా అరవై రోజులు హాజరు కాకపోతే, ఆయన సభ్యత్వం రద్దవుతుందని అన్నారు.

ఢిల్లీలో మీడియాతో మాట్లాడిన రఘురామ, ప్రతిపక్ష హోదా కోసం జగన్ వేసుకున్న కేసు అసెంబ్లీ సభ్యత్వ రద్దుతో ఎలాంటి సంబంధం లేదని స్పష్టం చేశారు. ఏ శాసనసభ సభ్యుడైనా, అసెంబ్లీ సమావేశాలకు హాజరు కాకపోతే, అర్థవంతమైన కారణాలతో సెలవు అభ్యర్థన ఇవ్వాల్సి ఉంటుందని చెప్పారు. ప్రతిపక్ష హోదా ప్రజలే నిర్ణయించేదేనని, స్పీకర్ అధికారం కాదని తెలిపారు. అంతేకాదు, అసెంబ్లీకి వచ్చి కేవలం సంతకం చేసి వెళ్లిపోవడం ద్వారా కూడా ఎమ్మెల్యే పదవిని కొనసాగించుకోవచ్చని పేర్కొన్నారు.

ఇప్పటి వరకు జగన్మోహన్ రెడ్డి నుంచి ఎలాంటి సెలవు అభ్యర్థన రాలేదని, వరుసగా 60 రోజులపాటు ఆయన అసెంబ్లీకి రాకపోతే ఉప ఎన్నికలు తప్పవని రఘురామ అభిప్రాయపడ్డారు. కానీ, దీనిపై రాజకీయ విశ్లేషకులు భిన్న అభిప్రాయాలను వ్యక్తం చేస్తున్నారు. ఒక ముఖ్యమంత్రిగా పని చేసిన వ్యక్తి తన పదవిని ఇలానే కోల్పోతే, ఇది ఏటువంటి సమస్యలకు కారణం అవుతుందో అన్న ప్రశ్న తెరపైకి వచ్చింది. అంతే కాదు గతంలో చంద్రబాబు నాయుడు తన ప్రభుత్వ హయాంలో అసెంబ్లీకి అడుగుపెట్టబోనని ప్రకటించిన సందర్భంలో, ఆయన సభ్యత్వం రద్దు చేయలేదంటే, ఇప్పుడు జగన్ విషయంలో మాత్రం ఈ అంశాన్ని ప్రస్తావించడం ఎందుకన్నది ఆసక్తికరమైన మరో ప్రశ్న.

రఘురామ చేస్తున్న వ్యాఖ్యలు ఆయన హోదాకు తగినవేనా అన్నది కూడా చర్చనీయాంశమైంది. వ్యవస్థను నడిపించే నియమాలను గౌరవించడం, ప్రజాస్వామ్య స్ఫూర్తిని దెబ్బతీయకూడదన్నది చాలా ముఖ్యమైన విషయం. ఏదైనా నిర్ణయం తీసుకునే ముందు అన్ని అంశాలను సూత్రప్రాయంగా పరిశీలించాలి. చట్టాన్ని అనవసరంగా బయటకు లాగి, రాజకీయ ప్రయోజనాల కోసం ఉపయోగించాలనుకోవడం ప్రభుత్వానికి మంచిది కాదన్నది స్పష్టంగా అర్థమవుతోంది. దీనివల్ల అధికార పక్షం ఇమేజ్ దెబ్బతినే అవకాశముంది. అందుకే, సంచలన వ్యాఖ్యలు చేయడానికే కాకుండా, ఒక అంశాన్ని అన్ని కోణాల్లో విశ్లేషించి మాత్రమే నిర్ణయాలు తీసుకోవాల్సిన అవసరం ఉంది. రఘురామ ఈ అంశాన్ని సమగ్రంగా పరిశీలిస్తున్నారా లేదా? అన్నదే ఇప్పుడు ప్రధాన చర్చనీయాంశంగా మారింది