Konidela: ఇంటిపేరు ఉన్న గ్రామానికి పవన్ మద్దతు.. హామీని నెరవేర్చిన డిప్యూటీ సీఎం..

ఇటీవ‌ల జరిగిన ఒక ఆసక్తికరమైన సంఘటన పవన్ అభిమానులను ఆకర్షించింది. చిరంజీవి (Chiranjeevi) మరియు డిప్యూటీ సీఎం పవన్ కళ్యాణ్ (Pawan Kalyan) ఇంటిపేరైన “కొణిదెల” (Konidela) పేరుతోనే ఏపీలో ఒక చిన్న గ్రామం ఉంది. ఇది కర్నూలు (Kurnool) జిల్లాలోని నందికొట్కూరు (Nandikotkur) నియోజకవర్గానికి చెందిన గ్రామం. ఈ గ్రామం పేరు విని చాలా మందికి ఆశ్చర్యమే కలిగింది, ఎందుకంటే ఇది ఇప్పటివరకు పెద్దగా వెలుగులోకి రాలేదు. దాదాపు 2000 మంది నివసించే ఈ గ్రామం ఇప్పుడు పవన్ కళ్యాణ్ కారణంగా రాష్ట్రవ్యాప్తంగా గుర్తింపు పొందుతోంది.

పవన్ కళ్యాణ్ ఒకసారి ప్రతిపక్ష నేతగా కర్నూల్‌ జిల్లాను సందర్శించినప్పుడు ఈ గ్రామం గురించి మొదట తెలిసింది. తన ఇంటిపేరుతో గ్రామం ఉన్నట్లు తెలిసి ఆశ్చర్యపోయిన ఆయన, అప్పట్లో గ్రామానికి తనవంతుగా సహాయం చేస్తానని హామీ ఇచ్చారు. ఇప్పుడు అధికారంలోకి వచ్చిన తర్వాత, ఆ హామీని నిలబెట్టుకున్నారు. ఇటీవల నందికొట్కూరు ఎమ్మెల్యే గిత్త జయసూర్య (Gitta Jayasurya) ఆయనను కలిసి గ్రామానికి ఇచ్చిన హామీని గుర్తు చేయగా, పవన్ వెంటనే స్పందించి తన స్వంత నిధుల నుంచి రూ. 50 లక్షలు కేటాయించారు.

ఈ నిధులను తాగునీరు, రోడ్లు, మురుగు కాలువలు, పాఠశాల రహదారి, మొక్కల పెంపకం, రచ్చబండల నిర్మాణం వంటి మౌలిక వసతుల అభివృద్ధికి వినియోగించనున్నారు. ముఖ్యంగా, గ్రామంలో 90,000 లీటర్ల సామర్థ్యంతో ఒక పెద్ద వాటర్ ట్యాంక్‌ను నిర్మించేందుకు ఈ నిధులను వినియోగించనున్నారు. ఈ మొత్తాన్ని కలెక్టర్‌కు (Collector) చెక్కు రూపంలో అప్పగించారు.

ఈ చర్యకు గ్రామస్థుల నుంచి విశేష స్పందన వస్తోంది. సాధారణంగా ఒక నాయకుడు తన పుట్టిన ఊరుకు సహాయం చేయడం సాధారణమైన విషయం అయినప్పటికీ, తన ఇంటిపేరు పై ఉన్న ఊరుకు కూడా అలా సహాయం చేయడం అరుదైన విషయం. ఈ ఘటన పవన్ కళ్యాణ్ నిబద్ధతను, తన హామీలపై ఉన్న గౌరవాన్ని మరొకసారి రుజువు చేసింది. కొణిదెల గ్రామం ఇప్పుడు మెగా కుటుంబంతో అనుబంధాన్ని కలిగి ఉండటం గర్వంగా భావిస్తూ, గ్రామ ప్రజలు ఈ అభివృద్ధికి హర్షం వ్యక్తం చేస్తున్నారు.