రాయచోటిలో ఆయుధాల కలకలం.. మంత్రి కీలక వ్యాఖ్యలు..!

అన్నమయ్య జిల్లా రాయచోటిలో స్థానిక సంస్థల ఎన్నికల వేళ భారీగా అక్రమ ఆయుధాలు, పిస్టళ్లు, బుల్లెట్లు పట్టుబడటంపై రాష్ట్ర రవాణా శాఖ మంత్రి మండిపల్లి రాంప్రసాద్ రెడ్డి(Mandipalli Ramprasad Reddy) తీవ్రంగా స్పందించారు. ఈ ఆయుధాల కలకలం మరియు పది మంది అంతరాష్ట్ర ముఠా సభ్యుల అరెస్టుపై ఆయన మండిపడుతూ, ఇది ముమ్మాటికీ ఎన్నికల ప్రశాంతతను దెబ్బతీసేందుకు ప్రతిపక్షం చేసిన కుట్ర అని ఆరోపించారు. రాయచోటిలో శాంతిభద్రతలకు విఘాతం కలిగించి, ప్రజలను భయభ్రాంతులకు గురిచేసేందుకే వైసీపీ నేత గడికోట శ్రీకాంత్ రెడ్డి ఢిల్లీ, హైదరాబాద్, పంజాబ్ ప్రాంతాల నుండి ఈ కిరాయి ముఠాలను ఇక్కడికి రప్పించారని మంత్రి తీవ్ర విమర్శలు గుప్పించారు.

అసలు రాయచోటిలో ఇంత పెద్ద ఎత్తున రివాల్వర్లు, పిస్టళ్లు మరియు బుల్లెట్లతో సంచరించడం వెనుక ఉన్న అసలు ఉద్దేశం ఏంటని మంత్రి మండిపల్లి ప్రశ్నించారు. ఈ మారణాయుధాలతో ఎవరిని చంపడానికి స్కెచ్ వేశారో, దీని వెనుక ఎవరి ప్రాణాలకు ముప్పు పొంచి ఉందో గడికోట శ్రీకాంత్ రెడ్డి స్పష్టం చేయాలని ఆయన డిమాండ్ చేశారు. పట్టుబడిన ఈ అంతరాష్ట్ర కిరాయి ముఠాతో శ్రీకాంత్ రెడ్డికి ఉన్న సంబంధాలు ఏంటి అనే కోణంలో పోలీసు యంత్రాంగం అత్యంత సమగ్రమైన విచారణ జరపాలని మంత్రి కోరారు. రాష్ట్రంలో ఎక్కడా లేని విధంగా కేవలం రాయచోటి నియోజకవర్గంలోనే ఇలాంటి అరాచకాలకు తెరలేపడం దారుణమన్నారు.

అక్రమ ఆయుధాలు, గ్యాంగ్‌స్టర్ ముఠాలను పెట్టుకుని ప్రజలను భయపెట్టి ఎన్నికల్లో లాభపడాలని చూస్తే చూస్తూ ఊరుకునేది లేదని మంత్రి హెచ్చరించారు. ఇలాంటి అరాచక శక్తుల పట్ల పోలీసులు మరింత అప్రమత్తంగా ఉండి కఠినంగా వ్యవహరించాలని ఆదేశించారు. రాయచోటి గడ్డపై ఫ్యాక్షనిజం, రౌడీయిజం నడుపుతామంటే కూటమి ప్రభుత్వం సహించదని, ఈ అక్రమ ఆయుధాల సరఫరా వెనుక ఉన్న అసలు సూత్రధారులు ఎవరో తేల్చి, ఎంతటి వారినైనా సరే చట్టం ముందు నిలబెట్టి కఠిన చర్యలు తీసుకుంటామని మంత్రి మండిపల్లి రాంప్రసాద్ రెడ్డి స్పష్టం చేశారు.