క్లాస్ రూమ్ నుంచే సమాజంలో మార్పు: లోకేష్

ఆంధ్రప్రదేశ్ విద్యావ్యవస్థను దేశంలోనే సరికొత్త శిఖరాలకు చేర్చడమే లక్ష్యంగా కూటమి ప్రభుత్వం సరికొత్త సంస్కరణలకు శ్రీకారం చుట్టింది. ఈ క్రమంలో రాష్ట్ర ప్రభుత్వ నైతిక విలువల సలహాదారు, ప్రముఖ ఆధ్యాత్మిక ప్రవచనకర్త చాగంటి కోటేశ్వరరావు ఆధ్వర్యంలో కాకినాడ(Kakinada) రూరల్ మండలం తిమ్మాపురం వద్ద ఆకుండి లక్ష్మీ స్మారక గోశాలలో “భారతీయం” అనే ప్రత్యేక కార్యక్రమాన్ని నిర్వహించారు. విద్యార్థుల్లో దేశభక్తి, నైతిక విలువలను పెంపొందించడమే పరమావధిగా సాగిన ఈ సదస్సుకు రాష్ట్ర విద్యా, ఐటీ శాఖల మంత్రి నారా లోకేశ్(Nara Lokesh) ముఖ్య అతిథిగా హాజరయ్యారు. ఈ సందర్భంగా ఆయన విద్యార్థులను, ఉపాధ్యాయులను ఉద్దేశించి ఆసక్తికర కామెంట్స్ చేసారు.

మంత్రి నారా లోకేశ్ మాట్లాడుతూ.. సమాజంలో ఎలాంటి విప్లవాత్మక మార్పు తీసుకురావాలన్నా అది కేవలం క్లాస్ రూం నుంచే సాధ్యమవుతుందని తాను బలంగా నమ్ముతున్నానని చెప్పారు. అందుకే తాను ప్రత్యేకంగా విద్యాశాఖను ఎంచుకున్నానని తన మనసులోని మాటను బయటపెట్టారు. ప్రభుత్వాలు చేసే ఉపాధి, విద్యా సంబంధిత కృషికి ఉపాధ్యాయులు, తల్లిదండ్రుల నుంచి నైతిక విలువలు కూడా తోడైతే.. ఆంధ్రప్రదేశ్ విద్యావ్యవస్థ దేశంలోనే నెంబర్ వన్ స్థానానికి చేరుకోవడం ఖాయమని ఆయన ధీమా వ్యక్తం చేశారు. కేవలం పుస్తకాల్లోని చదువు మాత్రమే కాకుండా, విద్యార్థులను సమాజానికి ఉపయోగపడే ఉత్తమ పౌరులుగా తీర్చిదిద్దడమే తమ ప్రభుత్వ ప్రధాన ఉద్దేశమని స్పష్టం చేశారు.

ప్రస్తుత ఆధునిక డిజిటల్ యుగంలో సాంకేతికత ఎంత అవసరమో, దానికి తోడు భారతీయ సనాతన విలువలను జోడించడం అంతే ముఖ్యమని లోకేశ్ ఉద్ఘాటించారు. సాంకేతిక పరిజ్ఞానానికి మన నైతిక విలువలు తోడైనప్పుడే ప్రపంచ వేదికపై మన విద్యార్థులు విజేతలుగా ఎదుగుతారని పిలుపునిచ్చారు. నేటి సమాజంలో దేశభక్తి, నైతిక విలువలే మన పటిష్టమైన కుటుంబ వ్యవస్థకు అసలైన పునాదులని నిరూపించారు. చదువుకునే వయసు నుంచే విద్యార్థులు గొప్ప ఆశయాలతో ఎదగాలని, చిన్నచిన్న సమస్యలకే మానసికంగా కుంగిపోకుండా, ఎలాంటి కష్టాలు ఎదురైనా ధైర్యంగా ఎదురొడ్డి పోరాడాలని యువతకు ధైర్యం చెప్పారు. మన దేశం కోసం ప్రాణాలర్పించిన త్యాగధనుల జీవితాలే మనకు నిజమైన మార్గదర్శకాలని, వారి బాటలోనే మనమంతా పయనిస్తూ తల్లిదండ్రులకు, దేశానికి గర్వకారణంగా నిలవాలని విద్యార్థులకు పిలుపునిచ్చారు.