Chandrababu: ఆంధ్రప్రదేశ్‌లో టీడీపీ, వైసీపీ మధ్య పెన్షన్ల క్రెడిట్ యుద్ధం.. విన్నర్ ఎవరూ?

ఆంధ్రప్రదేశ్ (Andhra Pradesh) రాజకీయాల్లో సంక్షేమ పథకాల ప్రాధాన్యం ఎప్పటికప్పుడు పెరుగుతూ వస్తోంది. ప్రజల మద్దతు పొందడంలో ఇవి ప్రధాన ఆయుధాలుగా మారాయి. ముఖ్యంగా సామాజిక పెన్షన్ల విషయంలో ఎవరికి క్రెడిట్ దక్కాలన్న పోటీ మరింత ఉత్కంఠభరితంగా సాగుతోంది. పాలకులు తమదే ఘనత అని చెబుతుంటే, ప్రతిపక్షం కూడా తమ పాత్రను గుర్తు చేస్తోంది. ఈ అంశం 2024 ఎన్నికల్లోనూ ప్రధాన చర్చగా నిలిచి.. ఇప్పటికీ కొనసాగుతోంది..

రాజకీయ విశ్లేషకుల అభిప్రాయం ప్రకారం, ప్రజలకు ఎప్పటికప్పుడు పథకాల ప్రయోజనం ఎవరివల్ల లభించిందో గుర్తు చేసే ప్రయత్నం తప్పనిసరి. టీడీపీ (TDP) ఈ విషయంలో ముందే దూసుకెళ్తుంది. ఏ పథకం వచ్చినా విస్తృత ప్రచారం చేస్తుంది. కానీ వైసీపీ (YCP) కాలంలో జగన్ (Y.S. Jagan Mohan Reddy) తాడేపల్లి (Tadepalli) నుంచి బటన్ నొక్కి పథకం ప్రారంభించినా దాని వెనుక ఎవరి కృషి ఉందో ప్రజల మదిలో స్థిరపడలేదని విశ్లేషకులు అంటున్నారు. దీంతో 2024లో వైసీపీకి భారీ దెబ్బ తగిలింది.

పెన్షన్ అంశం తీసుకుంటే, దేశవ్యాప్తంగా పోలిస్తే ఆంధ్రప్రదేశ్‌లోనే అత్యధిక మొత్తాలు ఇస్తున్నారు. బీహార్ (Bihar) వంటి రాష్ట్రాల్లో మూడు రెట్లు పెంచినా అది 1400 రూపాయలకే పరిమితమైందంటే ఏపీలో పెన్షన్ స్థాయి ఎంత ఉన్నదో అర్థమవుతుంది. 2024 ఎన్నికల ముందు చంద్రబాబు (N. Chandrababu Naidu) “సూపర్ సిక్స్” హామీల్లో భాగంగా పెన్షన్‌ను 4000 రూపాయలకు పెంచుతామని చెప్పారు. ఆ వాగ్దానాన్ని ఇప్పుడు అమలు చేస్తున్నారు. ఎన్టీఆర్ (N.T. Rama Rao) కాలంలో 30 రూపాయలుగా ఉన్న పెన్షన్‌ను తాము క్రమంగా పెంచుతూ ఈ స్థాయికి తీసుకొచ్చామని బాబు గుర్తు చేశారు.

దీనిపై వైసీపీ మాత్రం భిన్నంగా వాదిస్తోంది. అసలు సామాజిక పెన్షన్లను అర్హులందరికీ అందేలా చేసిన ఘనత వైఎస్ రాజశేఖర్ రెడ్డి (Y.S. Rajasekhara Reddy) దే అని వారి వాదన. ఆయన హయాంలో పరిమితులు లేకుండా అర్హులందరికీ పెన్షన్లు ఇచ్చారని చెబుతున్నారు. అదే మార్గంలో జగన్ కూడా కొనసాగారని, ముఖ్యంగా 2019లో అధికారంలోకి వచ్చాక పెన్షన్ మొత్తాన్ని మూడు వేలకు పెంచారని వైసీపీ గుర్తు చేస్తోంది.

ఒకవైపు టీడీపీ “75 రూపాయల నుండి 4000 వరకు పెంచింది మేమే” అని క్రెడిట్ తీసుకుంటే, మరోవైపు వైసీపీ “పెంపు మాత్రమే కాదు, అందరికీ చేరేలా చేసిన దాంట్లో మా పాత్రే ప్రధానమని” అంటోంది. అయితే 2024లో జగన్ కొత్త హామీ ఇవ్వకపోవడం, బాబు మాత్రం 4000 రూపాయల వాగ్దానాన్ని అమలు చేయడం ప్రజలలో మంచి ప్రభావం చూపించింది.

ఇక భవిష్యత్తు ప్రణాళికలు కూడా చర్చనీయాంశం అవుతున్నాయి. వైసీపీ 2029 నాటికి పెన్షన్‌ను 5000కి పెంచాలని యోచిస్తున్నట్లు తెలుస్తోంది. కానీ రాజకీయ విశ్లేషకులు మాత్రం 2029 ఎన్నికల ముందు ఆ పెంపును కూడా బాబు చేసి ఆ క్రెడిట్‌ను తన ఖాతాలో వేసుకునే అవకాశం ఉందని అంటున్నారు. మొత్తానికి సంక్షేమ పథకాలపై ఇప్పటివరకు ఆసక్తి చూపని చంద్రబాబు ఇప్పుడు మరింత దూకుడుగా ముందుకు వెళ్తుండటంతో వైసీపీ ఎలా ప్రతిస్పందిస్తుందన్నదే చూడాలి.