Singaiah: జగన్ కారు కింద పడే సింగయ్య మృతి..? కొత్త వీడియో..!!

పల్నాడు జిల్లా (Palnadu) రెంటపాళ్లలో (Rentapalla) జగన్ పర్యటన వివాదాస్పదమైన సంగతి తెలిసిందే. వైసీపీ (YCP) అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి (YS Jagan) ఈ నెల 18 రెంటపాళ్ల గ్రామంలో పర్యటించారు. గత ఏడాది ఆత్మహత్య చేసుకున్న వైసీపీ నాయకుడు, రెంటపాళ్ల గ్రామ ఉప సర్పంచ్ కొర్లకుంట నాగమల్లేశ్వరరావు (Korlakunta Nagamalleswara Rao) కుటుంబాన్ని ఓదార్చారు. ఆయన విగ్రహాన్ని ఆవిష్కరించారు. అయితే, ఈ సందర్భంలో జరిగిన ఒక రోడ్డు ప్రమాదంలో సింగయ్య (Singaiah) ఆనే వైసీపీ కార్యకర్త మృతి చెందారు. జగన్ కారు ఢీకొట్టడం వల్లే ఆయన మృతి చెందారని తాజాగా వీడియోలు వెలుగులోకి వచ్చాయి.

జగన్‌మోహన్ రెడ్డి తన తాడేపల్లి నివాసం నుంచి రెంటపాళ్లకు బయలుదేరిన సమయంలో, గుంటూరు జిల్లా ఎటుకూరు సమీపంలోని లాల్‌పురం హైవేపై ఈ దుర్ఘటన జరిగింది. వెంగళాయపాలెం గ్రామానికి చెందిన చిల్లి సింగయ్య జగన్ కాన్వాయ్‌ను చూసేందుకు రోడ్డు పక్కన నిల్చున్న సమయంలో, ఒక వాహనం ఢీకొట్టడంతో తీవ్రంగా గాయపడ్డాడు. హైవే పెట్రోలింగ్ ఎస్‌ఐ సమాచారంతో గుంటూరు జనరల్ హాస్పిటల్‌కు తరలించినప్పటికీ, సింగయ్య అప్పటికే మృతి చెందినట్లు వైద్యులు నిర్ధారించారు. ఈ ఘటనలో మరొక వ్యక్తి కూడా గుండెపోటుతో మరణించారు. దీంతో జగన్ పర్యటన విషాదంగా మారింది.

ఘటన జరిగిన రోజే గుంటూరు జిల్లా ఎస్పీ సతీష్ కుమార్ మీడియాతో మాట్లాడారు. సింగయ్య మృతికి జగన్ కాన్వాయ్‌లోని వాహనం కాదని, ఒక ప్రైవేట్ టాటా సఫారీ వాహనం (నంబర్: AP26CE0001) ఢీకొట్టి ఆగకుండా వెళ్లిపోయిందని స్పష్టం చేశారు. పోలీసులు ఈ వాహనాన్ని గుర్తించేందుకు సీసీటీవీ ఫుటేజీని పరిశీలిస్తున్నట్లు తెలిపారు. అయితే, తాజాగా సోషల్ మీడియాలో వైరల్ అవుతున్న వీడియోలు జగన్ కాన్వాయ్‌లోని వాహనమే సింగయ్యను ఢీకొట్టినట్లు సూచిస్తున్నాయి. ఈ వీడియోలు బయటకు రావడంతో, జగన్‌పై చర్యలు తీసుకోవాలని డిమాండ్లు ఊపందుకున్నాయి.

ఈ ఘటన రాజకీయ రంగులు పులుముకుంది. జగన్ కాన్వాయ్‌లోని వాహనం సింగయ్యను ఢీకొట్టినా, ఆగకుండా వెళ్లిపోవడం మానవత్వం లేని చర్యగా టీడీపీ నేతలు విమర్శించారు. ఈ ఘటన వైసీపీ నేతల అహంకారాన్ని ప్రతిబింబిస్తుందని ఆరోపించారు. అటు, వైసీపీ నాయకులు ఈ ఆరోపణలను ఖండించారు. ఈ ఘటనను రాజకీయంగా వాడుకోవడానికి ప్రతిపక్షాలు ప్రయత్నిస్తున్నాయని పేర్కొన్నారు. సింగయ్య కుటుంబానికి రూ.10 లక్షల ఆర్థిక సాయం చేశారు. పోలీసులు మొదటి నుంచి స్పష్టంగా చెప్పినా, కొన్ని యెల్లో మీడియా సంస్థలు జగన్‌పై బురద చల్లేందుకు వీడియోలను వక్రీకరిస్తున్నాయని వైసీపీ ఆరోపిస్తోంది.

అయితే సింగయ్య మృతిపై పోలీసుల విచారణ ఇంకా కొనసాగుతోంది. సీసీటీవీ ఫుటేజీ, ఇతర ఆధారాల ఆధారంగా నిజం బయటకు రానుంది. అయితే, ఈ ఘటన వైసీపీ, టీడీపీ మధ్య రాజకీయ ఉద్రిక్తతలను మరింత పెంచింది.