Pawan Kalyan: రుషికొండ విలాస భవనాలను చూసి షాక్ అయిన పవన్ ..

ఆంధ్రప్రదేశ్‌ ఉప ముఖ్యమంత్రి ,జనసేన పార్టీ అధ్యక్షుడు పవన్ కళ్యాణ్ (Pawan Kalyan) విశాఖపట్నం (Visakhapatnam) పర్యటనలో భాగంగా రుషికొండ (Rushikonda) పై నిర్మించిన విలాసవంతమైన భవనాలను పరిశీలించారు. ‘సేనతో సేనాని’ కార్యక్రమం కోసం విశాఖలో ఉన్న ఆయన, పర్యాటకశాఖ మంత్రి కందుల దుర్గేశ్ (Kandula Durgesh), జనసేన ఎమ్మెల్యేలతో కలిసి ఈ నిర్మాణాలను చూసారు.

మాజీ ముఖ్యమంత్రి వైఎస్‌ జగన్ మోహన్ రెడ్డి (YS Jagan Mohan Reddy) మూడు రాజధానుల ప్రతిపాదనలో భాగంగా విశాఖను పరిపాలన రాజధానిగా ప్రోత్సహిస్తూ తన క్యాంప్‌ ఆఫీస్ కోసం రుషికొండలోని హరిత రిసార్ట్స్‌ను కూలగొట్టి నాలుగు అత్యాధునిక భవనాలను నిర్మించారు. దాదాపు రూ.450 కోట్ల వ్యయంతో పూర్తైన ఈ నిర్మాణాలు ఆయన పదవీత్యాగం తర్వాత ఖాళీగానే ఉన్నాయి.

ప్రస్తుతం కూటమి ప్రభుత్వం అధికారం చేపట్టిన తరువాత, ఈ భవనాల భవిష్యత్తుపై చర్చలు మళ్లీ మొదలయ్యాయి. ఒక దశలో భీమిలి ఎమ్మెల్యే గంటా శ్రీనివాసరావు (Ganta Srinivasa Rao) మీడియాతో కలిసి రుషికొండ ప్యాలెస్‌ను సందర్శించి ఆ భవనాలను ప్రజలకు చూపించారు. ముఖ్యమంత్రి చంద్రబాబు నాయుడు (N. Chandrababu Naidu) కూడా శాసనసభలో ఈ కట్టడాలను ఎలా వినియోగించుకోవాలో సూచనలు ఇవ్వాలని కోరారు. ఈ నేపథ్యంలో తొలిసారిగా అధికారిక హోదాలో రుషికొండకు వచ్చిన పవన్ కళ్యాణ్, భవనాలను నిశితంగా పరిశీలించారు. గతంలో ప్రతిపక్ష నేతగా ఉన్నప్పుడు తనను రుషికొండకు రానివ్వకుండా పోలీసులు అడ్డుకున్నారని గుర్తుచేసుకున్నారు. ఇప్పుడు అయితే అధికారులే ఘనంగా స్వాగతం పలకడం విశేషమని అన్నారు.

భవనాల లోపల అత్యంత విలాసవంతమైన గదులు, బాత్‌రూమ్‌లు, సమావేశ మందిరం వంటి వాటిని పరిశీలించిన పవన్ ఆశ్చర్యం వ్యక్తం చేశారు. సీలింగ్ పెచ్చులూడిపోవడం, వర్షపు నీరు లీకవడం వంటి లోపాలను కూడా గుర్తించారు. అధికారులు ఈ విషయాలు తమకూ ఇప్పుడే తెలిసాయని చెప్పడంతో ఆయన అసంతృప్తి వ్యక్తం చేశారు. రుషికొండలో గతంలో ఉన్న రిసార్ట్స్ ద్వారా ప్రభుత్వానికి ఏడాదికి సుమారు రూ.7 కోట్ల ఆదాయం వచ్చేదని, కానీ వాటిని కూలగొట్టి ఇప్పుడు సంవత్సరం కోటి రూపాయల నిర్వహణ ఖర్చులు వస్తున్నాయని పవన్ వ్యాఖ్యానించారు. ప్రజాధనాన్ని ఇలాంటి విధంగా వృథా చేయడం దురదృష్టకరమని ఆయన మండిపడ్డారు.

ప్రస్తుతం ఈ నాలుగు భవనాలను ఏ విధంగా వినియోగించాలో స్పష్టత లేకపోవడంతో, దీనిపై శాసనసభలో ప్రత్యేక చర్చ జరగాలని పవన్ సూచించారు. జనసేన తరఫున కొన్ని ప్రతిపాదనలు కూడా ఉంచనున్నట్లు తెలిపారు. మాజీ సీఎం వ్యక్తిగత నివాసం కోసం ఈ కట్టడాలు నిర్మించబడ్డప్పటికీ, ఇప్పుడు వాటిని పర్యాటక అవసరాలకు వినియోగించే అవకాశం పరిశీలిస్తున్నామని ఆయన స్పష్టం చేశారు. ఈ సందర్శనలో పవన్ కళ్యాణ్ చేసిన వ్యాఖ్యలు రుషికొండ భవనాలపై కొనసాగుతున్న చర్చలకు కొత్త మలుపు తిప్పాయి.